من يومين كدا كتبت بوست عن نظام كيتو دايت على جروب السفاح وطلعت من الموضوع دا باكتشاف مهم جدا.. الكيتو ليه لجان في مصر!
أيوة! الهجوم الضاري الغير مبرر من الكائنات الكيتونية كان مفاجيء كأني مثلا جيت على حد من عيالهم.. الكيتو فيما يبدو بقى صنم في أوساط المهتمين بالتغذية في مصر حاليا ودامش غريب عموما كل فترة بيكون في موضة او ترند ماشي في موضوع التغذية والناس بتدافع عنه باديها وسنانها لحد ما يطلع غيره.. ولنا في الفيجان/النباتيين خير مثال يعني..
اللي لاحظته من كلام الاخوة الكيتوجينيك ان اغلبهم مش فاهمين اصلا ميكانيزم عمل الدايت اللي ماشيين عليه وطبعا جلهم مش عارفين فايدته وطريقة استخدامه المثالية وبيتعاملوا معاه على انه نظام غذائي يصلح للحياة ومتعايشين مع الموضوع دا عادي جدا ومتصالحين مع نفسهم بصورة مبهرة تؤكد حقيقة ان فعلا الجهل نعمة
هتكلم شوية هنا عن الكيتودايت.. وتحديدا عن الحاجات اللي الإخوة الكيتوجينيك بيعملوها وهما مش عارفين وبياكلوا دهنة عشانها وهما مش فاهمين
--------------------------------------
١.ايه الكيتودايت دا؟
- كلمة كيتو هي اختصار لكلمة ketone body ودا مركب كيميائي حمضي بينتج من حرق الجسم للدهون؛ والتسمية سببها راجع لأن ال fuel الأساسي للجسم في النظام الغذائي دا هو الدهون.
الكيتودايت هو نظام بيهدف إلى خفض استهلاك الجسم من النشويات وبيطرح بديل ليها كمصدر للطاقة عبارة عن الدهون الصحية عشان الجسم يستمد منها طاقته.
٢. ايه فوايده والهدف منه؟
- الكيتودايت تم تطويره كنظام غذائي علاجي لبعض الأمراض اللي زيادة النشويات بتؤدي لتفاقمها زي مرض السكر وتحديدا النوع التاني وزي مرض ال parkinsonism او الشلل الرعاش وال epilepsy أو الصرع.. (fig. 1)
هو في الأساس نظام غذائي علاجي تم تطويره لأهداف علاجية بحتة لغير غرض علاج مرض السمنة ولوحظ أثناء البحث والتجارب انه بيؤدي لخسارة الوزن ومن هنا حصل ال abuse بتاعه في المجال دا.
(fig.1) استخدامات الكيتو اللي ميعرفهاش الاخوة الكيتوجينيكس
٣. طيب طالما هو بيخسس فعلا ليه الاستخدام دا abuse؟
- ببساطة لأنه مش نظام غذائي متوازن بيهدف انه يمد الجسم الطبيعي السليم المعافي من الأمراض اللي اتطور النظام دا عشانها بالعناصر الكاملة اللازمة ليه ولكنه نظام غذائي بيهدف لحرمان الجسم المعتل ببعض الأمراض بعينها من بعض العناصر اللي وجودها في الجسم بيسبب تفاقم الأمراض دي دون غيرها
٤. طيب ليه الناس بتخس على الكيتو؟
- خلينا نقول ازاي مش ليه.. معظم الكيتوجينيك فاكرين انهم بيخسوا بسبب اكلهم للدهون.. ودا خطأ شنيع الحقيقة.. هما في الواقع بيخسوا بنفس ذات الطريقة اللي متبعه في اي نظام تغذية تاني بيهدف لخسارة الوزن.. بيخسوا عشان عاملين فرق سعرات؛ الكوميدي انهم مش عارفين دا
اللي بيحصل انه بيدخل على الكيتو يقولك بس يا معلم هنوقف النشويات ونحددها تحت ٢٥جم في اليوم (ودي نسبة ضارة على فكرة للجسم الطبيعي) وهنضرب بقى زبدة وسمنة ولية وسنام جمل.. تخيل.. سنام جمل! طيب والجمل ذنبه ايه؟! المهم.. وبيكون معتقد ان سنام الجمل خسسه.. في حين انه خس عشان هو اخد كمية من سنام الجمل اقل من سعرات ثباته فعمل فرق سعرات فخس.. (fig. 2) & (fig. 3) بس كدا.. نفس النتيجة كان ممكن يوصلها لو كان اكل ودن الجمل او ديله او شلاضيمه عادي (مفردها شلضوم او شلضومة وهي شفايف الجمل.. الكبيرة دي)
(fig. 2) زي ماهو مكتوب هنا.. كل كمية الفات اللي انت عايزها يات وحش.. وبعديها بسطرين.
بص.. لو عايز تخس او تزيد ابقى احسب بقى وظبط الدنيا كدا.. اللي هو حاجة آخر انت بتقول ايييييه
(fig. 3) بيوضح طريقة خسارة الوزن في انظمة الدايت المختلفة بما فيهم الكيتو
٥. طيب ايه فايدة الدهون في الكيتو؟
حضرتك دي مصدر السعرات اللي بيتقدم للجسم لأن أثناء الدايت وخسارة الوزن لازم السعرات اليومية يكون جزء منها داخل من برا الجسم في اي صورة والجزء التاني هو دهون الجسم المستهدف التخلص منها.. في الكيتو انت بتقدم الدهون كمصدر للطاقة الخارجية وليس كحافز للتخسيس وحرق الدهون.. surpriiiiiiiiise
٦. بس الناس اللي مشيت كيتو دهونها الثلاثية قلت ومقاومة الإنسولين عندها اتحسنت.. دا مش خرافة!
- بص حضرتك الحاجات دي مرتبطة بالسمنة في حد ذاتها.. وبزوال السمنة لأي سبب هتزول الآثار المترتبة عنها اللي بتقول عليها دي..
أي واحد كان تخين وخس لازم جسمه هيكون معدلات الدهون فيه اتزبطت و مقاومة الجسم للإنسولين قلت وكمية الإنسولين في الدم قلت كنتيجة لدا.. وبديهي لو مريض سكر دا هيفيده في انه يقلل احتياجه من الإنسولين ولو كان مريض نوع تاني هيقل جرعات العلاج بتاعته برده وممكن ميحتاجش خالص لو كان سكر درجة تانية نسبته بسيطة.. زي ما قلنا دي أشياء مرتبطة بالسمنة والتخلص منها وليس بالكيتو والدهون
٧ . طيب ليه الكيتو لأ؟؟
- بصراحة إجابة السؤال دا ليها اكتر من سبب وجيه
أولا.. زي ما قولنا هو نظام غذائي يستهدف علاج أمراض بعينها وكونه بيدي نتايج تانية on the side دا لا يبيح استخدامه للهدف دا.
ثانيا.. هو نظام غير متوازن بيحرم الجسم من عنصر مهم جدا جدا هو النشويات؛ النشويات مهمة لأنها ال fuel بتاع المخ، عشان كدا في بداية الكيتو بيبقى الواحد مش فاهم في ايه.. مخه مش واصله بنزين كفاية، بعد اسابيع بيبدأ الجسم يعمل adaptation لكن يظل دا وضع غير طبيعي وغير صالح للاستمرار فترات طويلة..
النشويات مهمة جدا للبناء العضلي.. مش هتقدر تبني عضلات ضخمة من غير كارب.. مش هتقدر.. في الواقع مش هتقدر تتمرن اساسا من غير كارب؛ مهما حاول الأخوة الكيتوجينيك ادعاء العكس.. it's science
ثالثا.. نسبة الكارب اللي بيستهدفوا الحفاظ عليها.. تحت ٢٥جم في اليوم دي نسبة ضعيفة جدا واستمرارها ضار للجسم للأسباب السابق ذكرها ومالم تكن للأهداف العلاجية السابقة فهي تمثل عبء على الجسم على المدى الطويل
رابعا.. الكيتو بيقسم الوجبة إلى high fat/moderate protein/ very low carb.. انت بتحرم الجسم من كمية بروتين كبيرة وبتزود فات في حين ان البروتين افيد للجسم من الدهون.. الدهون هتدي احساس بالشبع.. فقط.. في حين ان البروتين هيدي احساس بالشبع وهيساهم في بناء الجسم وزيادة الكتلة العضلية وتحويل ال muscle/fat ratio في اتجاه زيادة العضلات.. دا مش ممكن يحصل في الكيتو بنفس الصورة مهما حاولوا ادعاء غير ذلك عن جهل.. كمان كمية الفات العالية دي مع الوقت بفرض ان حد استمر على الكيتو for life ودا مستحيل.. مع الوقت هتسبب امراض زيادة الدهون لأنها في الأول وفي الآخر دهون حتى لو كانت صحية..
الجسم بيتعامل مع كل شيء لحد معين وبعد كدا بينهار أمام الزيادة.. طيب تعرف ان في حاجة اسمها تسمم الماء؟ تخيل؟ المياة الزيادة بالنسبة للجسم مشكلة.. ما بالك بالدهون!
خامسا.. الكيتو ممكن تمشي عليه فترة وتنزل وزنك فعلا.. لكن الأكيد انه غير صالح انه تمشي عليه للأبد للأسباب السالف ذكرها..
الدايت اللي مش هتقدر تمشي عليه للأبد تعرف انه بالتأكيد فيه حاجة غلط.. يعني الناس اللي بتقولك هعمل دايت الكمون والقرفة.. دايت الزبادي باللمون.. دايت معرفش ايه.. هل في حد هيعيش حياته كلها على الزبادي والليمون؟ اكيد لا عشان كدا دي كلها أنظمة لا يمكن اعتبارها صحية والكيتو مش استثناء.. يستحيل ان حد يعيش حياته كلها على الدهون حتى لو صحية.. هيموت بصحة كويسة وهو عنده ٤٠ سنة بأزمة قلبية والله
-----------------------------------------
أخيراً.. أنا كنت بعاني طول حياتي تقريبا من السمنة المفرطة.. كنت obese grade III ومكنتش اعرف اي حاجة عن التغذية السليمة لحد ما ربنا أكرمني وأنعم عليا بخسارة الوزن الزايد بطريقة صحية وسليمة وعرفت في تجربتي ان الطريق هو انك اول حاجة مفيش حرمان.. تاني حاجة التوازن بين مكونات الغذاء.. تالت حاجة ان وزن = سعرات الجميل في النظام دا.. اللي هو أكل صحي متوازن مع فرق سعرات انك تقدر تمشي بيه طول حياتك لأنك بتاكل أكل سليم وفيه كل اللي الجسم محتاجه ومش محروم فمفيش cravings وبتتحكم غي الزيادة والنقصان والثبات عن طريق حساب السعرات وربنا يديمها علينا نعمة
