عايز عيلة ايجار.. قانون جديد

يا ترى الى اى حد ممكن الانسان يكره الناس اللى هو عايش معاهم(عيلته يعنى)؟؟

السؤال ده بيفكرنى بسؤال سأله رون ل هارى فى الجزء التانى من هارى بوتر لما سأله على كراب وجويل وقاله

how thick could they get??

ما علينا.. انا فعلا مش بهزر.. ايه هو مدى الكراهية المتأصلة اللى ممكن يشيلها حد لأهله الأعزاء؟؟

طبعا عادى ان يبقى فى حد عنده مشاكل مع اهله.. وغالب الشباب فى المرحلة بتاعتنا مش بيكونوا على وفاق واستقرار فى البيت.. الا طبعا اللى ربنا هاديهم(عشان بس ما يطلعش حد يقولى ده شيطان).. المشاكل مع الاهل بتتنوع فى الحجم والمدة والطبيعة.. يعنى انا اعرف حالات كتير لجماعة صحابى عندهم مشاكل كتير مع اهلهم وغيرهم مشاكلهك اقل وغيرهم مش عندهم اى مشاكل والحياة معاهم لونها بومبى خالص..

انا بصراحة كنت ناوى اكتب كلام اسود فى الموضوع لكن لقيت ان معظمه غير صالح للنشر والتوزيع بجمهورية مصر العربية لاسباب تتعلق بالدين وكده يعنى.. فانا هنا هكتفى بحاجات بسيطة.. اوى

انا وبكل فخر من اكتر الناس اللى بتكره عيلتها الكريمة فى الدنيا العظيمة.. اه والله

يعنى بصراحة علاقتى بيهم من زمان مش مزبوطة وكده وده ليه اسباب صبابعينى بياكلونى انى اكتبها بس مش عايز اعك كتير عشان الواحد مش ناقص سيئات وانتوا عارفين بقى..

اول حاجة احب اقولها ان معظم افراد عيلتى بيعانوا من chronic psychosis وللاسف ملهوش علاج(ده اول تشخيص ليا فى عالم الكلب البشرى).. يعنى احنا الحمدلله تلاقى فى افراد عيلتنا جميع انواع الامراض النفسية الغير موجودة على كوكبنا الا عند عيلتى الكريمة والست اللى بتدينيا physiology حصريا..

نتكلم بجد شوية بقى وهخصص الكلام عن اسرتى بس وماليش دعوة بالباقى..

الحمدلله ربنا رزقنى بأسرة بتضرب امثلة راقية جدا فى كيفية اساءة التعامل وتربية ولادها..

يعنى هما الحمدلله فكرتهم عن التربية لا تتعدى ان الوالد يكع والحاجة تطبخ.. وشكرا.. ما يعرفوش ان فى حاجات كتير كان لازم يقدموها(مع انهم قدموا كتير عشان الانصاف) ولكن ما قدموهاش رغم ان الحاجت دى اهم بكتير من المصروف وسلطانية القلقاس..

بصراحة انا من زمان وانا عندى احباط من طريقة التعامل والحوار اللى اساسا مش موجود والقرف الأزلى اللى انتوا عارفينه ده.. الاحباط ده مع افتقاد شوية الحاجات اللى ما سميتهاش سابقا هما اللى ولدوا جوايا شعور كراهية.. ودى مش حاجة انا فخور بيها.. بس ده الواقع يا حضرت..

يعنى مثلا لو اتناولت افراد اسرتى وهحاول الم لسانى الطويل على قد ما اقدر..

-بابا..كل علاقته بيا عبارة عن انه الممول ووزير المالية اللى انا اعرفه.. طبعا دى مش حاجة سهلة فى الزمن اللى احنا فيه ومع الظروف الزفت دى بس الحمدلله.. دى الحاجة الوحيدة اللى بيعرف يعملها.. للاسف عمرنا ما اتكلمنا مع بعض زى اى اب وابنه وكان طول عمره بعيد عنى جدا ومشغول باكل العيش ومش فاضيلى بقى وكده لغاية ما دخلت الموكوسة وبقى "مجال شغلنا واحد.. بقينا زملا يعنى" looooooooooool وساعتها افتكر انى ابنه اللى جايبه من يجى 19 سنة وحبة كدة.. بصراحة انا نفسى احكى عن بلاوى بس بلاش مش هنقطع فى فروة الراجل وهو مش هنا برده.. يكفى بس فى عبارة بسيطة انى اقول انه حاليا بيحطم اى صلة ممكن تبقى بينا.. بس يمكن انا اللى غلطت لما حاولت ادخله حياتى بعد كل السنيين دى.. بصراحة.. كانت غلطة كبيرة وببساطة قتلت جوايا اى شعور ناحيته(باستثناء شعور الفرحة بالمصروف والعيدية).. ده من غير تفاصيل منعا للاحراج

-امى..ماما طيبة جدا بس للاسف عيبها انها "شحاتة"pure(ده لقب عيلتنا الكريمة) ومن اهم مميزات عيلة "شحاتة" اللى ما ينافسهاش فى الغرابة غير كتاب همت انهم عندهم قدرة وحب رهيبين فىا لبحث عن الكآبة ولو بعد الشر اتكتبلهم يفرحوا يبقى لازم يقعدوا فى الفرح مستنيين المصيبة.. يا حلاوة يا ولاد

للاسف امى تعاملها غلط خالص من البداية وده يمكن اللى قطع الحوار بينا فى سن صغيرة جدا.. الابتدائى يمكن..

يعنى انا امى بتقتل نفسها فى شغل البيت(وما اكتره) ده بجانب شغلها كطبيبة عيال صغيرة(حاجة كدة وجع دماغ).. لكن مش اكتر من كده.. مش بتعرف غير فى الاتنين دول بس

-اختى.. البت بسبس بقى دى بجد انا بموت فيها.. يمكن هيا اللى طلعت بيها من العيلة الـ.. تيييييييت دى لكن حتى دى للاسف مش اقدر اخد راحتى معاها فى الكلام منعا من تسرب الاخبار لان انتوا عارفين ان لسان النسوان عامل زى الحنفية اللى من غير جلدة..

للاسف دى الوحيدة اللى انا غلطان فى حقها مش هلى اللى غلطانة فى حقى.. بس يلا تستحمل بقى.. اهى كلها كام شهر ان شاءالله وترتاح منى.. عقبالكوا

يعنى من الاخر اللى عايز اقوله ان علاقتى باهلى عبارة عن تعاملات مادية مش اكتر من غير اى emotions على الاطلاق.. ودى حاجة قديمة وبالتأكيد هى السبب الرئيسى فى حالة الكره الشديد اللى بكنها لعيلتى المحترمة..

طبعا انا مش فرحان ان ده شكل العلاقة بينا وعارف كويس اوى ان ده غلط.. عليا انا وانى الوحيد الخسران من العلاقة الجافة دى (لانى انا اللى اسمى عاق او جاحد او شوفوا بيقولوها ازاى).. بس بصراحة انا مش اقدر ومش مستعد انى احاول احقق المستحيل واخلى العلاقة بينا طبيعية.. بصراحة انا كدة مرتاح اكتر وان كنت بعانى من "اكلان حاد فى الضمير" تتجاوز شدته الصفر المطلق بقليل وكمان بيجى على فترات متقاربة تتراوح من شهور لسنيين وفى الغالب لسنيييييييييييين..

انا الحمدلله مش عايش لوحدى.. ربنا مش بيسيب حد من غير حاجة وزى ما بياخد من حد حاجة بيديله عوض عنها.. والحمدلله كان العوض فى انى طول عمرى حوليا اصحاب اكتر من روعة وهما بجد كل حياتى.. من زمان اوى.. من اول ميشو وصافى وايهاب وشريف(حتى لو بعدتنا الايام شوية يفضلوا برده احسن ناس فى حياتى) ولغايةا لناس اللى حواليا دلوقتى ومن فترة طويلة زى كونان(صديق عمرى بجد) ومها(بس عايزالها علقة) ومحمد حسن(اللى بجد شخص اكتر من مميز) وحامد(ده مش ممكن يكون انسان.. ده صنف مفيش منه غير واحد بس) وهانى وجولدن وروزا(ايام ما كان فى روزا) وناس تانية دول هما حياتى وهما بجد اهلى وهما كل حاجة عندى.. ربنا بس يديمهم عليا عشان انا من غيرهم مش اعرف اعيش بجد

وبوجودهم ابقى "مش" عايز عيلة ايجار.. حتى لو كانت قانون جديد