عن خلافي العقائدي مع الـ oncology

فى جزء سخيف فى الطب اسمه علم الاورام أو الـ oncology والجزء دا بيختص بالتعامل مع الاورام بنوعيها الحميد والخبيث..

المهم بقى ان البتاع دا مش بينزلى من زور!!!

الاورام بتكون اما حميد ودا فى أغلب الأحيان بيتساب فى حاله ومش بيتشال غير لو فى داعى واما خبيث ودا فى
أغلب الاحيان بيؤدى لوفاة المريض حتى لو سيادتك اتكرمت وشيلته..

ايه بقى سر عداوتى مع البتاع دا؟

الموضوع ببساطة ممكن يتلخص فى النقط التالية:

1. انه علم سخيف جدا فى الدراسة ومحتاج تفاصيل ميكروسكوبية مقرفة حتى الىن مش عارف ليه بندرسها كطلاب undergraduates ودا نقطة مبداية مرحلية فى اعتراضى عليه..

فضلا عن انى مش فاهم ليه كل ام التفاصيل دى عن حاجة هتتشال كلها على بعضها تترمي فى الزبالة باللى حواليها؟ ما يقرفوا بيها الـ histopathologist.. أنا مالى؟؟

2. الطبيب فى غالب الأحيان مش بيقدر يفيد المريض فايدة حقيقية بالعكس دا بيطينله الدنيا أكتر.. ازاى؟

المريض بيشرف عندك فى المستشفى وسيادتك بتشخص حالته كورم سرطاني فى اى مكان بقى ودى بتبقى يا دوب الصدمة الأولى والأهون للمريض وذويه.. ليه بقى؟؟

لأن لسه فى بلوة سودة اسمها العلاج.. ازاى بقى؟؟

اقولك ازاى.. بعد ما تنزل على دماغه بصدمة التشخيص هتقوله يا حج احنا هنعملك عملية وهتكمل بعدها علاج اشعاعي وكيماوى.. العملية دى ان شاءالله يعنى هـ"نقورك" فيها تقويرة محترمة وهنعملك خورم داخلي كبير تدارى فيه الفلوس من مراتك وبعدين لما تطلعلنا بقى بالسلامة كدا هنعكشك علاج كيماوى يضربلك باقى أجهزة الجسم السليمة ان شاءالله وبعدين علاج اشعاعي ممكن يعرضك للإصابة بسرطان تاني بعد كدا ان شاءالله..

وبعد كل دا ان شاءالله سيادتك عندك فرصة تعيش بتاع من سنتين لخمس سنين ان شاءالله ودا مش مضمون يعني بس هنحاول,, فى الفترة دى حضرتك هتكون مكتئب انت واللى خلفوك واللى خلفتهم ولو ممتش من الاكتئاب يبقى هتموت من المرض اللى احنا عالجناه.

3. الأورام السرطانية اللى بتتعالج بشكل حقيقي وواقعى قليلة جدا واكتشافها المبكر مش مضمون ويمكن تنحصر فى اورام الثدى وسرطانات الجلد بالعافية وبالذات فى دولة زى مصر مفيهاش حاجة اسمها screening programs والشعب عندنا ما شاءالله جاب مرسي رئيس فتخيلوا بقى درجة الوعي اللى هو فيها,, يعنى من الآخر العيان ان شاءالله هيجي المستشفى بعد ما يكون مات فعليا.

4. السرطانات معظمها بيجي فى سن متأخر غالبا فوق ال 50.. والأغلب فوق ال 60..

طيب بالزمة.. واحد عنده بتاع 67 سنة لسه عايز يعيش ليه؟

مهو انت لو معالجتوش من السرطان هيموت بعدها بكام شهر أو سنة سنتين ولو عالجته هيفضل ميت لحد ميموت كمان سنة سنتين.. طيب متسيبه يموت موتة ربنا يا أخى؟؟!!

أعتقد ان كلنا يا اما نعرف حد كان عنده سرطان يا أما حد قريب حد نعرفه يا اما حتى مريض عدى علينا,, اللى عنده بقى اعتراض يا ريت يحتفظ بيه لنفسه لأنى غير مهتم أساسا.

من الآخر ال oncology دا يتلخص فى كلمتين: المريض يكع دم قلبه عشان يقدر يضرب باقى الأجهزة السليمة فى جسمه لحد ما ربنا يكرمه ويموت بعد ما يعاني هو والناس اللى حواليه..

آه صحيح نسيت أقولك.. احنا لا مؤاخذة معندناش حاجة اسمها علاج سرطان.. احنا بس بنأجل موتك لحد ما تتعذب شوية تخلص بيهم ذنوبك