من خمس سنين كانوا الاخوان بينشروا الصورة دي قبل أيام من 6 اكتوبر في
واحدة من محاولاتهم البائسة والفاشلة في إعادة الفوضى للشارع المصري ومحاولة احتلال
الدولة مرة تانية.
انا بس عايز الناس تتأمل في الصورة والكلام..
الصورة متاخدة من الأفيش بتاع فيلم world war z ودا فيلم لبراد بيت من 2013 كان بيتكلم عن ان الناس اتحولت ل زومبي و الصورة
هنا بتعبر عن هجوم همجي غوغائي لكائنات الزومبي الغير عاقلة على سيارات و هيلبكوبتر
الجيش اللي بيحاول ينقذ ما يمكن إنقاذه
الصورة بتقول كل حاجة الإخوان عايزينها
مبدئيا هما عايزينك زومبي من غير عقل او وعي بتنفذ اجندتهم وبس زي اللي
في الصورة دول
ثانيا هما عايزين فوضى تاكل الأخضر واليابس وتقضي على كل مظاهر الحضارة
في الدولة وتحولها لانقاض ترعى فيها الغوغائية وبس
واخيرا العنف الموجه ضد الجيش والقوات النظامية والدولة بشكل عام ودا الهدف
الأسمى اللي كانوا بيحاولوا يغرسوه في نفوس الشباب من وقت ركوبهم على ثورة يناير لحد
اللحظة
اللطيف في الموضوع ان مكتوب على الصورة : سلميتنا أقوى من الرصاص.. الصورة
اللي كلها عنف وهمجية و دمار بيقدموها على أنها مثل ومثال للسلمية..
طبعا دا مش اعتباطا
----------------------------------------------------------
الصورة قوية جدا ومعبرة جدا ومليانة رسايل ودا اسلوب أعداء الوطن برعوا
فيه من وقت يناير وهو التوجيه المجتمعي عن طريق الصورة..
لو بصينا كويس للصور اللي انتشرت من وقت الثورة سواء أكانت فلايرز او بانرات
لو حتى الكوميكس والميمز اللي ليها طابع سياسي هنلاقي ان كلها بتحمل رسايل عنف ورسايل
توجيه ضد الدولة ورسايل لشيطنة الحكم والحاكم أيا كان..
الحاجات دي مش معمولة اعتباطا ولا بالصدفة.. دا شغل مدروس ومخطط ومصروف
عليه كتير جدا انه يوجه المجتمع لتدمير نفسه بنفسه داخليا عن طريق الإحباط المجتمعي
ونشر ثقافة العنف داخل الدولة و زرع فكر المواجهة المستمرة ضد الحاكم والدولة وقواتها
النظامية
هي حرب برع اعداء الوطن فيها ودون شك كلفتنا كتير.. كتير جدا.. واترتب
عليها آثار سوشيوسيكولوجية هندفع تمنها لعقود قادمة....
الحرب دي كان أحد أهم اذرعها هما الإخوان بكتيبتهم الإعلامية المنظمة اللي
اتسخرت بالكامل لخدمة أعداء الوطن على مدار 8 سنوات ولسة مستمرين..
عشان كدا انا بعتبر ان الرئيس السيسي لو معملش حاجة غير انه حما مصر من
شر الإخوان وخطرهم فهو عمل ما يكفي.. دا اذا تغاضينا عن الطفرات المهولة اللي بتحصل
في مصر.. والثورة الهائلة اللي بتحصل في مجالات الإصلاح الاقتصادي والبنية التحتية
والمشاريع الاستثمارية وبداية التغيير في مجالات الصحة والتعليم واللي يمكن لسة في
أوائل تحركهم..
اللي بيتعمل دا الناس مش هتحس بيه انهارده لأنه لسة لم يؤت ثماره.. لكن
قريبا ان شاءالله كل حاجة هتكون واضحة.. ربنا
مبيضيعش تعب حد
انا عندي قناعة تامة ان اللي الرئيس السيسي بيعمله في ال 8 سنين دول مش
بس بيرمم بيه خطايا ال 60 سنة اللي فاتوا وبيصلح بيه العك اللي اتعمل من وقت انقلاب
يوليو 52.. لكن كمان ان شاءالله دا هيسند مصر 50 سنة قدام وهيكون بداية قوية نقف عليها
عشان نعمل للمستقبل.. باذن الله
ليست هناك تعليقات:
إرسال تعليق