قبل ما تتكلم فى المحمول اغسل سنانك بسيجنال تو

آخر الإشاعات شبه الأكيدة ان فى مشروع قرار "السماح بتجسس المحروسة الحكومة على مكالمات المحمول" بيتجهز عشان يتعرض على مجلس الكلب(الشعب سابقا) واللى طبعا هيتصوت عليه بالموافقة نظرا لان اغلبية اعضاء المجلس بينتموا لـ الحزب الوثنى الديموقراطى وعليه يا محترم هيبقى من حق كلاب السرايا انها تسمع مكالماتنا بتاعت المحمول وهيبقى كله على المكشوف.. اللى قاللى الكلام ده كان حد بيحذرنى عشان ابقى الم نفسى وانا بتكلم فى التليفون.. بصراحة مش عشانى لكن عشان صديق مشترك بينا ما يتأذيش وانا وهو بنهزر فى التليفون.. اشطة
وعليه, واحتراما للقانون اللى لسه بطن امه وقريبا هينتقل لـ .. امه, انا قررت انى اوجه خطاب لشعب مصر بالكامل من اعضاء نوادى "آى فون" و "نوكيا" و "سامسونج" ومراكز شباب "اريكسون" و "أل كاتل" وخلافه انهم-ودى فعلا حاجة مهمة-.... يغسلوا سنانهم بسيجنال تو signal 2 قبل ما يتكلموا فى الموبايلات بتاعتهم...
ليه signal 2 ؟؟
1) سيجنال تو هيخلى سنانك بيضا وبكده ما تسودش نهار البيه اللى بيسمع مكالمة سيادتك.. هو اصلا حياته فيها سواد كفاية

2) سيجنال تو بيقضى على التسوس فسنانك هتكون فى حالتها الطبيعية وكده يبقى صوتك اشبه بصوت البنى آدمين وانت بتتكلم فى الموبايل

3) سيجنال تو بالنعناع هينعنش بقك وبكده لما تيجى تتكملم هتنعنش ودن البيه اللى بيسمع ويبقى الشعب كله عايش فى نعنشة(شايفين القانون هادف ازاى)

4) سيجنال تو بيمتاز انه بيوفر اكتر من نكهة.. نعناع, تفاح, برتقان,, وقريب هينزل منه بالجبنة المتبلة.. وده هيفيد فى انك مع كل مكالمة تقدر تستخدم نكهة مختلفة عشان البيه اللى بيسمع ما يزهقش من النعناع

5) سيجنال تو بيوفر اعلى حماية للبق(بضم الباء وتسكين القاف) من البكتريا المسببة لرائحة الفم.. وده طبعا مطلوب عشان البيه اللى بيسمع مكالمة سعادتك ما يقرفش منك ويرجع

-انا بس احب اوضح انى شخص متسامح اوى.. بس مش عارف ليه مع النظام والحكومة ايمانى بيضعف ومش بقدر اسامح.. وعليه فانا بشهد ربنا وبشهد كل انسان يقرأ الكلمتين دول ان اى تعدى من الحكومة على اى حق من حقوقى ابتداءا من اللحظة دى انا مش هسامح فيه وكل فرد فى الحكومة من كبيرها لصغيرها ساهم فى التمكين من التعدى على حقى ده انا مش مسامحه وهيفضل شايل الذنب بتاع ده ليوم القيامة.. وان شاءالله اذا فى يوم القيامة جالى حد منهم عشان اسامحه فى ذنبى عشان يعرف يدخل الجنة فانا بباركله من دلوقتى برفضى مقدما.. وحسبى الله ونعم الوكيل...
كمان عايز اشهدكم على حاجة.. كل شخص فى الدنيا لا يمت للحكومة أو قيادتها بصلة أذانى فى حاجة فى اى مرحلة من مراحل حياتى (أنا مسامحه من قلبى) وأرجو الله تعالى انه يغفرله أذيته ليا...
يعنى من الآخر انا مسامح كل اللى ليا حق عندهم الا نوعين من البشر...
-اى حد يتسبب فى اى نوع من انواع الاذى للانسانة اللى انا بحبها
-اى انسان يجور على حقى من النظام الحاكم ابتداءا من سيادة الرئيس وانتهاءا بأصغر موظف فى الحكومة... وحسبى الله ونعم الوكيل مرة تانية

بالمناسبة... غسلت سنانك بسيجنال تو انهارده؟