أنا كمان كنت مخدوع زيك ! ! !

تنويه هام.. هذا المقال لا يعبر عن رأى كاتبه فى الدكتور.. فلله الحمد الكاتب يعرف من هو د. البرادعى من قبل بدء مشروع التغيير بسنوات ولكن المقصود من هذا المقال هو كتابة تعريف بسيط للدكتور بلغة الشارع يصل للأغلبية المتعلمة الغير مثقفة ف ىالشارع والتى لن تشغل بالها بالبحث على الحقيقة على الانترنت ولهذا وجب طرحه فى هذا الشكل.. وقد روعى فى المقال ان يكون صفحة واحدة A4  لتسهل طباعته وتوزيعه

--------------------------------------------------------------------------------- 

من كام شهر.. كان كل اللى كنت أعرفه عن د. محمد البرادعى انه عالم ذرة وانه عميل أمريكانى وانه ملحد وانه كان السبب الرئيسى فى دخول أمريكا العراق وانه عايز يلغى المادة التانية من الدستور وان بنته متجوزة واحد مسيحى.. طبعا كنت بقول واحد زى ده "مستحيل" يكون رئيس طول ما انا عايش فى البلد دى!

بس بعد الثورة ما قامت.. وقفت مع نفسى وقفة.. فكرت وقلت اذا كان الإعلام بتاع الرئيس السابق كان بيكدب علينا فى كل حاجة وبيقولنا ان البلد زى الفل وهى كلها فساد.. وايام الثورة كان بيقول علينا اننا عملاء من الخارج مع انى كنت فى التحرير ومحدش دفعلى مليم.. قلت لأ.. يبقى أكيد الناس دى كدبت علينا فى حاجات كتير.. كان لازم أدور وأعرف الحقيقة.. دخلت على النت.. وقعدت اقرا.. وكل ما اقرا أكتشف قد ايه انا كنت مخدوع ومضلل.. لغاية ما قلت طيب نعرف بقى مين محمد البرادعى اللى كان الإعلام ملهوش سيرة غير تشويه صورته عمال على بطال.. دورت على النت على "د. محمد البرادعى".. بمجرد ما قريت اللى مكتوب عنه.. اتصدمت واكتشفت.. انى كنت مخدوع زيك!!!

ساعتها قلت انى زى ما كنت بنشر أكاذيب عن الراجل ده لما كان مضحوك عليا.. يبقى لازم أصلح اللى عملته بعد ما عرفت مين هو محمد البرادعى.. تعالى اعرف معايا بقى مين هو محمد البرادعى بجد.. من غير كذب ولا نفاق ولا تضليل...

د. محمد البرادعى أصلا مش عالم فيزيا ولا ذرة.. ده أستاذ قانون دولى ودرس فى أكبر جامعات العالم.

د. محمد البرادعى قالولنا انه مش بتاع سياسة ولا حاجة.. مع ان شغلته كانت ادارة الوكالة الدولية للطاقة الذرية.. يعنى بيتعامل مع رؤساء 134 دولة.. يعنى سياسة خارجية عشرة على عشرة.. مش كده بس.. دا كمان كان مساعد وزير الخارجية اسماعيل فهمى ايام الساادت.. واستقال مع فهمى لأنهم رفضوا توقيع مصر اتفاقية "كامب ديفيد" لأنها كانت ظلم كبير لمصر وفلسطين. يعنى كده البرادعى راجل سياسة خارجية وداخلية فى المقام الأول.

د. محمد البرادعى مش معاه جنسية أمريكية ولا حاجة.. وما كانش اصلا عايش فى أمريكا.. البرادعى كان عايش فى النمسا مقر الشغل بتاعه.. وما رضيش ياخد جنسيتها لأنه بيعتز ببلده مصر وبيفخر بجنسيته الوحيدة.

د. محمد البرادعى ما كانش عايش طول عمره برا مصر ولا حاجة.. البرادعى خرج برا مصر وهو عنده 40 سنة وعاش برا 27 سنة قضاهم بين الدراسة والشغل.. يعنى قضى معظم عمره فى مصر.

د. محمد البرادعى مش عايز يلغى المادة التانية من الدستور ولا حاجة.. بالعكس هو صرح فى أكتر من لقاء انه ضد الغاء المادة التانية من الدستور أو حتى تعديلها! هو بيقول ان مصر دولة اسلامية وانه لا يجوز المساس بهوية الدولة!

د. محمد البرادعى قالوا عليه ان هو اللى دخل امريكا العراق.. بعد البحث والقراءة لقيت ان كل ده كدب فى كدب.. التقرير اللى قدمه البرادعى لمجلس الأمن كان بيقول فيه: "لم نجد اى ادلة على استئناف العراق لأنشطته النووية كما لم نجد أدلة على شراء العراق لأدوات انتاج السلاح النووى".. والجلسة متصورة وموجودة على النت وجات على التليفزيون فى أكتر من برنامج.. شوفتوا كانوا بيكدبوا علينا ازاى؟ طبعا اعلام مبارك كان لازم يتهم البرادعى بالتهمة دى عشان يداروا على فضيحت مبارك انه فتح قناة السويس للمراكب الأمريكية تروح تضرب العراق.

د. محمد البرادعى بنته ما طلعتش ملحدة ولا حاجة.. طلعت مسلمة زيى وزيك ومتجوزة راجل مسلم زيى وزيك والجواز ما كانش فى كنيسة برده زى ما قالوا.. الجواز كان فى السفارة المصرية فى النمسا  يونيو 2006.

د. محمد البرادعى زوجته مش ايرانية ولا حاجة.. حتى دى طلعت كدبة.. زوجته من مدينة فى محافظة البحيرة اسمها كفر الدوار!

طبعا بعد كل اللى اكتشفته وكل اللى لقيته بأدلة ووثائق ان الراجل ده من أشرف من انجبتهم مصر.. الراجل اللى العالم كله كرمه وأخد جايزة نوبل فى السلام وجوايز كتيرة فى حقوق الانسان ومحاربة الظلم والفقر فى العالم كله.. قلت يبقى لازم انى زى ما كنت جزء من حملة التضليل وتشويه صورته بالباطل.. أكون جزء من أكبر حملة لتعريف الناس بحقيقته.. ده حق البرادعى عليا زى ما ظلمته انى ارفع الظلم.. وكمان ده حق مصر.. لأن مصر محتاجه الراجل النضيف ده عشان نقدر نطلع بقى من التأخر اللى عشنا فيه 30 سنة ونحط مصر فى المكان اللى تستحقه.