الصورة
العظيمة دي بتوضح ببساطة الخطوات الخمسة اللازمين لخسارة الوزن.. الدهون تحديدا.
ونلاحظ
اننا لما بنتكلم عن دايت صحي وخسارة وزن بصورة سليمة لازم نكون مدركين ان شغلنا هيكون
على حرق الدهون فقط.. يعني مش عايزين نخسر لا من الكتلة العضلية ولا من كثافة العظام
الخطوات
مترتبة من قاعدة الهرم لقمته حسب الأهمية والدور اللي بتلعبه كل خطوة في عملية خسارة
الدهون.
1. أول حاجة
وأهم حاجة في عملية التخلص من الدهون الزايدة هي عمل فرق سعرات CALORIE DEFICIT.. دا الخطوة الأساسية
لحرق الدهون.. من غير حساب سعرات ومعرفة احنا بناكل ايه مفيش نزول في الوزن.. بالعكس
ممكن تزيد وانت مش واخد بالك.
لازم
نفهم ان وزن = سعرات.
اتكلمنا
قبل كدا عن فرق السعرات في تدوينة سابقة ممكن تروحلها من هنا.
2.
تاني
حاجة هي زيادة كمية البروتين في الأكل.. البروتين عنصر مهم في عملية خسارة الوزن لأكتر
من سبب:
- أولا.. البروتينات بتدي فترة شبع أطول من النشويات بسعرات أقل لأنها بتستغرق
فترة أطول في عملية الهضم و الأيض وبالتالي الجسم بينشغل بيها فترة اطول بعكس النشويات
وعلى الأخص النشويات البسيطة اللي الجسم بيتعامب معاها بسرعة
- ثانيا.. البروتينات مش بتحفز خروج كميات كبيرة من الإنسولين زي النشويات
ودي حاجة مهمة جدا لأن دا بيقلل معدل تخزين الدهون اللي بيقوم بيه الإنسولين وبيقلل
من احتمالية حدوث مقاومة الإنسولين وهي المشكلة الأكبر اللي بيعاني منها مرضى السمنة
فضلا عن ان دا بيحسن من حالة مرضى السكر وبيساهم في الحفاظ على مستويات معقولة من السكر
في دمهم.. وبتنخفض جرعات العلاج اللي بيحتاجوها سواء كان انسولين او أقراص.
- ثالثا.. البروتينات هي العنصر الأساسي في بناء
العضلات اللي هي حاجة مهمة جدا أثناء خسارة الوزن عشان نزبط شكل الجسم ونمنع الترهلات
وعشان نحسن من الصحة العامة فضلا عن ان زيادة الكتلة العضلية بيرفع معدلات الحرق للجسم
وبيزود من استهلاك الطاقة وبالتالي هيساهم ويسرع من عملية خسارة بشرط الحفاظ على فرق
السعرات.
اتكلمنا
قبل كدا عن مكونات الغذاء ومصادر المكونات الصحية ممكن تروحلها من هنا.
3.
تالت
حاجة ومن الحاجات اللي مفيش غنى عنها هو تمارين المقاومة بأوزان أو تمارين الحديد..
تمارين
المقاومة بأوزان خطوة مهمة جدا في عملية خسارة الدهون لنفس الأسباب الخاصة بأهمية البروتين..
مهمة في شد الجسم ومنع الترهلات ومهمة في زيادة الكتلة العضلية ورفع معدلات الحرق وضمان
ان الخسارة في الوزن هي خسارة دهون وليس كتلة عضلية.. ودا اللي بيفرق الدايت الصحي
عن الغير صحي.. في الدايت الصحي بتخسر دهون فقط وبتزيد كتلة عضلية بعكس الدايت الغير
صحي واللي بتخسر فيه من كل مكونات الجسم ودا بالزبط عامل زي الناس اللي بتتعرض لمجاعات..
بيحصلهم
cachexia مش
fat loss.
ومن الحاجات
المهم نعرفها ان تمارين الحديد مهمة للولاد والبنات على حد السواء..متخافيش مش هتتحولي
لبطل مصارعة.. عضلات المرأة أصلا غير مؤهلة جينيا للتضخم الكبير زي الرجال.. على العكس
تمارين الحديد هتساعدك في الحصول على جسم متناسق انثوي جدا.
4. من الحاجات المهمة جدا هو النوم السليم ولفترات كافية.. من 6-9 ساعات يوميا
من النوم المنتظم الهاديء دا بيساعد جدا في عملية البناء العضلي وبالتالي خسارة الوزن.
5.
أخيرا وفي موخرة
الهرم.. وعلى عكس الاعتقاد الشائع عند الأغلبية.. تمارين الكارديو او التمارين الهوائية
زي الجري و نط الحبل والسلالم وما إلى ذلك..
التمارين
دي على الرغم من أهميتها في تحسين لياقة الجسم بشكل عام وتصفية الذهن وتحسين الحالة
المزاجية إلا أنها بتشارك بالدور الأقل في عملية خسارة الوزن..
يعني
مش لازم تمشي كل يوم ساعة عشان تخس ولا حاجة.. شيل حديد في الساعة دي أفيد بالنسبة
لحرق الدهون.
طيب في
ملاحظة هنا ان الهرم دا ما اتكلمش على ادوية التخسيس ولا اتكلم عن المشروبات اللي بتعلي
الحرق زي الكمون والقرفة و الشاي الاخضر وعين الضفادع وغيرهم.
السبب
في دا ببساطة هنوجزه فيما يلي:
* أولا.. بالنسبة لادوية التخسيس
دي اكذوبة
كبيرة و اشتغالة كبيرة وتصل لحد النصب
مفيش
دوا بيخسس
في الواقع
مفيش في الطب أصلا حاجة بتخسس غير العمليات الجراحية المبتكرة لعلاج السمنة المفرطة
أو ال
bariatric surgery ودي ابتدعت خصيصا لحالات السمنة المفرطة
الشديدة المرضية الغير قادرة على اتباع حمية صحية للتخسيس.. واللطيف في الموضوع ان
العملية بتكون مجرد انه بيحط المريض على اول طريق الدايت فقط وانه لازم هيعمل الحاجات
اللي قلناها فوق عشان يخس.
اما ادوية
التخسيس فممكن نقسمها 3 انواع وهنشوف كل نوع ازاي هو ببساطة.. اشتغالة
1. ادوية
تؤثر على الشهية.. دي ادوية كل وظيفتها انها تسد نفس حضرتك عن الأكل ودي أدوية خطيرة
لأنها بتشتغل على مراكز الجوع في المخ.. يعني انت بتلعب في كيميا المخ.. وفضلا عن اضرار
دا فانت هتخسر من كل مكونات جسمك وهتبقى بالزبط زي الشخص اللي بيتعرض لمجاعة.
2. ادوية
لتقليل امتصاص الدهون.. دي ادوية وظيفتها تاخد جزء من الدهون اللي في الوجبة الحالية
وتنزلهم بدون امتصاص.. وبديهي ان دا مش هيأثر على الدهون المتراكمة أصلا في الجسم لكن
هيقلل من كمية السعرات الجديدة اللي داخلة وبدون عمل فرق سعرات فانت اكيد اكيد برده
هتاخد سعرات اكتر من المطلوبة وبرده هتتخن أثناء استعمال الدوا.
3.
ادوية تملا المعدة..ودي
أقراص عبارة عن ألياف وظيفتها تملا المعدة وتخليك تاكل أقل شوية.. ودي حاجة فعليا ملهاش
لازمة لأنك الأفضل بدل الدوا المصنع تاكل ألياف من مصادر طبيعية زي الشوفان مثلا وهتقوم
بنفس الوظيفة لكن بشكل صحي و أوفر كتير على فكرة.
* ثانيا.. بالنسبة للمشروبات اللي بتعلي الحرق
بص..
من الآخر كدا.. مفيش على كوكب الأرض كمية كافية من الشاي الأخضر ممكن تخسس شخص واحد
تخين. بس كدا
الحاجات
دي اثرها ضعيييييف جدا يكاد يكون مهمل ولا قيمة له.. هو في الواقع لا قيمة له
اثبتلك؟
كل الناس
اللي بتقولك انا باخد قرفة وشاي اخضر عشان اخس لسة تخان ومفيش ولا واحد منهم خس ربع
كيلو ولسة تخان زي ما هما.
اقتنعت؟
كفاية
كدا انهارده عشان تعبت
باي
ليست هناك تعليقات:
إرسال تعليق