ريفيو عن فيلم JOKER 2019

SPOILER ALERT

عشان الناس اللي بتتقمص

مبدئيا وقبل اي شيء احب اوضح اني من اشد معجبين HEATH LEDGER واني مش big fan لأ انا ENORMOUSLY GIANT fan وهو بالنسبالي أفضل ممثل في التاريخ وعندي قايمة أفلامه الكاملة من أول two hands اللي محدش يعرفه لأنه فيلم استرالي لحد the imaginarium of doctor pernasus اللي مات قبل ما يكمله وجابوا اكتر من ممثل يكملوا المشاهد بتاعته كتكريم ليه.. وكمان أفضل فيلم بالنسبالي على الإطلاق هو a knight’s tale اللي هو  guess what??  بطولته برده.. وبالتالي فأي مقارنة بينه وبين أي حد حتى لو معايا انا شخصيا فأنا هتحيز وهنحاز لصفه تماما

عشان كدا أنا ممتن جدا لصناع فيلم Joker انهم ريحونا من المعضلة دي وقدموا نسخة من الجوكر مختلفة عن نسخة the dark knight فلهم جزيل الشكر..  ودا بالمناسبة يعني ان المقال دا مش هيحتوي مقارنة بين الفيلمين.. فقط نقطة او اتنين مش أكتر.

---------------------------

في حاجة مهمة كانت بتؤرقني انا شخصيا.. وهي اسم بطل الفيلم.. اول مرة شفته كان في Gladiator وكان عامل دور ممتاز يخليك تكره عيلته كلها وبالتالي مهتميتش ادور على اسمه وكنت متصالح مع نفسي وانا بقول عليه "خواكين فينيكس" على اعتبار انه من اصول اسبانية ودي برده حقيقة انا منحتهاله من عندي مدورتش عليها ولا حاجة

لحد ما شفت فيلم الجوكر وبصراحة حسيت انه يستحق ان اسمه يكون well-known بقى وروحت شوفت الاجانب بينطقوه ازاي ولقيته؟؟ لأ.. مش خواكين.. ومش جاكوين.. بينطقوه "واكين" /wak-een/ .. ودي نقطة مهمة قبل ما ندخل في الفيلم

---------------------------

الفيلم اسمه "Joker" بطولة واكين فينيكس وكتابة واخراج تود فيليبس.. مدته حوالي ساعتين تقريبا.. وبديهي انه بيتناول قصة الشخصية اللي بيحمل اسمها.

شخصية الجوكر اتقدمت في السينما لحد دلوقت 5 مرات.. اول مرة كان بطولة سيزر روميرو سنة 1986 تاني مرة كان العظيم جاك نيكيلسون سنة 1989 وتالت مرة كان الدور الاستثنائي اللي قام بيه هيث ليدجر 2008 وبعدين حاجة كدا ملهاش معنى قدمها جاريد ليتو سنة 2016 واخيرا الدور الحالي في 2019.

اللافت ان الخمس شخصيات اتقدموا في 4 مرات بنفس الطريقة من حيث سمات الشخصية.. والمرة الوحيدة اللي اختلفت شوية كانت guess who??  صح.. هيث ليدجر

-         الفيلم بيتناول قصة الجوكر الانسانية وال background بتاعته كشخص قبل ما يتحول ل villain والظروف اللي اطلقت الجنون الكامن جواه ودي حاجة كانت جميلة لأنها أول مرة تنطرح.. في كل مرة كان الجوكر بيتقدم على انه عدو ل باتمان وبس من غير ما نعرف جه منين.. الفيلم هنا قدم القصة دي

-    واكين فينيكس أبدع وأجاد جدا جدا في الدور وقدم شخصية ال PSYCHOTIC PATIENT بامتياز الحقيقة وعمل كل اللي مفروض يتعمل في الدور دا ومش شايف انه قصر في شيء ودا امتياز يحسب لامكانياته كممثل وذكاء يحسب للكاتب والمخرج (اللي هما نفس الشخص) اللي بعد بيه عن منطقة جوكر هيث ليدجر لأن المنافسة هنا قطعا مستحيلة مش بس صعبة والفشل الذريع اللي واجه جاريد ليتو علمهم درس ان صعب تحاول تخبط في جوكر 2008.. وبالتالي هو بعد عن الجوكر ال PSYCHOPATH  وقدم الجوكر ال PSYCHOTIC.

الجوكر اللي هيث قدمه كان جوكر الجريمة والعنف والشخصية العبقرية بجنون في الإجرام واحداث الفوضى.. ودا PSYCHOPATH.. أما الجوكر اللي بيقدمه واكين هنا فهو قصة الإنسان آرثر اللي كان عنده اضطراب نفسي بسبب التنشئة الغير سوية واللي حولته لشخص مجنون بدون التطرق لجرايم منظمة ودا PSYCHOTIC.. حتى القتل اللي اتعمل في الفيلم كان قتل انتقامي جنوني مش قتل اجرامي مخطط ومبتدع زي جوكر 2008.

-    دا برده بياخدنا لنقطة مهمة وهي ان الفيلم مش بيقدم جرعة اكشن وادرينالين عالية.. هو فيلم هادي نسبيا لأنه بيحكي قصة حياة الشخصية.. مش فيلم اثارة زي عادة شخصية الجوكر ما بتتقدم.. لكن مع ذلك ف الفيلم مش ممل اطلاقا ومحسيتش بالزهق وانا بتفرج.

-    مشاهد القتل في الفيلم معمولة بجودة وحرفية عالية جدا وفيها دموية شديدة وهي مش مشاهد كتير لكن معمولة كويس بصراحة وهيكون في مشكلة للناس اللي بتخاف من القتل والدم.

-    الكاتب هنا طرح شخصية الجوكر أقرب للشخصية اللي قدمها جاك نيكيلسون في batman begins .. تقريبا نفس سمات الشخصية.. نفس الأسلوب في الرقص وحركات الجسم و الضحكة (هيث كان بيضحك بشكل مختلف على فكرة ودا مش تحيز الأفلام موجودة).. دا مش مأخذ على الفيلم ولا واكين هو بيقدم الصورة النمطية عن الجوكر ودا كان طبيعي وعمله بشكل ممتاز جدا والجميل فيه انه كان أداء فيه لمحة اكتئاب مسيطرة على كل حركاته بعكس ال euphoria   اللي كانت موجودة في أداء جاك نيكيلسون وطبعا الاختلاف دا لأن واكين هنا بيعرض جوانب وخلفية الشخصية وقت تكوينها اما جاك فكان بيعرض الشخصية بعد ما اتكونت ووصلت لذروتها.

-    موسيقى Hildur Guonadottir كانت من أبرز عناصر الفيلم.. حقيقي كانت مميزة ومناسبة جدا سواء من حيث ال tone أو استخدام آلات النفخ ك theme music واللي كانت مناسبة جدا لمشاعر الحزن والكتئاب الموجودة في الشخصية.. انا استمتعت بيها جدا

-    ظهور روبيرت دينيرو في الفيلم كان لطيف بصراحة وعمل دوره كالعادة بامتياز رغم اني مش من الفانز بتوعه بس لعب الدور بحرفية شديدة وحسيت اني بتفرج على دونالد ترامب المهرج التليفزيوني مش الرئيس الأمريكي الفشيخ.

اما عن المآخذ على الفيلم فمن وجهة نظري تتلخص في الآتي:

-    الكتابة كانت محتاجة تدي عمق للأحداث وابعاد الشخصية أكتر من كدا.. في فترات كنت بحس المشهد محتاج كام دقيقة زيادة عشان تعيش الحالة بتاعته زي مثلا مشهد المهرجين في القطر و مشهد الفوضى في جوثام في النهاية كان يستحق اكتر من كدا .. الكتابة كانت محتاجة تنقيح شوية والفيلم كان محتاج يمكن نص ساعة كمان

-    اما المأخذ الأهم في وجهة نظري واللي هو خطأ برده في الكتابة.. فكان الربط اللي حاول يعمله الكاتب مع شخصية الجوكر في فيلم the dark knight.. مشهد قتل توماس وين و زوجته في آخر الفيلم في احداث الشغب بتاعت جوثام..

على كلام الفيلم دا الاحداث دي حصلت والجوكر كان شخص ناضج كبير في حين بروس وين اللي هو هيبقى باتمان كان لسة طفل.. فلو افترضنا ان الجوكر هيفضل في اركام 20 سنة مثلا على ما بروس يكبر.. هيخرج وهو too old to perform يعني.. لو كان عايز يعمل الربطة دي يبقى كان مفروض يجيب ممثل للجوكر صغير في السن.. ودا صعب طبعا.. فانا شايف ان الربطة كانت غير موفقة بالمرة من وجهة نظري حتى مع اعتبار الرمزية اللي فيها بان ابو باتمان مات بسبب الفوضى اللي خلقها الجوكر.. لأ.. مظبطتش

-----------------------------

دي كدا كانت ابرز الحاجات اللي حبيت اقولها عن الفيلم..

اجمالا هو فيلم كويس والبطل بتاعه ابدع جدا في الدور وفيلم مش ممل طبعا.. لكن.. ودا بالنسبالي انا يعني..

انا بشوف the dark knight حوالي 10 مرات في السنة من وقت ما اتعمل لحد دلوقت.. الفيلم دا اعتقد ممكن اشوفه مرة او مرتين كمان بس مش اكتر من كدا.. مش لأنه وحش هو قطعا مش وحش.. بس هو بيقدم جوكر مختلف عن الجوكر اللي انا مرتبط بيه.. او ربما ودا الأدق ان هيث ليدجر كان بيقدم جوكر مختلف عن الجوكر اللي اتكتب في كل الافلام التانية

الحياة مش بلاتوه

من سنة كدا تقريبا كنت مع قريب ليا صادفته بعض الظروف النفسية السيئة المصاحبة للامتحانات في الثانوية العامة ومدخلش بعض الامتحانات في سنتها.. ولأننا عائلة طبية بحتة فاستقر الرأي اني اخده لطبيب نفسي كفء عشان يحصل على الدعم اللي محتاده بشكل سليم.. وفعلا روحت معاه في أول زيارة

انا فاكر كويس يومها الجزء دا من الحوار:

-         الدكتور: انت ايه مشكلتك؟

-         الولد: مدخلتش الامتحانات وضيعت سنة من عمري.

-         الدكتور: وايه السنة في عمرك؟ سنة واحدة من عمر كامل.. فين الخسارة؟

--------------------------------------------------------------------------

في الوقت دا انا كنت بمر ب transform  كبير في حياتي بخصوص موضوع الدايت اللي بعد كدا اكتشفت ان الرحلة دي غيرت ال mindset بتاعتي بشكل جذري وخلتني انظر للحياة والأمور والمواقف المختلفة بشكل مختلف

وبعد الأحداث دي بفترة بسيطة جدا مريت بفترة من اصعب فترات حياتي وأحداث هتفضل معلمة فيا لحد آخر يوم في حياتي وأعتقد أثرها هيفضل معايا مطبوع على عظامي في القبر من شدتها..

بره دي كانت من الحاجات اللي خلتني بالmentality  الحالية وال mindset اللي انا عايش بيهم دلوقت..

--------------------------------------------------------------------------

انهارده جالي خبر مش لطيف وبالنسبة للبعض يعتبر كارثة وازمة كبيرة.. وطبعا انا upset to death بس مع ذلك انا قررت اني هبص للموضوع في اطاره واديله حجمه فقط

لقيت ان الموضوع دا يتحط في قايمة الجوانب السلبية لحياتي في الفترة دي.. او الاحداث السيئة يعني.. وهو وان كان جاي في وقت معنديش فيه مكان لحزن او اكتئاب أكتر من الموجودين.. الا انه الحمدلله على كل حال يعني

لما فكرت قلت ان دا حدث واحد سيء.. مش حدث هين طبعا لكنه حدث سيء.. وفي اللي ممكن يتعمل بخصوصه.. يبقى اذا حجم الخسارة منه مش عظيم أو كارثي ومش نهاية الكون ولا آخر الحياة.. it’s just another chapter in life

من أهم الحاجات اللي استفدتها من ال transform اللي ربنا أكرمني وانجزته في شكلي وجسمي اني ادركت وشوفت ازاي الحياة دي ups & downs وان الواحد مش بيتنقل من نقطة لنقطة في خط مستقيم.. بالعكس.. لازم بيمشي ويقع ويقف ويقع تاني ويقف تاني.. الفكرة بس انه يكون حريص ان  اخر فصل في الرواية يكون وقوف مش وقوع

في الدايت كانت بتيجي أيام بلتزم جدا وايام بخربها بغباء وارجع بعدها التزم وهوب يالا بافالو وبعدين التزم.. الكوكتيل دا نتج عنه اني اتحولت من chubby and saggy  لشخص تاني fit and muscular

فكذلك الحياة.. بتقع وتقوم لحد ما توصل واي وقعة مهما كانت فهي أضعف من انها تكسرك حتما.. واي وقعة مهما كانت في طريقة للوقوف بعدها..

المطلوب بس يكون عندك ال mindset وال mentality المطلوبين.. وقبل كل شيء.. توفيق ربنا طبعا

عفريت العجلة

تحذير: هذا البوست يحتوي على hate speech وغير مناسب لمحبي مدينة دمنهور مع التأكيد على عدم الانتقاص من الاشخاص.

----------------------------

مصر فيها مدينة عايزة الحرق اسمها دمنهور.. كل ذكرياتي معاها عايزة الحرق

من يومين كدا كنت هناك للأسف الشديد يعني.. وانا راجع حصل موقف يتماشى مع ذكريات البلد عندي انا هحكيه بس مش عشان الموقف لكن عشان جزء من تفاصيله يستحق الوقوف أمامه.. هعرضه على صورة حوار

كنت راجع بالليل واكلت حفرة محترمة كدا فيما يبدو انها تنت الجنط بتاع فردة كاوتش والعجلة طبعا قعدت تسرب الهوا لحد ما فضت خالص وما أخدتش بالي لأنها عجلة خلفية مش أمامية في عربية جر أمامي.. المهم يعني

الكلام دا حصل تقريبا اول ما طلعت من دمنهور وفضلت طول الطريق ماشي بالعجلة فاضية والحياة جميلة وزي الفل

وبعدين لما قربت على رشيد واحد راكب موتوسيكل قاللي: "يا اوستاذ العجلة نايمة".. فطبعا انا ادركت انها نايمة من وقت الخبطة وقلت طيب انا داخل على منطقة فيها حوالي 4568 واحد بتوع كاوتش.. هبقى أقف عند اي حد يزبطها

عديت على أول اتنين لقيتهم قافلين قلت خلاص شكل الناس نامت لما اركن على جنب وأغير الكاوتش

ركنت في مكان ما أخدتش بالي انه ضلمة خالص.. ضلمة من غير اي نور حتى وللأسف الأرض بتاعته مش مزبوطة فيها حتت عالية وواطية..رفعت العربية على الكوريك وخلعت الفردة النايمة وجيت اركب الاستبن (مش مرسي ربنا ياخده..فردة الكاوتش الاستبن) لقيت ان الأرض عالية والكاوتش مش هيعدى.. ايموشن أحيه

طبعا جربت كل الطرق السلمية والعنيفة ومفيش فايدة وانا عارف انه مفيش فايدة.. المشكلة دلوقت ان العربية على 3 فرد يعني مش هينفع أنزلها وأزقها لمنطقة تانية.. طيب هتعمل ايه يا قرمط.. هتعمل ايه يا قرمط

فجأة.. سمعت صوت بيقول: "عايز مساعدة؟"

غالبا أول مرة ال عقلى طنش الصوت عشان أكتر حاجتين بخاف منهم هما الضلمة والعفاريت وانا واقف في حتة مفيهاش أي نور من اي نوع غير نور الانتظار بتاع عربيتي ولو في عربية معدية ولا حاجة.. وحتى ما ادركتش دا غير وقت ما سمعت الصوت

الصوت اتكرر تاني: "عايز مساعدة؟"

طبعا هنا بقى ما كانش ينفع اطنش.. بصيت حواليا اشوف الصوت جاي منين فوجئت بأني واقف لوحدي في الضلمة

- يا أستاذ

دمي نشف طبعا وأخدت بالي لأول مرة انه صوت أنثوي لشابة تحت العشرين غالبا

فضلت ابص حواليا

- أنا هنا أهو

بصيت واخدت بالي اني تقريبا راكن جنب سور من بوص وشجر بتاع بيت فيما يبدو والصوت جاي منه.. طبعا قلت بسم الله الرحمن الرحيم وانا منتظر القرون والديل والحاجات دي

أخيرا الحمدلله شوفت الصوت جاي منين وطلعت فيما يبدو بشر مش عفريت.. بنت تيجي 16 سنة كدا

- محتاج مساعدة؟

- لا شكرا الله يخليكي

- أناديلك بابا ولا اخويا ولا عمي؟

- لا الله يخليكي متشكر

- طيب براحتك

رجعت أشوف ههبب ايه في العربية وبعدين سمعتها بتقول:

- هو انا ممكن أكسر الإزاز دا؟

- نعم؟

- ممكن أكسر الإزاز بتاع العربية؟

فطبعا انا برده مش فاهم ولسة مش متأكد انها بني آدم ولا عفريت.. وكدا بقت الاحتمالات اتغيرت شوية وبقت انها تكون عفريت أو بني آدم أهبل

المهم.. بصيتلها وانا مش فاهم في ايه

- خير؟ ليه؟

- أصل عليه حاجة وحشة أوي!

بصيت على الازاز مش شايف حاجة في الضلمة.. بصيتلها وانا مش شايفها أصلا كويس.. وبعدين افتكرت اني معلق عندي ميدالية فيها راس الشيطان

طبعا دمي نشف ان دي الحاجة اللي شافتها ومضايقاها وقلت يا سوادك يا قرمط

- أصل في على الإزاز حاجة وحشة أوي.. الشعار

- نعم؟

- الشعار دا وحش أوي

أخدت بالي انها قصدها على شعار الزمالك اللي لازقه على الإزاز بتاع العربية

هنا بقى اتأكدت انها بني آدم لأن مفيش عفريت أهبل

- يا ستي هو انا في ايه وانتي في ايه.. ادخلي.. ادخلي جوا بيتكم

وبعد جرعة الأدرينالين المهولة دي نزلت العربية من على الكريك وتقريبا شيلتها مكان العجلة الرابعة ورجعتها ورا شوية ورفعتها

جيت أركب الكاوتش.. لقيت لسة الأرض عالية (فاصل من السباب)

بعدين كررت موضوع اني أحركها.. ولك ان تتخيل اني برفعها وبزقها وبوقفها كل دا لوحدي.. انا والادرينالين

وبعدين الحمدلله وصلت لمنطقة مناسبة.. رفعت العربية تاني.. غيرت الكاوتش اللي أخيرا ركب بعد ما كنت اتأخرت ساعة على ميعادي..

طبعا فضلت طول الوقت بحاول أجمع شكل سواق الموتوسيكل في دماغي عشان لو قابلته اقتله.. مانا جاي من دمنهور وأم الكاوتش نايم حبكت يعني تقولي أصحيه!

نزلت العربية من على الكوريك.. هوب.. العجلة فرشت على الأرض.. طبعا أنا مش فاهم.. مستحيل يكون الاستبن فاضي مش بتحصل.. ومش هيكون فاضي خالص غير لو مخروم.. بصيت على العجلة اللي انا خلعتها وبعدين أخدت بالي

انا ركبت فردة الكاوتش النايمة تاني

End Of Text/embolism

أسطورة البحث العلمي في مصر

الريس انهارده كان بيتكلم في مؤتمر الشباب العربي الأفريقي على نقطة ان البحث العلمي محتاج منظومة كاملة ومتكاملة.

الحقيقة دي نقطة بديهية يعني هو مجابش جديد.. بس تعليقا على كلامه وبما اني حاليا تصنيفي المجتمعي باحث علمي على قوة دراسة الماجستير في إحدى الجامعات المصرية العريقة؛ فأحب يعني اقول حاجة صغيرة كدا

هو بصراحة عيب نتكلم عن حاجة زي البحث العلمي في مصر.. ايوة عيب صدقني

ليه بقى؟

لا مش عشان معندناش عقول.. مفيش اكتر منهم

ولا عشان معندناش امكانيات.. مخازن كل المؤسسات في مصر مليانة خير مقفول عليه ومتسجل في العهدة واتدفن من كتر التراب

ولا عشان مفيش انفاق على البحث العلمي.. الحقيقة دا سبب قوي جدا لكن في سبب اعظم منه

حضرتك احنا في مصر ما عندناش حاجة اسمها "قواعد بيانات"

البتاعة اللي هي بتبقى كشف على الكيمبيوطر دي وفيه اسامي البني آدمين واسم كل واحد ملحق بيه بياناته كاملة.. البتاعة دي معندناش منها في مصر

مازلت لما بتروح اي مصلحة تلاقيه يقولك هتروح تجيب الورقة الفلانية من المديرية.. وتختم من الوزارة وتعدي على اي اتنين موظفين من احد الكواكب المجاورة يخلصولك الحتة الصغيرة اللي تحت الخط دي.. كل دا عشان تخلص حاجة واحدة لنفس ذات الإنسان اللي هو انت..

احنا مفيش عندنا قواعد بيانات للمواطنين..

في الواقع دا بيخرجنا من اطار مواطنين في دولة وبيخلينا مجموعة من الناس العشوائية تماما اللي محدش فيهم يعرف التاني ومحدش في البلد يعرفهم ولسبب ما لقوا نفسهم اتوجدوا في هذه البقعة من الكوكب!

هضربلك مثال صغير

دي حاليا السنة التالتة ليا في الماجستير وطول السنين دي كل ما اخلص ورقة في الدراسات العليا في الجامعة وهي جامعة عريقة بييجي الطلبة من العالم كله يدرسوا فيها (الأزهر) بتلاقي ان في كل مرة الموظف بيدور في نفس الملفات اللامتناهية في الحجم والعدد على نفس البيانات

تلاقيه جايب ملف كبيييييييير قد سور الصين كدا عشان يدور فيه على رقم التسجيل.. ومجموعة مهولة من الدوسيهات عشان يدور فيها انا دفعت المصاريف ولا لا.. و خمسين ستين كومة ورق بيدور فيهم على تاريخ امتحان معين وحاجة كدا آخر مسخرة

الموظفين دول بيبذلوا مجهود جبار فعلا في الولا حاجة.. مجهود مهول كان ممكن اختصاره في ثواني بكليك ماوس لو  الجامعة فيها قاعدة بيانات

قيس على كدا بقى في كل مرافق الدولة.. يمكن خارج نطاق الأجهزة الأمنية معندناش قواعد بيانات دا بفرض ان قواعدهم مكتملة اصلا ودا اشك فيه

قواعد البيانات دي.. لو لاحظت حضرتك اسمها "قواعد" مفردها "قاعدة" يعني أساس.. هي الأساس اللي هتقدر تبني عليه أي حاجة وكل حاجة ومن غيره متتكلمش في اي بطيخ بقى

فلو سمحت متكلمنيش عن بحث علمي والطالب عشان يخلص ورقة واحدة في الجامعة بيحتاج يوم او اكتر عشان بس يدور على اسمه.. دا لو لقاه اصلا (في ناس ورقها بيكون ضاع وسط المسخرة دي وبيضطروا يبدأوه من الأول وايصالات مصاريف بتضيع ويدفعوها تاني و زيطة)

المشكلة ان الموضوع اصلا مش صعب.. يعني هما بدأوا موضوع الحكومة الاليكترونية دي من ايام نظيف من يطلع ١٥ سنة مثلا.. يعني مفروض دلوقت يكون في قواعد بيانات كاملة متكاملة اعتمادا على الرقم القومي اللي هو لما اي موظف يدخل الرقم القومي في المصلحة اللي هو فيها يلاقي بيانات سيادتك قدامه.. على الأقل البيانات الأساسية + البيانات المتعلقة بالوزارة اللي المصلحة تابعة ليها.

-_-_-_--_-_-_-_-_-

- ماجستير ولا دكتوراة يا دكتور؟

- ماجستير

- طيب خد الملف دا بتاع الماجستير دور فيه على اسمك (ملف من سلالة العماليق) ولو ملقيتهوش خد الملفين دول بتوع الدكتوراة دور فيهم ساعات اسامي الماجستير بتيجي هنا اها.. اها.. اها ها ها هااااا

عن العداوة بين المجتمع المصري والأطباء ج. 3

في الجزء الأخير من التدوينة دي أحب أتكلم عن أثر الموقف العدائي من المجتمع دا على الطبيب وعلى المجتمع بالتبعية:

أولا.. انا كطبيب شاب في بداية حياتي العملية لما كل يوم اشوف الاحوال بتدهور واشوف زميل او زميلة بينضرب او يتهان لمجرد انه بيؤدي عمله او بيتسحب على النيابة والحبس بدون خطأ منه أو اشوف اعلامي طالع بيشحن الناس ضدي وزمايلي.. متوقع أثر دا في نفسي هيكون عامل ازاي؟

تفتكر هيكون عندي رغبة في الاستمرار في المهنة اللي بتهدد امني وسلامي النفسي والبدني وسلام وامن اسرتي؟

انا هرد عنك.. انا حقيقي غير راغب في العمل كطبيب مادمت داخل مصر.. واتمنى اما تغيير محل العمل او تغيير المهنة في حالة الاحتفاظ بمحل العمل

افاجأك؟

دا مش حالى انا بس.. دا حال الأطباء المصريين بالكامل من الصغير للكبير..

اثبات؟ نقابة الأطباء مقيد بيها 250 ألف طبيب منهم حوالي 70 ألف فقط (28%) بيعملوا في مصر حاليا والنسبة الباقية (72%) طفشوا برا البلد او ماتوا.. انت متخيل حجم الكارثة؟ زمانك قلت في داهية صح؟ ماشي

ثانيا.. الأطباء حاليا بقى همهم الأول أمانهم الشخصي.. ودا طبيعي لأني مش ههتم بيك على حساب نفسي.. مستحيل.. نتج عن دا ان الأطباء بدأوا في الهجرة من الدولة.. واللي مقدرش بدأوا في الهجرة من التخصصات الأكثر خطورة زي الجراحات والتخدير والرعاية المركزة وكله بيدور على تخصصات مفيهاش مشاكل زي الجلدية والتغذية مثلا.. قريبا مش هيكون في مصر جراحين ولا أطباء تخدير..

والأطباء اللى مازالوا بيعملوا في التخصصات دي صاروا اكثر انتقاءا للحالات وبيبعدوا عن الحالات اللي فيها خطورة.. وبالتالي المريض الحرج قريبا هيموت لأن محدش مستعد يضحي بنفسه عشان يعالجه..ودا أصلا لأنه كان خطأ من البداية ان يكون التصدي للحالة الخطرة للمريض بينتج عنه خطورة على الطبيب نفسه.. زمانك بتقول مش مشكلة صح؟ ماشي

طيب ايه أثر دا على المجتمع؟

تعالى كدا نفكر مين الخاسر في المعركة دي؟

الطبيب هيخسر ايه؟ في أسوأ الأحوال هيغير مهنته  او هيسافر مع احتفاظه بالقدرة على علاج نفسه وذويه.. في حين ان المجتمع هيفقد الميزة دي.. فعليا والله.. بتقول مش مشكلة هنجيب دكاترة بتفهم من برا صح؟

طيب خليني أفاجأك بان الدولة اللي مش مستعدة تصرف على الصحة مش هتجيبلك دكاترة من برا

وخليني افاجأك أكتر بان مفيش دكتور من برا هيرضى ييجي يشتغل في ظروف العمل بتاعت مصر دي وبمقابل  150 دولار شهري (أجر الطبيب المصري 2500ج).. مفيش صدقني.. الأطباء في  مجاهل أفريقيا الأفقر في العالم بيتقاضوا متوسط 2000-3000 دولار شهريا.. ودي مجاهل أفريقيا مش أوروبا ولا أمريكا ولا الخليج

طيب.. كل اللي فات دا ملفتش نظرك لخطورة الموقف.. عايزك تتخيل معايا الموقف الجاي دا وانا هختم بيه:

حضرتك راكب عربيتك مع اسرتك زوجتك وطفلين وفي سفر وربنا اراد انكم تعملوا حادثة.. ربنا يحفظنا جميعا يعني

روحتوا المستشفى زوجتك في حالة خطرة وطبيب العناية مش موجود لعدم وجود أطباء عناية.. ابنك محتاج جراحة عاجلة لايقاف نزيف داخلي والمستشفى مفيهاش طبيب تخدير ولا جراحة عامة.. واحد طفش برا البلد والتاني فتح محل ملابس حريمي.. وحضرتك واقف بتتفرج على المشهد دا وبتشوف ابنك ومراتك بيموتوا قدامك ومش قادر تعمل حاجة..

سلام

---------------------------------------------

الجزء الأول عن أسباب العداء بين المجتمع والطبيب.. هنا

الجزء الثاني عن بعض المفاهيم المنتشرة في المجتمع المصري عن الطبيب والتعليق عليها.. هنا 

عن العداوة بين المجتمع المصري والأطباء ج. 2

في الجزء دا من التدوينة أحب أرد على بعض التعليقات الشائعة اللي بيقولها الناس عن الأطباء وبيبرروا بيها كراهيتهم ليها:

1.      دول على قلبهم فلوس قد كدا.. الواحد فيهم في اليوم بيعمله (بيتحط بقى ارقام تتراوح بين 5000 و مليون حسب اللي بيهبد)

طيب معلش يعني.. هو ايه المشكلة؟ ايه المشكلة ان الطبيب يكون بيتكسب من عمله بغض النظر عن ان الكلام دا غير صحيح بالنسبة لأغلب الأطباء؟ يعني ايه العيب في ان الطبيب يكون بيتقضاى أجر عن عمله؟ انا لما اكون فاتح عيادة او شغال في مستشفى خاص انا مش فاتح جمعية خيرية دا محل كسب رزق وأكل عيش وطبيعي اني بقدم خدمة بأجر انا اللي احدده ولو يناسبك اهلا وسهلا مش مناسب ليك البدايل الكتير موجودة ومنها المجاني.. انما انك تطلب ان الطبيب يشتغل في الخاص بدون اجر عشان ميبقاش جزار فدا هطل وهبل وملهوش اسم تاني بصراحة

كل فئات المجتمع بتتكسب من عملها ودا الطبيعي والمكاسب بتتفاوت وفي مصر الطبيب مش في قمة هرم الاجور وفي كتير بيكسبوا اكتر حسب طبيعة العمل اللي بيقدموه.

فضلا عن ان الدخل دا مرتبط بعمل .. يعني الطبيب بيشتغل ساعات عمل أطول من الموظف العادي فطبيعي يكون دخله أكبر..دا ربح مرتبط بعمل ومش شايف في دا اي شيء غير منطقي يستدعي مناقشته اصلا

2.      الطب مهنة سامية والمفروض الدكتور يكون عنده رحمة.

يعني بصراحة اللي ابتلانا بالمقولة دي لو كانت نيته خير فربنا يسامحه بقى

الطب مهنة زيها زي أي مهنة مقدمها انسان عليه التزامات وطبيعي انه بيقدم "سلعة" بأجر مناسب ولو السلعة دي مش مربحة ليه مش هيقدمها.. بالزبط زي ما حضرتك تروح تطلب اي سلعة من سوبرماركت فيقولك صاحب المحل انه مبيجيبهاش عشان "مش ماشية" و "معليهاش طلب".. هو ليه هيشتغل في حاجة بتخسر؟ طيب ليه بقى عايز الطبيب يكون بيخسر هو كمان؟ دي بديهيات

اما السمو في مهنة الطب فخليني أفجأك وأقولك انه موجود في كل المهن التانية.. المعلم لو أخلص في عمله واهتم يخرج اجيال واعية فهو بيقوم بمهنة سامية.. رجل الأمن لو اهتم بالتأمين وان حضرتي وحضرتك ننام في امان فهو بيقوم بمهنة سامية.. ودا ودا بيتقاضوا اجور عن المهن دي رغم سموها..

كذلك الطبيب.. السمو في مهنتنا اننا نقدملك أفضل رعاية ممكنة ونكون حريصين على صحتك ومنبخلش في سبيل دا بأي جهد أو علم.. ودا ميتعارضش مع تقاضي الأجر المناسب عن دا وتقاضي الأجر مينتقصش من سمو المهنة دي

3.      الدكتور بيعالجه غلط/ بيعمله عملية غلط/ عايز يموته... الخ من كل انواع الهبد والهيستريا المجتمعية دي..

طيب قبل ما نتكلم بالعقل في كل هذا الكم من انعدام العقل.. هو ايه مصلحة الدكتور في ان المريض ما يتحسنش او يتأذي؟ فكر فيها كدا؟

خليني ادهشك واقولك ان الطبيب بيهمه ان المريض يتحسن أكتر من المريض نفسه.. ببساطة لأنها حاجة في وشه وسمعته واسمه.. انا يهمني انك تبقى كويس عشاني قبل ما يكون عشانك.. فاطمن انا حريص على مصلحتك بسبب حرصي على نفسي غير الامانة اللي بتحتم عليا الحرص عليك

نيجي بقى لنقطة مهمة.. انت على اي اساس حكمت ان الطبيب بيعالج غلط؟ مش عايز اقول الكلام بطريقة لا تليق.. بس يعني هو ببساطة مش شغلك واللي يحكم بدا لازم يكون طبيب مختص أكثر علما من الطبيب المعالج.. مش ام سناء ولا استاذ كامل بتاع المعاشات ولا حتى هايدي اللي في خدمة عملاء فودافون.. أي كلام من غير مختص هو مجرد هبد لا قيمة له وسبب وجود تأثير ليه هو الفوضى والغوغائية وانعدام القانون والنظام اللى مصى بتتمتع بيهم.. ليس الا

4.      الدكاترة الصغيرين دول مبيفهموش حاجة/ لسة ميعرفوش حاجة/ لسة مطلعوش من البيضة.. الخ

انا الحقيقة مش عارف اجيبهالك ازاي.. بس هو الانسان ربنا خلقه صغير وبعدين بيكبر.. لسة منزلش في السوق موديلات كبيرة جاهزة

ايوة شباب الأطباء أقل علما وخبرة من اساتذتهم.. دا طبيعي وفي العالم كله مش في مصر بس.. لكن في كل الأحوال الطبيب الشاب دا المحتوى العلمي اللي عنده في الطب لا يمكن مقارنته بالجهل اللي عند حضرتك في الطب.. تمام كما هو الحال بان المحتوى العلمي بتاعك في تكنولوجيا الاتصالات مثلا لا يمكن مقارنته بجهلى الشخصي(كاتب التدوينة) كطبيب في المجال دا.. دا مش شغلي ومعرفش فيه ومش ينفع افتي فيه

فضلا عن ان الاطباء الشباب هم القوة العاملة في جميع المستشفيات على مستوى العالم وبيشتغلوا تحت توجيه واشراف الأكبر منهم ودا اللي بيضمن ان سيادتك تتلقى خدمة طبية آمنة وبيضمن ان الطبيب دا في يوم يبقى كبير بما يكفي انه يعالج سيادتك منفردا بأمان.. محدش بيتولد كبير ومعرفش فين الاندهاش في كدا

--------------------------------------------------------------------------

انتهى الجزء التاني عن بعض المفاهيم البسيطة جدا المنتشرة في المجتمع المصري بخصوص الأطباء والتعليق عليها

الجزء الأول عن أسباب العداء المتنامي من المجتمع المصري تجاه الأطباء.. هنا

الجزء الثالث فيه كلمتين عن أثر العداء دا على الطبيب و  المجتمع .. هنا