العلاقات
الإنسانية بمختلف أنواعها هي عبارة عن روابط مختلفة الأشكال بتربط الناس ببعض
وبتحولهم لأفراد في شكل دائري حول نقطة هي نفسها الشخص اللي بتجتمع عنده العلاقات
دي؛ بمعنى انك في اسرتك مثلا حواليك والدك.. والدتك.. اخواتك.. زوجتك او زوجك..
اولادك.. كل حد من دول بينك وبينه خط ولو بصيت من فوق هتلاقي انهم دايرة حواليك
كل
واحد مننا حياته فيها كذا دايرة.. دايرة الأسرة والأهل.. دايرة الشغل.. دايرة
الأصدقاء والمعارف.. وطبعا منقدرش ننسى الدايرة الخفية بتاعت أمن الدولة.. أيوة
موجودة متقلقش بس مبتشوفهاش
الدواير
دي مستقلة لكن نظرا لارتباطها بنفس المركز.. لاو نفس الشخص.. فهي بتتداخل في مساحة
ما.. بتتقاطع في مساحة ما.. المساحة دي هي الحاجات اللي بيشترك فيها الدايرتين
بالنسبة للشخص وكل دايرة فيهم بتأثر على التانية من خلالها..
زي
مثلا انك مش عارف تخرج مع اسرتك عشان عندك شغل.. او طنشت الشغل عشان ارتباط
عائلي.. او أخدت جزء من الشغل معاك البيت.. دي حاجات بتنصل مساحة التقاطع بين
الدواير دي
-------------------------------------------------------------------
طيب
المقدمة دي لازمتها إيه؟
أقولك
أنا
بصراحة
كدا.. ولا حاجة
حقيقي
يعني المقدمة دي مقدمة سخيفة ملهاش علاقة مباشرة بموضوع التدوينة ووجدها هنا مش
منطقي إطلاقا..
أنا
حطيتها هنا بس على أمل انك تزهق وتمشي قبل مل نتكلم عن موضوعنا
مزهقتش؟
طيب مش مشكلة
العلاقات
اللي فاتت دي كلها بيعتمد كل منها على عدة عوامل..
يعني
مثلا علاقتك بمديرك في الشغل يتعتمد على حاجلت زي المصلحة المشتركة.. انت بتعمله
شغل يدخله فلوس وآخر الشهر بتقبض أجر تصرفه كله على المواصلات والسجاير.. فدي
مصلحة مشتركة.. في نفس العلاقة هتلاقي رابط تاني زي إنك مثلا مش طايق مديرك.. ودي
رابطة قوية جدا بتخليك عايز تعمل شغلك كويس عشان متسمعش صوته وهو بينفخك
في
العلاقات الأسرية مثلا هتلاقي أن بينك وبين زوجتك في روابط متعددة.. منها الحب..
الإهتمام.. المسؤلية المشتركة في إدارة شؤون البيت.. إلى آخره؛ دا طبعا اذا
تغاضينا عن العقد اللي بصمت عليه والقايمة (ملحوظة بين هلاليين .. صاحب هذه
المدونة ممضاش على قايمة.. مش فتونة يعني بس الحمدلله مناسب ناس محترمين جدا)
كذلك
بين الأصدقاء في روابط وعوامل بتشكل الخطوط اللي بينكم.. زي مثلا انكم بتقضوا
اوقاتكم سويا بحثا عن ال fun سواء على القهوة
او في النادي او حتى في غرزة.. كل شلة واهتماماتها
في
عوامل وروابط كتير بتحدد وبتحافظ على العلاقات بين الأفراد.. لكن يظل أهمها في
رأيي هو.. الثقة
الثقة
هي الجوهر و الأساس اللي بتتبني عليه أي علاقة مهما تعددت الروابط ومهما كان في
حاجلت مشتركة تانية.. كل دا من غير الثقة.. بلح
مديرك
في الشغل لو مش واثق انك هتخاف على فلوسه وتحافظ عليها وتنميها مش هيعرف يشغلك..
مش هيرتاح معاك وهيفضل طول الوقت حاطك تحت عينه ودي حاجة مرهقة جدا هينتج عنها انه
هيمشيك في أقرب فرصة ويستبدلك بحد يحوذ ثقته
زوجتك
لو انت مش واثق فيها وفي أخلاقها وأنها هتراعي غيابك زي حضورك مش هتعرف تقفل باب
شقتك وتنزل وتسيبها..
كذلك
هي لو مش قادرة تثق فيك مستحيل هتحش بالسعادة والراحة والأمان معاك وهتفضل دايما
متخيلة إن أي أنثى تانية في أي دايرة من دواير حياتك هي بالضرورة واحدة من اللي
انت تعرفها عليهم
حتى
ابنك وبنتك.. لو مفيش عندهم ثقة تجاهك هيكبروا بشعور اليتيم وأنهم عايشين في
الدنيا لوحدهم من غير اب/ام.. من غير سند و من غير أمان.. وهيكونوا كائنات مشوهة
ماشية تتخبط في الدنيا وهيبقوا فريسة سهلة جدا لانياب الوحوش البشرية اللي عايشة
حواليهم
المريض
لو مش واثق في الطبيب مش هيقدر يلتزم بخطة العلاج وهيلف على اتنين وتلاتة وعشرة..
وبغض النظر عن انه غالبا هيبقى مريض متخلف وهيلاقي انه بيسمع نفس الكلام غالبا..
بس برده الفكرة انه من غير الثقة مش هيقدر يرتاح ولا يتعالج
الثقة..
هي الأساس
الثقة..
هي العنصر الأهم والأقوى في أي علاقة
الثقة..
هي السبيل الوحيد للشعور والاستمتاع بباقي الروابط اللي بينك وبين الأفراد اللي في
دواير حياتك
عشان
كدا خليك حريص انك متحتفظش بعلاقة تخلو من الثقة.. الإنسان اللي مش قادر تثق فيه
مش هتعرف و مش هينفع تعيش معاه.. هتكون علاقة مريضة مرهقة وهتنتهي بفشل هتتناسب
قسوته طرديا مع درجة القرب بينكم وأهمية الدايرة اللي بتجمعكم
عشان
كدا خليك حريص جدا على انك تبني جسور ثقة بينك وبين الأفراد في دواير حياتك.. خليك
حريص انك تستحوذ على ثقتهم فيك
الثقة
أولا ثم يأتي كل شيء تاني
أنا
أذكر في مرة احتجت خدمة شخصية.. استفسار في الواقع من زميلة لا يجمعني بيها أي نوع
من العلاقات واتقابلنا مرة وحيدة في ايفنت وتصادف اننا قعدنا جنب بعض.. هتقولي ودي
احتجت منها ايه.. هقولك مش شغلك
المهم..
انا فاكر ان يوم ما بعتلها اسألها عن حاجة معينة اول كلمة بعتها ليها كانت "can i trust you?"
لأن
من غير دا مكنش هينفع نبني علاقة إنسانية ولو كانت في بساطة ال chat اللي
استغرق حوالي 5 دقايق وانتهى..
هي
الحياة كدا..
ثقة
وشوية حاجات فوق بعض
أنهى
كلامي بأنه تاني خليك حريص على انك تطمن الناس اللي في دايرتك انك شخص جدير
بثقتهم.. ودي حاجة مش سهلة وبتطلب مجهود مش بسيط وطبعا سمات شخصية.. لازم تكون انت
إنسان نضيف أصلا
وبرده
ابعد قدر على قد ما تقدر عن الأشخاص اللي مش هتقدر تثق فيهم.. ابعد بسرعة ومتبصش
وراك
وأخيرا
بقى فلو كنت تصادف وجودك في علاقة تخلو من الثقة وملهاش باب خروج سواء انك stuck فيها أو باختيارك..
فربنا يعينك بقى وخلاص
ليست هناك تعليقات:
إرسال تعليق