,,حتى لا تتخيل انك ستتخرج لتصبح طبيبا,,

الموضوع ده كنت كتبته على منتدى الموكوسة بعد نهاية التيرم التانى من سنة اولى.. شفته انهارده بالصدفة وحبيت احتفظ بيه على صفحتى..



مبروك لكل زمايلى الــ"دكاترة" على نهاية السنة الاولى (ويارب تبقى الاخيرة) ويا رب نستمتع كلنا فى الاجازة..

فى فترة الامتحانات بتاعتنا كان بدأ يظهر كلام على المنتدى يضحك اوىىىىىى من نوعية..
"هل تثق فى نفسك كطبيب؟"
"هل يوجد فرق بينك وبين طلبة الجامعات الاخرى؟"

السبب اللى خلانى اتأخر فى الرد على المواضيع اللى من العينة دى (بصراحة ومن غير زعل) انى كنت بدحك من يوم ما قريت المواضيع دى لغاية لحظة كتابة هذه السطور...

طبعا طبعا يعنى عيب اوى اننا نقارن بين دكاترة جامعتنا العظيمة



والناس الـ local بتاعة عين شمس او جامعة اسكندرية..



ايوة صح ايش جاب لــ جاب؟؟؟!!!
بالله عليكم يا جماعة نبطل الكلام اللى من النوع ده عشان والله عيب والناس لو قرته هتدحك علينا اصلا فبلاش فضايح عشان العملية اصلا مش ناقصة...

طبعا احنا مش زيهم.. ومش نيجى اصلا حاجة جنبهم(مع احترامى لزمايلى) وفى مليون سبب يوضحوا ابسط الفروق بينا وبينهم..



1)مش من المنطقى ان امكانيات الطالب المحترم اللى جايب 80& فى الثانوية زى امكانيات الطالب اللى طلع عينه عشان يجيب 98.5%(up to 101%)

2)لما نيجى لنظام الدراسة بتاع جامعتنا المحترمة والجامعات التانية هنلاقى عجائب تستحق يتعمل عنها موسم من برنامج (العلم والايمان) لو حد فاكره يعنى..

يعنى مثلا..
-احنا بندرس بنظام التيرمات(حاليا) وهناك بياخدوا السنة كاملة يعنى بيذاكرو طول السنة مش بيرمو كتبهم بعد نهاية التيرم الاول..
-لو بصينا لمادة زى ال anatomy مثلا هنلاقى ان هنا فى اكتوبر الهنا عندنا كل تيرم كتابين بالعافية ورئيس القسم(مشكورا) بيلغى منهم حوالى 99.9% والبافى بيحدد منه topics هييجى منها الامتحان.. يعنى فى امتحان التيرم التانى مثلا الدكتور حدد من ال lower limb&thorax بالظبط 30 صفحة هنمتحن فيهم(والله بنتعب) فى حين ان طلبة جامهة اسكندرية مثلا امتحنوا على 6 كتب فى التشريح بس..
upper limb-thorax-abdomen-pelvis-general embryology-general biology ولا عزاء للمساكين..
طبعا احنا فى غنى عن ذكر الفروق الجبارة بين كتبنا وكتبهم وانهم طبعا مش عندهم حاجة اسمها ملغى ولا تحديد..
والله بياخدوا فى المحاضرات حاجات زيادة..
اه نسيت اقولكم ان د. كمال سرب الامتحان لبعض زمايلنا فى الدفعة وده فرق تانى

3)مادة زى الـ biochemistry عاملة رعب لكل طلبة طب فى اى جامعة فى الدنيا الا اكتوبر.. ليه بقى؟؟؟
طبعا عشان الاستاذة رئيسة القسم بتحط امتحان اشبه باختبارات المعلومات العامة ده غير ان التصحيح ايه.. فلة
يعنى ممكن تبقى مش حليت حاجة وتلاقى انك جايب +B (حصلت معايا فى التيرم الاول)

4)ال histology مش هتكلم عليه كتير عندنا عشان بصراحة انا معجب بالفسم ده بالنسبة لاسلوب تنظيمه وادارته(وده ما يمنعش انى مختلف تماما مع شخصية رئيس القسم وان اسلوبه لا يليق بدكتور فى مكانته)
لكن برده لازم يكون فى قطط فطسانه.. والقطط هنا هى ان الامتحان بتاع الهيستولوجى بيتسرب ليلة الامتحان او على الادق بيتباع ب 750 جنيه بس(شفتو الدنيا حلوة ازاى؟؟)

5)اما عن ال physiology فحدث ولا حرج..
رئيسة القسم مش عارفه حاجة اصلا(حضراتكم ده باجماع الطلاب) يعنى المعيد اللى ف القسم اشطر منها(والله جد)..
لو جينا للكتاب هنشوف عجب العجاب.. كتاب د. همتالمادة عامل زى ملزمة طالب خايب.. حاجة كده عاملة زى كتاب "بهجت الاباصيرى"(عادل امام) فى مسرحية مدرسة المشاغبين لو فاكرين كان عامل ازاى..
اما عن دكاترة القسم.. مع احترامى.. ما ينفعوش يدرسوا فى فنون جميله(بس عشان الحق فيهم واحد بيعرف يشرح """الكتاب""")
يعنى اذا كلية طب الجامعة المصونة تخلوا من علم ال physiology اللى كان dr-killer وصفهولى مرة على انه (ربع الطب)

6)الجامعة بتحاول تنجحنا باى طريفة لدرجة انهم غيروا نظام الدرجات كام مرة عشان يلافو حاجة على مقاس نجاحنا!!!


اذا يا شباب الموضوع كله عبارة عن business احنا عايزين شهاده والجامعة عايزة فلوس.. احنا بندفع والجامعة هتدينا الشهادة.. اما عن العلم فزى ما قال واحد من الدكاترة.. "خدوه من بره"

عشان كده بس انا بترجاكم ما تدحكوش طوب الارض علينا.. يعنى بينا وبين بعض قولو احنا دكاترة واحنا مش عارف ايه..بس بلاش نقارن نفسنا بدكاترة الجامعات التانية.. لو تلاحظو انا نفسى بطلت المفارنة من بعد نقطة 2 مع انى عارف نظام جامعة اسكندرية(اه.. نسيت اقولكم انى الفاشل الوحيد بين اصحابى) وهى طبعا من الجامعات المشهود ليها فى مصر بالتحديد فى الطب والهندسة والصيدلة...

ملحوظة.. قبل ما ادخل الجامعة كان عندى فكرة تانية خالص عن التعليم الخاص فى مصر.