فرق السعرات CALORIE DEFICIT - تغذية 102

معلش أنا عارف ان الصورة اللي فوق دي تخوف والله.. بس يعني قلت اخوفكم شوية عشان نعلي الكورتيزول ونزود الحرق شوية و..

لأ.. محدش بيخس من أفلام الرعب..

دي التدوينة التانية في سلسلة تدويناتنا عن التغذية وهتكلم انهارده ان شاءالله عن حاجة مهمة جدا اتذكرت في التدوينة السابقة اسمها الـ CALORIE DEFICIT.. أو فرق السعرات.. ودا موضوع أساسي للي مهتم بعمل دايت لخسارة الوزن أو زيادته أو حتى للي عايز يثبت وزنه.. أما بقى اللي مش فارق معاه الموضوع فدا يروح يجيب كيس شيبسي عائلي وبرطمان نوتيلا على ما نخلص.

هبدأ بتعريف كلمة CALORIE.. الكالوري هو وحدة لقياس الطاقة وبيساوي كمية الطاقة اللازمة لرفع حرارة 1 كجم من الماء بمقدار درجة واحدة سيليزية.

طيب ايه اهمية الكلام دا؟  ولا حاجة بصراحة بس عشان نبقى عارفين بنتكلم عن ايه لأن الدايت فهم مش حفظ.

الكالوري في مجال التغذية بيستخدم للتعبير عن الطاقة الموجودة في مكونات الأكل وعن الطاقة اللي بيحتاجها وبيستهلكها أو بيخزنها الجسم

التعريف الجاي مهم بقى اننا نفهمه.. اسمه مقدار طاقة الثبات أوMAINTENANCE CALORIES.. ايه دا؟

كل واحد فينا ليه مقدار مكافيء من الطاقة.. بمعنى ان اي واحد فينا وزنه وطوله وعمره وجنسه ومتوسط الأنشطة اللي بيبذلها في اليوم سواء في الأنشطة الحياتية أو الرياضة أو غيرها بيدخلوا في معادلة انا معرفهاش عشان يطلع في الآخر كمية من الطاقة الكمية دي هي اللي جسمه بيحتاجها في اليوم

بديهي كدا هتكون كالوريز الثبات دي هي كمية الكالوريز اللي احنا محتاجينها عشان نحافظ على وزننا الحالي

يعني لو افترضنا ان في شخص ذكر عمره 25 سنة و طوله 175سم ومش بيمارس رياضة وجينا نحسب احتياجات جسمه اليومية من الطاقة هنلاقي انه بيحتاج في حدود 2200 كالوري يوميا تقريبا.. وهي دي كالوريز الثبات بتاعته اللى لو دخلها كل يوم مش هيزيد وزن ولا هيخسر وزن.. يفضل زي ما هو

لينك موقع calorie calculator 

بالتالي لو في حد عايز يخسر وزن لازم يعمل  CALORIE DEFICIT.. لازم يعمل فرق سعرات بالسالب ويدخل لجسمه طاقة أقل من احتياج الجسم واستخدامه عشان يبدأ الجسم ياخد من المخزون الموجود عنده اللى هو الدهون.

عشان كدا.. مفيش أي طريقة هتقدر تخسر بيها وزن حقيقي من غير ما تراقب أكلك.. لازم تكون عارف احتياجاتك.. عامل حساباتك.. محدد انت هتاكل ايه.. بمعنى هتاكل كام كالوري في اليوم عشان توصل للتارجت بتاعك

أي دايت لا يشمل على حساب السعرات هو دايت فاشل تماما وهتسيبه قبل ما توصل للنتيجة اللى انت عايزها.. لأنك هتبقى عامل زي اللي ماشي في طريق مفيهوش يفط او علامات ارشادية ومش عارف هو رايح فين فهيرجع وخلاص.. لازم تفهم

طيب دا بالنسبة للإنسان..

بالنسبة للأكل بقى.. الأكل برده في الآخر بيدي كمية من الطاقة.. طبعا بتختلف حسب نوع الأكل.. الدهون بتدي طاقة عالية, حوالي 9 كالوري لكل جرام دهون.. يليها النشويات و البروتين كل منهم بيدي حوالي 4 كالوري لكل 1جم كارب أو بروتين.. عشان كدا لما نيجي ناكل لازم نبقى عارفين احنا بناكل ايه وكمية طاقة قد ايه.. دا لو مهتمين بعمل تغيير في الوزن سواء بالزيادة أو النقصان.

طيب ليه الدايت اللي من غير حساب سعرات بيفشل دايما؟

ببساطة لأن الأكل متنوع جدا في كمية الطاقة اللي بيقدمهالنا.. الموضوع مش مرتبط بـ بتاكل قد ايه بقدر ماهو مرتبط بـ بتاكل ايه

يعني على سبيل المثال.. قطعة تشوكليت كيك زي هوهوز مثلا فيها حوالي 400 كالوري, نفس ال 400 كالوري دول تقدر تاخد بيهم حوالي ربع فرخة مشوية وطبق سلطة عملاق وتفاحة.. مع الفارق ان ال 400 كالوري الأولانيين هتاخدهم وتجوع أكتر في حين ان التانيين هيشبعوك.. وفرق تاني أهم هو ان التشوكليت كيك مضرة في حين ان البروتينات والسلطة غذاء مفيد.. انا هنا مش هتطرق لمكونات الأكل وهخلي الكلام في دا في تدوينة مستقلة ان شاءالله

برده مثال تاني.. قطعة كنافة صغيرة بيكون فيها من 250-500 كالوري حسب الشغل المعمول فيها وال 500 كالوري دول هتلاقي ان هما تقريبا مساويين لوجبة كاملة مشبعة صحية لو انت ملتزم بدايت.. متخيل؟

قطعة البيتزا الواحدة فيها حوالي 300 كالوري.. ودا رقم ممكن تعمل بيه حاجات كتير أوي.. ممكن تسافر بيه على طيارة مثلا

عشان كدا مفيش دايت من غير حسابات.. مفيش دايت من غير ما اكون عارف انا بدخل جسمي ايه

من غير ما تحسب انت هتقول انا مزبط أكلى وتمشي تاخد قطمة من هنا على حتة من هنا على لطة من هنا.. هوب.. آخر الشهر 2 كيلو زيادة وتقول الدايت دا مشروع فاشل ومحدش بيخس وبتاع

طيب نيجي لسؤال مهم نختم بيه كلامنا عن السعرات كـ كم وليس كـ كيفية

هو الكام بكام يا محترم؟

يعني كام سعر يدوني كام كيلو على الميزان؟

اجابة السؤال دا صادمة شوية.. كل 1 كجم = 7000 كالوري.. بمعنى انك عشان تزيد 1كجم محتاج تدخل 7000 كالوري ""زيادة"" عن كالوريز الثبات اللي هيستهلكها جسمك وعشان تخس محتاج تنقص 7000 كالوريز من كالوريز الثبات بتاعتك عشان الجسم يستهلك من مخزونه

طيب فين الصدمة؟

الصدمة في إن زيادة 7000 كالوري حاجة سهلة جدا.. في حين انك تنقص 7000 كالوري محتاجة التزام وصبر ووقت.

يعني انت ممكن بسهولة تاكل في يوم واحد بيتزا (2500 كالوري في المتوسط) مع بيرجر وبطاطس وبيبسي (كمان 2000 كالوري لو بيرجر من بافالو و هيبقوا حوالي 1000 بس لو من جاد) وهوب اليوم اللي بعده كشري وبالليل مكرونة وبانيه وفي النص شوية شوكلاتة وبرطمان نوتيلا بدون قصد وقع في بقك بعد يومين تلاتة هتكون زيدت كيلو

انما عشان تخسر نفس الكيلو محتاج تقلل الطاقة اللي بتدخلها عن احتياجات جسمك حوالي 1000 كالوري في اليوم عشان بعد اسبوع تكون نزلت 1 كجم.. ودا مش هيكون بالساهل على فكرة وبالذات لو انت مش آخد الموضوع جد وعندك تصميم

الموضوع مش لعب.. لكن مش مسحتيل..ومش صعب حتى.. كل ما في الموضوع انك تاخد قرار وانك يكون عندك تصميم وانك تلتزم.. وانك تقرا وتفهم وتتعلم.. ازاي بقى؟

تابع مقالات المدونة وان شاءالله هنتعلم مع بعض ازاي.. وبالنسبة لموضوع نعمل حساباتنا ازاي.. فدا ان شاءالله هعمل عنه تدوينة مستقلة اشرح فيها ازاي نستخدم الأبليكيشن الرائع والعظيم My FitnessPal وهنلاقيه موجود على  Google Play و App Store

الناس اللي راحت تجيب شيبسي ونوتيلا فوق يا ريت يعرفوا ان اللي أكلوه بط بط هيطلع على فخادهم وز وز.. دي مقولة مأثورة لأستاذنا سفاح الفات

لينك للتدوينة الأولى: "افهم أكلك - تغذية 101"

إفهم أكلك - تغذية 101

هنتكلم شوية عن التغذية.. هنخلي دي التدوينة الأولى ان  شاءالله وبعد كدا ممكن نكتب حاجات تانية وممكن اطنش وخلاص عادي بتحصل

سلسلة التدوينات دي ان شاءالله مقدر ليها تكون مكتوبة للناس الغير مهتمة أساسا بالدايت والتغذية السليمة والصحة الغذائية.. عشان يهتموا.. الناس المهتمة بالدايت أصلا هتكون غالبا عارفة الكلام دا.. عشان كدا ان شاءالله هراعي فيها تكون مكتوبة بطريقة بسيطة 

--------------------------------------------------

مبدئيا الأكل لما بنيجي نحلله بننظر ليه من ناحيتين:

CALORIES & MACROS

الكلام دا للي عايز يخس واللي عايز يتخن واللي مش عايز أي حاجة.. أي حد عايز يفهم عموما

ال CALORIES هي مقدار الطاقة اللي بتطلع من الأكل اللي بتاكله.. أي أكل.. أي حاجة بتدخل بقك حتى كوباية الشاي ليها كالوريز.. لو انت مهتم ببرنامج تغذية سواء تخسيس او زيادة وزن او حتى بناء عضلي لازم تكون عارف مقدار الطاقة في اكلك عشان تبقى عارف انت ماشي ازاي

الموضوع ببساطة ان الجسم ليه احتياجات يومية من الطاقة اللي هي TDEE>>> TOTAL DAILY BODY EXPENDTURE

الاحتياجات دي بتختلف من شخص للتاني حسب السن والنوع والوزن.. عموما في الرجالة بتتراوح من 2200-2500 للوزن المثالى و الستات 1600-1900 للوزن المثالي

ببساطة كدا لو دخلت للجسم أقل من سعرات ثبات وزنك الحالي هتخس من كل مكونات الجسم, يعني هتخس دهون و عضلات و ماية وفي بعض أنظمة الدايت السيئة هتخسر من كثافة العظام كمان.. لو دخلت أكتر هتتخن.. والزيادة في الأغلب هتكون دهون طالما مش بتراقب أكلك ومش بتلعب رياضة

بالنسبة لل MACROS ..

الأكل بينقسم ل 3 مكونات رئيسية.. بروتين ونشويات و دهون.. ومكونات فرعية اللي هي المعادن والفيتامينات

اللي يهمك في اي نظام غذائي سليم هو انك تراقب الماكروز.. انت محتاج ل 50% من أكلك نشويات و 30% دهون و 20% بروتين.. النسب دي بتختلف في بعض الأنظمة زي مثلا الكيتو (نظام رديء جدا في رأيي) او في حالة بناء العضلات للرياضيين

المهم ان دي النسب اللي جسمك محتاجها من كل مكون

المكونات دي بقى بتنقسم كل مصادرها لمصادر صحية ومصادر غير صحية.. ودي جزئية مهمة للكل بقى حتى اللي مش ماشي على نظام تغذية

حاول تنتقي المصادر الصحية لمكونات الأكل بتاعك.. زي ايه؟

* النشويات

 - نشويات صحية.. هي النشويات المعقدة ودي زي نشويات الحبوب الكاملة زي الشوفان والشيا والكينوا و الرز البني والبقوليات.. والنشويات الموجودة في الخضار والفاكهة بأنواعهم

- نشويات غير صحية.. أولهم وأخطرهم وأسوأهم.. السكر.. الناس الحلوة اللي بتحلي كوباية الشاي بكيس سكر والعصير بربع طن سكر.. دا اخطر حاجة ممكن تدخلها جسمك.. بتبوظ كل حاجة جوا.. كل اعضاء الجسم بيضربها السكر والأخطر انه بيبوظ نظام الـ METABOLISM بتاعك ويعلى الانسولين ويمشي الجسم في اتجاه تخزين الدهون.. موضوع الإنسولين دا مهم جدا ولا يمكن اهماله لأنه عنصر أساسي في مشاكل السمنة

الكلام دا بينطبق على اي سكر بيدخل جسمك سواء كان ابيض او احمر او حتى سكر الفاكهة.. لكن طبعا هيظل سكر الفاكهة أفضل من السكر العادي لكن لازم تبقى كمياته محسوبة في حدود ثمرتين يوميا ولما تبقى متمرس تحدد كل نوع فاكهة فيه قد ايه سكر وتحدد استهلاكك منها.. السكر أخطر حاجة على الإطلاق

النشويات البسيطة.. اللي هي الدقيق بأنواعه أبيض..اسمر.. اخضر.. والحاجات اللي داخل فيها الدقيق زي المعجنات والمكرونة والعيش(كلهم معجنات على فكرة بس عشان محدش يعمل عبيط )

* الدهون

- دهون صحية.. دي زي الزبدة والسمنة البلدي وزيت الزيتون وزيت الكتان وزيت جوز الهند وزيت الكانولا.. واي زيت طبيعي مش مهدرج.. يعني حبوب معصورة من غير تصنيع.. وداخل كمان الدهون اللي في الألبان.. المهم في كل دا مراقبة الكميات والسعرات طبعا

- الدهون الغير صحية.. دي بقى اي دهون مصنعة .. او مهدرجة زي السمنة العادية والزيوت كلها ما عدا الزيوت الطبيعية والدهون اللي في اللحمة وطبعا كل الدهون اللي داخلة في ال JUNK FOOD

* البروتين:

البروتين مفيهوش صحي وغير صحي.. هو كله بروتين.. لكن فيه بروتين جودته عالية وغني بالأحماض الأمينية المختلفة وبروتينات قليلة الجودة والأحماض الأمينية

طبعا أفضل انواع البروتين على الاطلاق هي البروتينات البحرية.. الأسماك.. يليها البروتينات الحيوانية.. ألبان ومنتجاتها و لحوم ثم البروتينات النباتية

برده هنركز على السعرات في حالة الدايت سواء دايت التخسيس او دايت زيادة الوزن

-------------------

الكلام عن التغذية مش بيخلص ومش هيخلص ونصيحة مخلصة الكل يهتم على قدر ما يستطيع انه يتعلم ازاي ياكل

هختم بشوية معلومات مغلوطة عن دايت خسارة الوزن:

   1. الأكل الفلاني ممنوع في الدايت.. مفيش أكل ممنوع في الدايت باستثناء السكر والأكل الغير صحي ودول ممنوعين للدايت والغير دايت أصلا

   2. الدايت حرمان.. بالعكس.. لازم تاكل عشان تخس.. من غير ما تاكل مش هتحرق كويس وجسمك مش هيشتغل كويس.. الدايت ماهو الا انك متبطلش أكل.. الفكرة هتاكل ايه و ازاي

   3. الأكل بالليل بيتخن.. لو أكلت وانت نايم مش هتتخن طالما في حدود سعراتك.. الوزن = سعرات.. اعمل حساباتك واعمل فرق سعرات بالسالب CALORIE DEFICIT وهتخس وكل براحتك اي وقت

   4. الفاكهة مش بتتخن.. بص حضرتك بالهنا والشفا كل يوم اضربلك 2 كيلو موز وبطيختين وبعد سنة هيحطوك جنب سيد قشطة في جنينة الحيوانات.. الوزن = سعرات ايا كان مصدرها

   5. الحديد بيبوظ الجسم..

في الواقع مفيش حاجة بتزبط الجسم غير تمرينات المقاومة باوزان  RESISTANCEو أفضل كمان من التمارين الهوائية CARDIO لكن الاتنين مهمين طبعا ومن غير ما ترفع أثقال جسمك مش هيتزبط حتى لو خسيت

فضلا عن انه كل ما تزود الكتلة العضلية في جسمك كل ما هترفع معدلات حرق الجسم لأن العضلات بتستهلك طاقة عالية وطبعا بتديك اداء أفضل للجسم و sexy look في الساحل أو حتى في ترعة المحمودية

   6. هعمل دايت الزبادي.. دايت الشاي بلمون.. دايت الكمون .. دايت أم سحلول..

بص كل دى زبالة مش أنظمة وملهاش وصف تاني غير انها زبالة.. فارميها في الزبالة وخلاص

واي حد يقولك على نظام غذائي فيه اعتماد على نوع واحد من الأكل بوسه وحطه جنب الحيط وسيبه هناك وامشي..

لازم تدخل لجسمك كل العناصر وتفتكر ان الوزن = كالوريز

لو أكلت 3000 كالوري زبادي بلمون هتتخن مش هتخس.. ولو أكلت 1500 كالوري بيتزا هتخس مش هتتخن..

الوزن  = CALORIES

أخيرا أحب أشكر الرائع إسلام ادريس سفاح الفات على انه بيعلمنا تغذية صح وبدعو الناس كلها تشترك في صفحته "سفاح الفات" وتقرا كتابه "سفاح الفات" برده

* دا لينك للتدوينة التانية في السلسلة, هنتكلم فيه عن فرق السعرات أو ال CALORIE DEFICIT.. "فرق السعرات CALORIE DEFICIT - تغذية 102"

الدكاترة البنات والجلدية

مبدأيا البوست دي مش هتعجب اخواتنا البنات (:3

البنت من دول تنزل دح طول الثانوية العامة ولا دودة البرتقان في شجر الجوافة لحد ما آخر السنة تجيب المجموع الفضائي وتدخل كلية طب.. (1)

نفس البنت من دول تفضل طول الست سنين تحرت في الكتب وتدح برده زي الجراد في محصول الغلة لحد ما على آخر الست سنين تكون جايبة عدد امتيازات اكتر من عدد المواد نفسه.. (2)

نفس ذات البنت بعد مواسم الدح الطويلة اللي فاتت دي تطلع تقولك انها عايزة تشتغل جلدية.. (3)

نفس ذات البنت كانت السبب في ان تنسيق كلية طب يبقى ب 99% بعد ما كان 70% ايام ما كانوا البنات بيتجوزوا ويقعدوا في البيت

ونفس ذات البنت كانت السبب في ان ولد مجتهد جايب في الثانوية 73.8% ميدخلش طب بسبب ارتفاع التنسيق.. (4)

يبقى اذا من (1) و (2) و (3) و (4) نلاقي ان البنات كانوا سبب مباشر في تدمير حياة الولاد المستقبلية وكل دا عشان يشتغلوا في الآخر لا مؤاخذة.. جلدية (:3 (:3 (5)

طيب ليه البنات بيجروا على الجلدية؟

لأنها بداية ملهاش علاقة بالطب من ناحية ومن ناحية تانية شغلها مفيهوش نبطشيات ولا تعب وميتطلبش حتى انها تكون عارفة حاجة اكتر من اسامي الكريمات اللي بتستخدمها بالتبادل يمكن واحد فيهم ينفع عملا بقاعدة: عك وليس كله كويس.

اما عن السبب التاني والأهم اللي بيخليهم عايزين يشتغلوا جلدية ان كل واحدة فيهم عايزة تطلع أمينة شلباية اللي جواها..

الجلدية دلوقت انتقلت من علاج الامراض الجلدية الى ما يسمى بالبادي كير

دكتورة الجلدية دلوقت شغلها بقى عبارة عن ازالة شعر زائد على تفتيح لون بشرة على ازالة هالات سودة حول العين والفم وصوباع الرجل اليمين..

ودي حاجات للمتأمل مش محتاجة على الإطلاق أدني قدر من الدراسة الطبية وممكن لو أخدت قورص مكثف في مجلة "سيدتي" او اتفرجت كل يوم 37 ساعة على قناة "هي" تبقى كفاءة في مدة شهر (6)

يبقى اذا من (5) و (6) نكتشف انه لازم يصدر قرار بمنع البنات من دخول كلية طب من الأساس.. سيبونا ناكل عيش بقى

عيادات الجلدية قريبا اعلاناتها هتكون كدا:

"دكتورة/ ناني هيثم تامر

د. شهادة معتمدة من كوافير سوسو بالمعادي

تفتيح البشرة وازالة الشعر الزائد وتقشير البشرة بالليزر

يوجد لدينا قسم خاص للعرائس مجهز بمجموعة من افضل طرح الزفاف

يوجد لدينا قسم خاص بالمحجبات

العيادة مستعدة لجميع انواع المناسبات واعياد الميلاد

الباكدج تشمل سبع صور مجانية هدية مع المصور الفنانtatta7 PHOTOGRAPHY عند الشجرة اللي جنب ترعة المحمودية

هدايا ولعب للأطفال"

1st line of ttt

as a physician, you have to deal with the worst kind of human emotion.. fear.

People don’t come to you because they are sick, they come to you because they are scared. When someone starts having an unusual unpleasant feeling, they go like “what the hell is wrong is with me”, they panic and fear it might be something serious and that’s when they rush to your workplace.

fear is your biggest enemy as a doctor, not the disease, you can handle the disease by opening your book or surfing the internet, but no book will teach you how to conquer your patient’s fear which you really need to do to reach them and be able to conquer the disease itself..

as a doctor, the patient thinks you have magical powers and you know all that it takes to take their pain away. well, of course you don’t have any of those powers and as it happens, so many times you may have totally no idea what you should do and even need to consult one of your superiors no matter how old or experienced you are, your patient doesn’t have to find out that, you are their biggest hope and they should keep that hope alive.. so, just keep that in mind.

since i got to understand and appreciate the value of conquering your patient’s fear and the way they look at you as their therapist, i started thinking of ways that could help in taking that fear away, i could think of some things and they work..

1. FAITH.. it is an important tool to use, especially in a place like the middle east where almost all citizens who do believe that their God can take their pain away and only Him can heal them. this may sound nonsense to some, but you can’t ever ignore people’s faith, especially when you can use that to help your patient get better or at least accept their disease. so, don’t underestimate that.

2. STATISTICS.. you can use this in certain cases that really-needs reassurance when you’re lucky enough to be dealing with a serious illness that medical statistics say it is curable.. leukemia in children for example, the 5-year-survival rates has increased up to 90% in children with ALL with real chances of complete cure afterwards for those who have survived.. you can’t neglect such a great piece of info when a mother of a leukemic patient comes to you seeking a ray of hope for her diseased child

3. HIDING THE TRUTH.. sometimes hiding the true nature f your patient’s illness can help, this is still controversy, some believe that the patient have the right to know every detail about their disease,  their options and chances.. and this is true of course, but sometimes knowing the truth can cause more harm to your patient than benifits, like when you’re dealing with an incurable fatal disease like cancer, the patient won’t get much benefit from knowing he’s probably goin’ to die soon, I think it is better to hide it from them, especially if old and there’s someone to take care of them like children or siblings.. it’s enough to tell their caregiver to get them in the picture and make them understand their role in the therapy.. too bad you can’t hold the truth for so long..

these are just tries and what’s really important is the point behind it all which i honestly hope all my colleagues in the medical field will get, especially physicians who have to deal with chronic illnesses Vs surgeons who usually provide an absolute end to the complaint.