بسم الله الرحمن الرحيم
من غير لك كتير ومقدمات مالهاش لازمة.. فى مشكلة كبيرة "بتتكون" دلوقت وللأسف احنا اللى بنصنعها.. الشباب مستعجل أوى على طلباته.. ومفكرين ان كل حاجة ممكن تتعمل بجرة قلم وللأسف رغم الوعى اللى أظهروه فى أيام الثورة الا ان نقص الخبرة السياسية ليه أثره على فترة ما بعد الثورة..
دلوقتى احنا حققنا المطلب الأساسى والأهم واللى يعتبر السبيل لتحقيق المطالب التانية وهو ابتعاد مبارك عن الحياة السياسية فى مصر بغير رجعة باذن الله.. ولسه لينا مطالب.. كتيييييييييييييييير.. مش بس المالطالب السبعة اللى اتعلقوا فى التحرير.. لأ فى مطالب كتير سواء كانت عامة أو فؤية.. طيب نحققها ازاى؟؟ هنا بقى لازم الصوت يهدى والعقل يشتغل عشان نقدر نوصل للى احنا عايزينه..
فى سبيل تحقيق المطالب لازم نخلى شوية مفاهيم موجودة فى عقلنا..
1) الجيش المصرى يستحق ان نثق فيه ثقة كبيرة جدا.. أولا لأنهم كما قال الرسول الكريم-صلى الله عليه وسلم- خير أجناد الأرض.. وثانيا لأنهم أثبتوا ده على مر الأيام ساء من بداية تاريخ الجيش اللى كل حروفه مكتوبه بصفحات من نور. او فى تعامله مع الثورة واللى فعلا أثبت فيها انه خير أجناد الأرض.. وأعتقد كلنا فاهمين الفرق بين احساسنا فى الشارع جنب ظابط الجيش و عسكرى الأمن المركزى!
2) الجيش مؤسسة عسكرية شغلها الأساسى مش السياسة ومش الادارة.. اى نعم الجيش فيه قوانين وفيه اداريين.. لكنهم اداريين عسكريين.. والادارة المدنية تختلف عن الادارة العسكرية زى ما كلنا فاهمين
- يبقى اذا الجيش دلوقت فى موقف جديد عليه ومغاير لطبيعة مهامه المعتاده.. وده بالطبع معناه انه مش شرط استجابته تقابل طموحاتنا تمام لكن بالتأكيد الجيش هيبذل أقصى ما فى وسعه لتحقيق مطالب الشعب بالشكل المرضى
3) المطالب اللى الشباب بيطرحوها اسمحولى ما ينفعش الجيش ينفذها من نفذه.. دى محتاجة حكومة كاملة تنعقد كلها وتنسق ما بينها لتنفيذ المطالب.. وبالتالى ما ينفعش الجيش يوعد بتنفيذ ما لا يمكل تنفيذه!
حاجة مثلا زى رفع الحد الأدنى للأجور.. ده مش ممكن أبدا انه يتم عن طريق الجيش لأن الجيش مش فى ايده عصاية هارى بوتر.. لازم يكون فى حكومة تحدد موارد للانفاق على زيادة الأجور دى..
4) لازم لازم لازم نرجع نمشى حال البلد.. 20 يوم من غير شغل فى البلد ليهم آثارهم السلبية برده واحنا أصلا اقتصادنا عنده حصبة ومش ناقص.. لو استمرت الاحتجاجات بالشكل ده كل يوم.. احنا اللى هنخسر.. الشعب اللى عمل الثورة هيجى عليه يوم ويلعنها.. وتونس مش بعيدة.. لغاية انهارده لسه فى احتجاجات.. وشوفوا لسه البلد برده مش عارفه تستقر على "بداية فترة انتقالية"! احنا ما عملناش ثورة.. انتوا ما عملتوش ثورة عشان تعانوا!
---------------------
يبقى دلوقت لازم نفكر بعقل ونشوف الآليات الممكنة والموضوعية لتنفيذ مطالبنا جميعها دون التنازل عن مطلب واحد(وهو ما لم يطلبه الجيش بالمناسبة)..
أنا فى رأيى الشخصى ان انسب حاجة ان الجيش يصدر بيان يقول فيه ان الحكومة الجديدة مكلفة بتنفيذ مطالب بيان الثورة بضمان الجيش وان هو والشعب هيكونوا مراقبين لآداء الحكومة.. ولازم نفهم ان المؤسسة العسكرية يهمها ان مصر حالها ينصلح لأنهم أولا مصريين.. ثانيا ناس محترمة.. يبقى نفكر بالعقل ونديهم وقت ينفذوا طلباتنا.. أو بمعنى أدق نديهم وقت لما الحكومة تتشكل لأن هى اللى هتنفذ طلباتنا... وتكليف الفريق أحمد شفيق بتشكيل الحكومة الجديدة أمر صدر من يومين أعتقد أو أكتر من يوم..
لازم الشباب يتعامل مع الموقف بنضج أكبر من كده عشان مصلحتنا احنا مش عشان حاجة تانية.. كل طلباتنا ان شاءالله هتتحقق.. بس كل حاجة وليها ترتيبات ووقت.. انما اننا نعمل فيها صعايدة(مع الاحترام للصعايدة) ونقفل دماغنا ونقفش على ان كل حاجة لازم تتعمل دلوقت انطلاقا من مبدأ "جزرة وجطمها جحش" يبقى كده فعلا مش هنحقق حاجة
لازم نفهم ان العقبة الأكبر واللى هى أصل العقبات اللى كانت بتعترض طريقنا وهو المدعو مبارك الحمدلله ربنا خلصنا منه.. وده فى حد ذاته بداية الاصلاح.. يبقى نصبر بقى على الزرعة لما تكبر فى وقتها عشان ناكل ثمرتها
أرجوكم انشروا الفكر ده بين الناشطين اللى بيتفاوضوا.. فهموهم.. مش عيب.. احنا كلنا هدفنا واحد.. وكلنا مع بعض.. "معا غيرنا.. ومعا سنصلح"
والحمدلله الذى هدانى لهذا
15 فبراير 2011
ليست هناك تعليقات:
إرسال تعليق