الحياة مش بلاتوه

من سنة كدا تقريبا كنت مع قريب ليا صادفته بعض الظروف النفسية السيئة المصاحبة للامتحانات في الثانوية العامة ومدخلش بعض الامتحانات في سنتها.. ولأننا عائلة طبية بحتة فاستقر الرأي اني اخده لطبيب نفسي كفء عشان يحصل على الدعم اللي محتاده بشكل سليم.. وفعلا روحت معاه في أول زيارة

انا فاكر كويس يومها الجزء دا من الحوار:

-         الدكتور: انت ايه مشكلتك؟

-         الولد: مدخلتش الامتحانات وضيعت سنة من عمري.

-         الدكتور: وايه السنة في عمرك؟ سنة واحدة من عمر كامل.. فين الخسارة؟

--------------------------------------------------------------------------

في الوقت دا انا كنت بمر ب transform  كبير في حياتي بخصوص موضوع الدايت اللي بعد كدا اكتشفت ان الرحلة دي غيرت ال mindset بتاعتي بشكل جذري وخلتني انظر للحياة والأمور والمواقف المختلفة بشكل مختلف

وبعد الأحداث دي بفترة بسيطة جدا مريت بفترة من اصعب فترات حياتي وأحداث هتفضل معلمة فيا لحد آخر يوم في حياتي وأعتقد أثرها هيفضل معايا مطبوع على عظامي في القبر من شدتها..

بره دي كانت من الحاجات اللي خلتني بالmentality  الحالية وال mindset اللي انا عايش بيهم دلوقت..

--------------------------------------------------------------------------

انهارده جالي خبر مش لطيف وبالنسبة للبعض يعتبر كارثة وازمة كبيرة.. وطبعا انا upset to death بس مع ذلك انا قررت اني هبص للموضوع في اطاره واديله حجمه فقط

لقيت ان الموضوع دا يتحط في قايمة الجوانب السلبية لحياتي في الفترة دي.. او الاحداث السيئة يعني.. وهو وان كان جاي في وقت معنديش فيه مكان لحزن او اكتئاب أكتر من الموجودين.. الا انه الحمدلله على كل حال يعني

لما فكرت قلت ان دا حدث واحد سيء.. مش حدث هين طبعا لكنه حدث سيء.. وفي اللي ممكن يتعمل بخصوصه.. يبقى اذا حجم الخسارة منه مش عظيم أو كارثي ومش نهاية الكون ولا آخر الحياة.. it’s just another chapter in life

من أهم الحاجات اللي استفدتها من ال transform اللي ربنا أكرمني وانجزته في شكلي وجسمي اني ادركت وشوفت ازاي الحياة دي ups & downs وان الواحد مش بيتنقل من نقطة لنقطة في خط مستقيم.. بالعكس.. لازم بيمشي ويقع ويقف ويقع تاني ويقف تاني.. الفكرة بس انه يكون حريص ان  اخر فصل في الرواية يكون وقوف مش وقوع

في الدايت كانت بتيجي أيام بلتزم جدا وايام بخربها بغباء وارجع بعدها التزم وهوب يالا بافالو وبعدين التزم.. الكوكتيل دا نتج عنه اني اتحولت من chubby and saggy  لشخص تاني fit and muscular

فكذلك الحياة.. بتقع وتقوم لحد ما توصل واي وقعة مهما كانت فهي أضعف من انها تكسرك حتما.. واي وقعة مهما كانت في طريقة للوقوف بعدها..

المطلوب بس يكون عندك ال mindset وال mentality المطلوبين.. وقبل كل شيء.. توفيق ربنا طبعا

a touching moment - dear teacher

last night in the gym, while doing the lat. dumbbell raise, it's quite a nasty exercise for almost everyone

i was trying a new higher weight than usual which made it even worse

so, as it happens, one of the guys at the gym came to help.. this happens all the time

the thing is.. this time the guy was not just a guy, he was a man.. and a very honorable one if i may

he was my English teacher in secondary school who goes to the same gym.. this might be something ordinary and happens like all the time, we all help each other do the hard lifts.. but this one touched me..

he was my teacher and a very pioneer one back then, he taught me, helped me upgrade my knowledge and language.. this was like 15 years ago or more

and now he is there again, right on time to help me upgrade and become a better version of whatever I'm up to..

i am much more than happy and proud to be one of your students dear Mr. Waleed Assad which i will be thankful for till the very last day of my life

عفريت العجلة

تحذير: هذا البوست يحتوي على hate speech وغير مناسب لمحبي مدينة دمنهور مع التأكيد على عدم الانتقاص من الاشخاص.

----------------------------

مصر فيها مدينة عايزة الحرق اسمها دمنهور.. كل ذكرياتي معاها عايزة الحرق

من يومين كدا كنت هناك للأسف الشديد يعني.. وانا راجع حصل موقف يتماشى مع ذكريات البلد عندي انا هحكيه بس مش عشان الموقف لكن عشان جزء من تفاصيله يستحق الوقوف أمامه.. هعرضه على صورة حوار

كنت راجع بالليل واكلت حفرة محترمة كدا فيما يبدو انها تنت الجنط بتاع فردة كاوتش والعجلة طبعا قعدت تسرب الهوا لحد ما فضت خالص وما أخدتش بالي لأنها عجلة خلفية مش أمامية في عربية جر أمامي.. المهم يعني

الكلام دا حصل تقريبا اول ما طلعت من دمنهور وفضلت طول الطريق ماشي بالعجلة فاضية والحياة جميلة وزي الفل

وبعدين لما قربت على رشيد واحد راكب موتوسيكل قاللي: "يا اوستاذ العجلة نايمة".. فطبعا انا ادركت انها نايمة من وقت الخبطة وقلت طيب انا داخل على منطقة فيها حوالي 4568 واحد بتوع كاوتش.. هبقى أقف عند اي حد يزبطها

عديت على أول اتنين لقيتهم قافلين قلت خلاص شكل الناس نامت لما اركن على جنب وأغير الكاوتش

ركنت في مكان ما أخدتش بالي انه ضلمة خالص.. ضلمة من غير اي نور حتى وللأسف الأرض بتاعته مش مزبوطة فيها حتت عالية وواطية..رفعت العربية على الكوريك وخلعت الفردة النايمة وجيت اركب الاستبن (مش مرسي ربنا ياخده..فردة الكاوتش الاستبن) لقيت ان الأرض عالية والكاوتش مش هيعدى.. ايموشن أحيه

طبعا جربت كل الطرق السلمية والعنيفة ومفيش فايدة وانا عارف انه مفيش فايدة.. المشكلة دلوقت ان العربية على 3 فرد يعني مش هينفع أنزلها وأزقها لمنطقة تانية.. طيب هتعمل ايه يا قرمط.. هتعمل ايه يا قرمط

فجأة.. سمعت صوت بيقول: "عايز مساعدة؟"

غالبا أول مرة ال عقلى طنش الصوت عشان أكتر حاجتين بخاف منهم هما الضلمة والعفاريت وانا واقف في حتة مفيهاش أي نور من اي نوع غير نور الانتظار بتاع عربيتي ولو في عربية معدية ولا حاجة.. وحتى ما ادركتش دا غير وقت ما سمعت الصوت

الصوت اتكرر تاني: "عايز مساعدة؟"

طبعا هنا بقى ما كانش ينفع اطنش.. بصيت حواليا اشوف الصوت جاي منين فوجئت بأني واقف لوحدي في الضلمة

- يا أستاذ

دمي نشف طبعا وأخدت بالي لأول مرة انه صوت أنثوي لشابة تحت العشرين غالبا

فضلت ابص حواليا

- أنا هنا أهو

بصيت واخدت بالي اني تقريبا راكن جنب سور من بوص وشجر بتاع بيت فيما يبدو والصوت جاي منه.. طبعا قلت بسم الله الرحمن الرحيم وانا منتظر القرون والديل والحاجات دي

أخيرا الحمدلله شوفت الصوت جاي منين وطلعت فيما يبدو بشر مش عفريت.. بنت تيجي 16 سنة كدا

- محتاج مساعدة؟

- لا شكرا الله يخليكي

- أناديلك بابا ولا اخويا ولا عمي؟

- لا الله يخليكي متشكر

- طيب براحتك

رجعت أشوف ههبب ايه في العربية وبعدين سمعتها بتقول:

- هو انا ممكن أكسر الإزاز دا؟

- نعم؟

- ممكن أكسر الإزاز بتاع العربية؟

فطبعا انا برده مش فاهم ولسة مش متأكد انها بني آدم ولا عفريت.. وكدا بقت الاحتمالات اتغيرت شوية وبقت انها تكون عفريت أو بني آدم أهبل

المهم.. بصيتلها وانا مش فاهم في ايه

- خير؟ ليه؟

- أصل عليه حاجة وحشة أوي!

بصيت على الازاز مش شايف حاجة في الضلمة.. بصيتلها وانا مش شايفها أصلا كويس.. وبعدين افتكرت اني معلق عندي ميدالية فيها راس الشيطان

طبعا دمي نشف ان دي الحاجة اللي شافتها ومضايقاها وقلت يا سوادك يا قرمط

- أصل في على الإزاز حاجة وحشة أوي.. الشعار

- نعم؟

- الشعار دا وحش أوي

أخدت بالي انها قصدها على شعار الزمالك اللي لازقه على الإزاز بتاع العربية

هنا بقى اتأكدت انها بني آدم لأن مفيش عفريت أهبل

- يا ستي هو انا في ايه وانتي في ايه.. ادخلي.. ادخلي جوا بيتكم

وبعد جرعة الأدرينالين المهولة دي نزلت العربية من على الكريك وتقريبا شيلتها مكان العجلة الرابعة ورجعتها ورا شوية ورفعتها

جيت أركب الكاوتش.. لقيت لسة الأرض عالية (فاصل من السباب)

بعدين كررت موضوع اني أحركها.. ولك ان تتخيل اني برفعها وبزقها وبوقفها كل دا لوحدي.. انا والادرينالين

وبعدين الحمدلله وصلت لمنطقة مناسبة.. رفعت العربية تاني.. غيرت الكاوتش اللي أخيرا ركب بعد ما كنت اتأخرت ساعة على ميعادي..

طبعا فضلت طول الوقت بحاول أجمع شكل سواق الموتوسيكل في دماغي عشان لو قابلته اقتله.. مانا جاي من دمنهور وأم الكاوتش نايم حبكت يعني تقولي أصحيه!

نزلت العربية من على الكوريك.. هوب.. العجلة فرشت على الأرض.. طبعا أنا مش فاهم.. مستحيل يكون الاستبن فاضي مش بتحصل.. ومش هيكون فاضي خالص غير لو مخروم.. بصيت على العجلة اللي انا خلعتها وبعدين أخدت بالي

انا ركبت فردة الكاوتش النايمة تاني

End Of Text/embolism

واجب العزاء

الحقيقة دايما بكون حريص على المشاركة في العزاء اللي يخص دايرة معارفي.. يمكن بحاول اخلع من الأفراح بس العزا كنت بحس انه مينفعش اتأخر عنه طالما يخص حد اعرفه

كنت زمان دايما بقول طيب لو الحد اللي اعرفه دا هو اللي توفاه الله.. هروح اعزي مين؟ انا معرفش حد من اهله ومش هبقى عارف حتى مين اللي في الخاطر ولا هما عارفيني

مع وفاة والدي - رحمه الله وأكرم مثواه - ومع جنازته اللي كانت بفضل الله تعالى ممتلئة بالبشر عن آخرها.. فهمت

وقت صلاة الجنازة المسجد كان ممتلئ عن آخره.. والساحة حول المسجد على اتساعها كانت ممتلئة عن آخرها.. كمية مهولة من الناس انا معرفش معظمهم

بس اعرف اني حسيت بشعور طيب ان والدي كان بينه وبين الناس دي كلها خير بشكل او بآخر

منهم االي كان قريب بالدم او النسب ومنهم اللي كان جار ومنهم اللي كان معرفة حسنة ومنهم اللي كان في يوم والدي الطبيب ربنا استخدمه سبب في شفاءه.. ومنهم اللي لسة باقي على شيء من أخلاق الإنسانية والمسلمين الطيبة وحضر الصلاة والعزاء من باب الأجر والثواب للمتوفي ولنفسه او لتقديم الدعم لأهل المتوفي

المهم ان ايا كان السبب فالأكيد ان مشهد الجنازة الممتلئ بالناس أعطى لي شخصيا قدر من السكينة والاطمئنان على والدي وقد استعدت في عقلي كافة المقولات التراثية عن فضل ودلالات سعة الجنازة وما إلى ذلك مما لا أعرف ان كان من اصول الدين ام انه دخيل عليه.. الا اني اعرف انه كان شعورا طيبا

لذا.. فمن استطاع حضور جنازة من يعرف ومن لايعرف فلا يتأخر.. فلا تعلم قدر الدعم الذي تقدمه لأهله ولا تعلم ما يصل المتوفى من رحمة بحضورك الصلاة والدعاء له

-------------

شكرا لكل حد قدم العزاء في والدي واخص بالشكر اصدقاء الطفولة والشباب اللي ربما بعدتنا المسافات وانقطعت الصلات بحكم الحياة لكن فوجئت بوجودهم في العزاء.. شكرا ليكم جدا

"" سكون الموت "".. في رثاء أبي

ذلك السكون الذي يملأ الاجواء عند الموت

فكأنما الأماكن صارت أوسع 

وكأنما كل شيء صار أهدأ

كان كل ما حولك من حياة صارت اقل صخبا

كأنما كل ما حولك من جماد صار أكثر صمتا

شعور غريب بالخواء و الفراغ

شعور ربما تندهش من عدم تخيله قبل معايشته

شعور غريب ان فرغت من حولك الدار وهي عامرة

فكأنما من رحل كان الوجود

أو ان الوجود كان به أكمل 

----------

رحم الله والدي د. محمود شحاتة وجزاه خير الجزاء بحسن ما ربى وما عالج وما علَّم

٢ مارس ٢٠١٩ - من أمام منزله الأخير

sexy life

there's regular chess and sexy chess

regular chess is for those who want to win most of the games no matter what..

they play by the book, stick to all the rules, play it safe, keep it closed and wait for any crack to get through

there's other type of players who like it spicy!

they make sacrifices, take chances, they lure the opponent, give 'em bates,play it risky..

they may not win, but they sure play hell of games and make every damn move beautiful!

i like to play it sexy, in chess and in life.

الرحلة

نعم الطريق طويل

نعم هي رحلة مرهقة جدا

حتما لم أكن أعلم حين بدأتها أنها بهذه الشدة

رحلة تطول مسافاتها كلما مشيت بها

تزداد طرقها تشعبا مع امتداد الطريق

تفاصيل كثيرة تظهر في ثناياها كلما طال المسير

نعم هي رحلة متعبة حقا

غير أنها ليست كغيرها من الأسفار

غير أنها.. غير أنها حتما.. ليست كغيرها من الأسفار

فهي رحلة لا تستطيع معها التوقف للراحة من شمس النهار 

وهي رحلة لا تستطيع إلغاءها والعودة للديار

و هي رحلة.. وهي رحلة ما ان تبدأ فلا سبيل عنها للفرار

رحلة تطلبها فتطلبك

وما أن تطلبك تتملكك

تملي عليك شروطها وليس لك

فيها غير أن تمضي حتى النهاية فلا خيار

my 2018..biggest achievement.. worst break

so.. it took me quite a while before i decided to write this one, I don't recall me being a big fan of year summaries, but this year, i do have a few issues to share

for this year is like no other.. definitely

2018 for me is best described as my biggest achievement and worst, hardest and most cruel break.. ever

* between jan and july.. i had no idea

* I've always been obese.. too much fat and grease.. never been able to lose a single gram, but this changed this year, finally Allah answered my prayers and gave me strength to make the transform.. and now, I'm a much different person, definitely a much different someone after losing this much weight.. thank God

and this is my biggest achievement, probably in my whole life

* between jan and july.. i had no idea

* this year and for the first time, i found myself facing a medicolegal issue, it wasn't easy for me at first, but thank God.. i could make it through and I'm much cooler about it now

* i have gained much skills and exp in my work this year, learnt a lot, performed new procedures.. it was a good year surgerywise

* between jan nd july.. i had no idea

* ok.. it was a hard year.. damn it was so very hard year.. full of suffer, pain, breaks, pain.. too much pain in fact.. it wasn't easy for me, still not

* remember remember, the thirty-first of july.. i sure will,, always and forever

* between jan and july.. i had no idea

* so my life ended that day, I'm nothing much more a walking dead right now, soulless corps wandering trying to tackle what was meant to be the duty of the deceased soul.. that's me now

* i don't have much memories past that time, idk much about that's been going on, i get vague images of moments of weakness, joy, tears, laughs, mostly painful moments.. i don't know, and i don't care

تجربتي في خسارة الوزن

بداية البوست دا كتبته على صفحة سفاح الفات على فيس بوك يوم 31 أغسطس 2018

-----------------------------------------------

الفرق بين الصورتين مش ميزان

الفرق بينهم حياة

الحقيقة انا بدأت مشكلتي مع الوزن الزايد بدري.. من سن 12 سنة ولحد الوقت الحالي 28 سنة وانا عايش وسط الناس التخينة.. وزن زايد دايما.. اكل غلط دايما.. مفيش حركة تقريبا.. كل ال faulty lifestyle اللي كنت عايش فيه

كان في محاولات سابقة لخسارة الوزن.. جربت حاجات كتير من اول الدايتس المشهورة زي اتكينز لحد الشاي الأخضر والميتفورمين ولو كان حد قال ان المخدرات بتخسس كنت ممكن اجربها.. طبعا كله فشل لأن كله غلط

شربت حوالي فدان شاي اخضر واخدت مصنع كامل سيدوفاج وبرده مخسيتش ومكنتش هخس.. ببساطة لأن مش دا الطريق

فجأة قررت مع صديق اننا هنبدا رحلة دايت جديدة وننزل جيم سوا.. الكلام دا بدأ يوم 31/3

من يومها وانا اخدت قرار اني ان شاء الله المرة دي هوضل يعني هوصل.. ومش هتنازل عن التارجت مهما حصل

كان وزني لما بدأت 110ك وانا طولي 172..كان عندي بتاع 40ك زيادة

انهارده وبعد 5 شهور وزني 80ك الحمدلله وان شاء الله مش هتتازل عن التارجت

مع اني آخر شهرين كسلت شوية ومش بنزل الجيم عشان مشغول بس برده ان شاء الله مكمل.. دعواتكم

الموضوع سهل وبسيط.. محتاج بس انك تحس ان عندك مشكلة وانك تقرر تحلها

في شوية نصايح هحطهم عشان اللي يحب يمشي في الطريق دا:

1.  صحتك هي أغلى ما تملك.. وبالذات لو في أسرة متعلقة في رقبتك.. لازم تكون سليم عشان مفروض انت تشيلهم مش هما يشيلوك

2. الأكل تعود.. تعود.. تعود..

الكمية والانواع والأوقات.. كب دي حاجات العامل النفسي والسلوكي فيها مهم جدا مش بدنية بس ابدا..

انا كنت متعود لحد يوم 30/3 اني اتغدى مكرونة وبانيه وبطاطس وبيبسي واتعشى بيتزا او فطير؛ يوم 31/3 كنت باكل سلطة وبروتين بس من غير كارب ومحسيتش بأي حاجة غير اني ارتحت

3. الدايت مش حرمان

انا باكل كل اللي عايزه.. بس ببدل المكونات الضارة بمكونات صحية.. زيت زيتون وزبدة وسمنة بلدي بدل الزيت.. عسل بدل السكر.. باخد يوم فري.. مش ناقصني حاجة

4. في ممنوعات تامة في الدايت هي نفسها الممنوعات لأي انسان سواء كان تخين او رفيع لأنها متعلقة بالصحة

السكر بألوانه.. الدقيق بألوانه.. الدهون الغير صحية زي الزيوت والسمنة الصناعي

5.  لازم لازم لازم تحسب سعرات الأكل.. برنامج my fitness pal هو صديقك الوفي في رحلة الدايت.. هيعرفك انت بتاكل ايه وامتى تفتح بقك وامتى تقفله

6.  لازم تعرف ان الأكل بالليل وبعد الساعة 8 وبعد الساعة 6 وبعد اي ساعة مش بيتخن.. انا باكل وانا نايم عادي.. الموضوع كله في الكالوريز.. حافظت على ال deficit هتخس.. ضربته انسى

7. لازم تقرا عن التغذية وطبيعة الأكل وتعامل الجسم معاه.. مش لازم تكون طبيب عشان تفهم دا؛ اقرا من اي مصدر موثوق منه وكتاب السفاح عظيم في نقطة شرح التغذية السليمة وهيفيدك كتير ولو تقدر تزود من مصادر اجنبية زود

8. مفيش ادوية بتخسس ولا اعشاب بتخسس ولا عفاريت بتخسس.. الكالوري ديفيسيت بس هو اللي هينفعك

9. يستحسن يكون معاك حد يمشي معاك المشوار عشان تشجعوا بعض.. انا استفدت جدا من وجود صديقي في اننا كنا بنشجع بعض لما حد يريح

10. لازم تحط تارجت قدامك.. والتارجت دا انك تكون ideal مش انك تخس كام كيلو وتكون عارف ان تقطة النجاح هي التارجت واي نقطة قبله تقف عندها هي فشل.

11. لك في الماء حياة.

12.  الكارب سايكل هي الـ سوبرمان وقت البلاتوه.

13. حاول دايما تشوف الناس اللي قدرت تتغير.. دا بيحفز جدا وبيخليك عايز تكون زيهم.. انا صور الناس هنا كانت بتفرحني وبتديني طاقة اني اكمل وانا عارف اني هوصل.. عشان كدا حبيت اشارك عشان احفز غيري زي ما غيري حفزني

14. السكر.. السكر.. السكر.. والنشويات البسيطة والدهون الغير صحية هما ولاد ابو اسماعيل.. انا بقالي 5 شهور ما اكلتش عيش ورز غير يمكن 4 مرات كل واحد فيهم ومرة واحدة شربت بيبسي دايت بس كنت بخربها يومها في بافالو 

15.  خليك عارف ان ال metabolism بتاع جسمك انت بتحطه على طزيق وهو بيمشي لوحده.. الطريق دا يا بناء دهون يا هدم دهون.. حطه على الطريق الصح وهتفاجأ انه ماشي حتى لو انت لخبطت شوية في النص.

بالتوفيق يا شباب

واحب بصراحة اشكر كل اللي دعموني في المشوار دا.. أسرتي؛ و أصدقائي وصفحة السفاح ومجهود إسلام إدريس والجميلة د. جيهان رسلان ومجهودها الكبير في نشر التوعية الصحية والغذائية.

تقدر تزور التدوينات السابقة عن التغذية في اللينكات اللي تحت دي:

 افهم أكلك - تغذية 101

فرق السعرات CALORIE DEFICIT - تغذية 102

وأخيرا.. إجابة السؤال الأشهر.. "ازاي نخس؟".. تغذية 103

ما تيجي نتجوز؟

مقدمة (1)..

الحقيقة انا حبيت اكتب تدوينة عن الجواز.. آه والله

بدون مناسبة كدا.. من خلال مشاهداتي لكلام الشباب والأكبر شوية على السوشيال ميديا حبيت أسيب التاتش بتاعتي انا كمان.. اشمعنى انا يعني

في التدوينة دي ان شاءالله هتكلم من واقع الخبرة ومن واقع رؤيتي الشخصية القيمة طبعا (ما هي لازم تكون قيمة.. لو كانت لاقيمة لها هكتبها ليه يعني!) عن الموضوع دا

مقدمة (2)

احب ابدأ بس بدعاء موضوع الزواج: "اللهم أبعد عنا الفيمينيستس".. ثم تتفل عن يسارك ثلاثا

انا هكتب المقال على هيئة اسالة عن أفكار شائعة في الموضوع دا وهجاوب عليها وهصحح لنفسي وهديني نجمة و 10/10 وكل حاجة.. مش مطلوب منك أي مجهود متقلقش..

بسم الله الرحمن الرحيم

--------------------------------------

(1) الجواز دا حاجة مهمة ولا ممكن نعيش ونتعايش من غيره؟

-         هجاوب على السؤال دا في الآخر.

(2) ايه اهمية الزواج بالنسبة للراجل؟

-    لا الحقيقة مش زي ماهو شائع.. الموضوع أكبر وأعمق وأهم بكتير من اللى بتفكر فيه, أهمية الزواج بالنسبة للراجل يمكن تلخيص وصفه في الوصول بعد السفر, والراحة بعد عناء يوم طويل في العمل, الاستقرار والطمأنينة بعد حياة مليئة بالفوضى.

افهم اللي فات دا زي ما تفهمه.. هو واضح كفاية أفتكر

(3) طيب واهمية الزواج بالنسبة للمرأة؟

-    الحقيقة أنا مش مرأة عشان أجاوب, بس أستطيع أن أجزم أن كل امرأة تبحث في زوجها أول ما تبحث عن الأمان الذي يطمأنها ويعوضها البعد عن مأمنها السابق في كنف أبيها..

ثم تبحث فيه عن الحب والسعادة وراحة البال.. فهي كلها أشياء تتحقق بعد الشعور بالأمان

(4) طيب الصالونات ولا ال love story؟

-    اجابة السؤال دا يلزم ليها الاقرار بحقيقة ان الزواج دا رزق من الله.. سواء أكان صالونات أو حب عنيف فما يلي فقرة المأذون لا يمكن التنبؤ به.. فربما تم الزواج عن طريق خالتك أم محمد الخاطبة وكان من خير الأزواج وأرفقهم بزوجته.. وربما كان زواجا ناتجا عن قصة حب اسطورية وتنتهي الى اروقة المحاكم بحثا عن مهرب وخلاص

أما عن رأيي الشخصي.. فبعد توفيق الله عز وجل.. واذا تحدثنا عن حب حقيقي نابع من قلب رجل يحمل من صفات ونبل وأخلاق الفرسان(فما يكون الرجل ان لم يكن فارسا؟) ويقابله قلب امرأة تحب بصدق وبحق.. فالزواج عن حب خير وأبقى.. ليه بقى؟

الزواج هو اجتماع لشخصين مختلفين غريبين عن بعض بعضهما البعض في الطباع والعادات والخلفيات الثقافية والاجتماعية والمحببات والمكروهات.. وكل شيء تقريبا.. وبديهي ان احدهما ليس مثاليا بقدر نقص الآخر وعواره.. ولذلك كان حتما وجود رصيد يسمح بتوفير الـ "سبب" اللازم للمحاولة مرة بعد مرة.. وحل الخلافات.. والوصول لمواقف مشتركة والتفاهم حولها.. كان لرزاما توافر ما يجمع المختلفين ويلم شتات المتنافرين ويهديء سريرة المتناحرين وقت الأزمات حتى لا ينهار البيت مع أول خلاف.. أو مع أكبر خلاف.. فلا تدري ماذا يختبيء في طوية الأيام.

الحقيقة أنا ربنا أنعم عليا بأن زواجي تم عن قصة غريبة.. مش صالونات.. لكن ربنا شاء اني ارتبط بصديقة عمري بعد 10 سنوات صداقة كانت فيهم my best friend وانا كذلك بالنسبة ليها لكن دي كانت حدود علاقتنا وحافظنا عليها رغم طول السنين وبعد المسافات وبعد الاتصال اللي كان بيستمر شهور وأحيانا سنوات..

(5) طيب ازاي علاقة الزواج دي ممكن تنجح؟

-         بصراحة في شوية متطلبات أساسية لا بد من توافرها في الطرفين عشان يقدروا يحافظوا على العلاقة والبيت..

أولا.. المسؤلية, الزواج حتى وان كان ناتج عن حب الا انه مسؤلية كبيرة بتقتضى ان الشريكين يكونوا على قدرها ويتحملوها ويتحملوا تبعاتها ويكونوا مهيئين لدا نفسيا و شعوريا واكيد طبعا ماديا.

ثانيا.. ان تكون نظرتهم لعلاقة الزواج دي انها رابط مقدس يجب استنفاذ كل السبل الممكنة والغير ممكنة للحفاظ عليه وكأنه زواج كاثوليك مفيش مفر منه ويجب مغالبة النفس مرات ومرات وتحمل كل ما لا يطيق الانسان "اذا اقتضى الأمر" في سبيل الحفاظ على النعمة اللي ربنا انعم عليها بيها دي..

ودا ميخليش الزواج سجن ولا حرب.. لكنه زي أي تجربة بيخوضها الانسان بتحتاج مجهود واصرار ومحاولات للحفاظ عليه.. فلازم تكون نفسيا مهيأ لدا.. مش تتعامل بمبدأ لا احنا نتطلق بقى وكل واحد يعيش براحته وبلا هم.. دا اسمه عدم مسؤلية في رأيي.

ثالثا.. لازم الرجل يكون متفهم انه هيتحمل القدر الأكبر في أوقات الصدمات و أوقات المشاكل  و أوقات الخلاف.. يعني من الآخر لازم الراجل يكون متفهم ان عشان العلاقة دي تنجح هييجي على نفسه احيان كتيرة.. ببساطة because he can

رابعا.. لازم المرأة تفهم انها لابد ان تعطي لزوجها قدره من الاحترام أولا والرعاية والحب والاهتمام ثانيا ومن تقدير الفرق والاختلاف ثالثا

يعني من الآخر لابد أن يكون الرجل رجلا وأن تكون المرأة أنثى

(6) نيجي للسؤال الأول.. الزواج دا حاجة كويسة ولا حاجة وحشة؟

-    كلنا بنسمع كلام كتيرمتناقض واراء كتيرة نابعة من تجارب أصحابها ومن رؤيتهم الأساسية للموضوع.. زي المقال دا بالزبط بالمناسبة.. وانا هنا هتكلم كما أرى

مبدأيا الزواج دا زيه زي أي شيء هو رزق مقدر من ربنا للناس.. كل واحد بياخد منه نصيب.. مش كل الناس نصيبها زي بعض.. لكن عشان نحكم على الزواج من باب النصيب فقط لا بد من استيفاء باقى الجوانب المتعلقة ب تعاملنا احنا مع الزواج دا ونتأكد ان مكانش لينا يد في افشاله وتحويله لتجربة كبيسة..

يبقى اذا نفهم من دا ان احنا حتما لينا دور في انه يكون علاقة ناجحة أو فاشلة وهو دور مش صغير في الواقع وبيترواح بين مجهود يسير في حالة ما كان الزوجين ربنا هاديهم لبعض.. أو مجهود كبير جدا في حالة ما كان في صعوبات في التأقلم.. في الحالتين لا بد من  الاجتهاد وفي الحالتين فالنتيجة هتكون مرضية باذن الله

انا شخصيا ربنا كرمني باللي ينطبق عليها وصف "الزوجة الصالحة" ودا فضل من ربنا مليش دخل فيه.. هي انسانة كويسة جدا ومن عائلة طيبة للغاية الحمدلله.. لكن رغم دا كل ما بنتقدم في الجواز بنلاقي ان احنا الاتنين محتاجين نشتغل على العلاقة عشان نعدي مواقف معينة بنمر بيها ونزود مساحة التفاهم بينا..

انا بقول الكلام دا عشان ادي مثال للغير يمكن اللي يقرأ التدوينة ينتفع بيه

(7) طيب ليه في فيمينيستس في الكوكب بيكرهوا البنات في الجواز؟

-    الحقيقة معرفش.. مجرد مرورهم بتجارب سيئة أو مرورهم بلا تجارب على الإطلاق ليس سببا في رأيي لاسقاط تجربتهم على فكرة الزواج كاملة.. هو في رأيي تناول خاطيء لأحداث صادمة ليس أكثر

----------------------------------------------

كلمة أخيرة,,

الزواج سنة من سنن الله في الكون.. شرعها الله تعالى لمخلوقاته ليقرب بينهم ويؤلف بين قلوبهم وتكون وسيلة لـ"بناء" المجتمعات وتعمير الأرض.. فاذا كانت من سنن الله في الكون فهي حتما سنة حسنة وأي تشوه يصيبها هو خطأ في التطبيق وليس في النظرية.. وأحيانا يكون القدر وليس خطأ في التطبيق..

في كل الأحوال فالزواج ورابط الأسرة من أكثر الأشياء التى اهتم الله تعالى بالحفاظ عليها وتوصية الزوج بزوجته والزوجة بزوجها والأبناء بآبائهم.. فهو رباط مقدس هام للغاية وضعه الله لنا ليصلح لنا معاشنا ويصلح به آخرتنا.. حتى أن الله تعالى جعل فك ميثاق الزواج هو أبغض ما أحل لنا نحن بني آدم.. فلا نلجأ لفك الميثاق الا مكرهين مبغضين بقدر بغض الله تعالى له

عسى الله أن يرزقنا واياكم بر أزواجنا وبرنا بأزواجنا ويرزقنا ذرية صالحة تقر أعيننا

آه بالمناسبة.. عنوان التدوينة دي هو الجملة اللي قلتلها لزوجتي لما جيت أفاتحها في موضوع ارتباطنا.