قبل شوية كنت عند الحلاق, كالعادة كان مشغل التليفزيون ومشغل معاه اغاني مهرجانات عايزة الحرق زي الإنسان اللي ابتدعها..
التليفزيون كان شغال على mbc2 وكان شغال فيلم x-men origins: wolverine.. أنا الحقيقة من معجبين هيو جاكمان عشان كدا دا واحد من أفلامي المفضلة ضمن كل أفلام السلسلة اللي مش مفضلة أوي ليا..
قعدت أتفرج على الفيلم وسيبته يعك في شعري كالعادة
شفت مشهد أول مرة أنتبه ليه.. شفته طبعا قبل كدا كتير.. بس أول مرة أحس بيه
المشهد كان بعد ما سترايكر أخد لوجان وعمل عليه تجربة حقن الأدامنتيوم وحوله للوحش الفولاذي اللي بقت عليه شخصية وولفرين بعد كدا
بعد ما التحول نجح وولفرين هرب من مقر التجارب وكان خطير وقوي بشكل مخيف وفيه غضب يدمر مدن كاملة وعنده قوة تقدر تنفذ دا.. وفوق كل دا.. كان من غير هدوم
هرب وراح مزرعة قابلته في طريقه دخل استخبى فيها.. ولما رجع أصحاب المزرعة شافوه بهيئته دي.. كانوا راجل وست مسنين تخطوا الستين وربما السبعين.. رد فعلهم كان غريب.. ونقي.. مخافوش منه رغم الحذر.. الراجل قرب منه واتكلم معاه وجابله هدوم ابنه وعرض عليه يستضيفه بعض الوقت عندهم في المزرعة لحد ما يكون مستعد للرحيل.. كل دا من غير ما يعرفوا عنه حاجة.. لا اسمه.. ولا حكايته.. ولا ايه وصله للحالة دي.. ولا القوة المهولة اللي بتسري في عروقه.. ولا أي شيء
لمحة ملفتة من طيبة القلب والنقاء خلتهم يحتضنوه تماما بدون أي اسباب
المشهد دا أول مرة أخد بالي من تفاصيله..
يمكن لأني أول مرة أكون محتاج لحاجة كدا
مكان معرفهوش
وناس معرفهمش.. ميعرفونيش
يكونوا على القدر دا من النقاء وطيبة القلب
بدون قيود او شروط
حتى لو هيستضيفوني ليلة او اتنين في حظيرة الحديقة زي لوجان
ويقدمولي هدوم ابنهم القديمة
ويسمحولي اشاركهم عشاهم البسيط
من غير اسألة
ومن غير حسابات
المشهد يمكن عادي برا عند الاجانب
ويمكن يكون بيتكرر في الأفلام كتير
وفي الأغلب هيكون ليه أساس في الواقع
وأكيد شفته قبل كدا
بس احنا مش كل حاجة بنشوفها بندركها وبنحسها
في الغالب مش بننتبه للحاجة غير لما نحتاجها بس
ليست هناك تعليقات:
إرسال تعليق