فى خطبة جمعة الاستفتاء 14/12/2012

انهارده يوم الجمعة 14/12/2012 ليلة الاستفتاء على مشروع دستور قندهار..

نزلت للصلاة زى كل يوم جمعة ودخلت المسجد فى بداية الآذان التانى بعد صعود الإمام مباشرة. بصيت على المنبر لقيت شاب سلفي واقف وآخد هيئة محمد حسان أحد شيوخ السلفيين.. جلابية وطاقية وعليها شال.. اللى هى الهئة نفسها بتاعت شيوخ السعودية الوهابيين, وبالمناسبة يعنى يا ريت حد يفهم الناس اللى بتقلد عميانى ان الشيخ اللى بيقف يخطب فى السعودية عند الكعبة بتبقى الدنيا عنده شمس فبيضطر يحط الغطرة على دماغه فوق الطاقية.. افهموا يرحمكم الله

المهم لما شفت المنظر ما تفائلتش لكن جلست فى انتظار الخطبة وقلت يمكن يقول كلام كويس وادينا قاعدين

بدأت الخطبة وبدأ أخينا يتكلم عن المنافقين وبدأ يعدد من صفاتهم وفى كل صفة بيلقح الكلام على معارضى مرسي ومن سيصوتون بلا فى الدستور وانا اسمع كل فقرة والتانية واقول أصبر لما يخلصها يمكن يكمل كويس.. اصبر لما يخلصها يمكن يكمل كويس, لغاية ما سمعت حوالى الخطبة الأولى كلها تقريبا وجيت فى آخر نقطة بيتكلم فيها وكنت خلاص مش طايق اقعد أسمع من كتر الأكاذيب والأباطيل اللى بتلقى من على المنبر..

وبما انى بصراحة مش مقتنع اوى بصحة انى اقاطع الامام فى الخطبة(الا لو أخطأ فى آية أو حكم شرعي-حسب ما سمعت-) فقومت أخدت نفسي من منتصف المسجد ومشيت قلت أروح مسجد تانى جنبنا هو بيطول أى نعم بس مش مهم يمكن الشيخ بتاعه يكون أحسن مع انى آخر مرة صليت فيه كان الخطيب برده شاب سلفي!!

روحت المسجد التانى ولقيت الخطيب هو الإمام الأزهرى المعين من الأوقاف وانا اعرفه شكلا كدا كنت صليت وراه كام مرة كدا.

المهم جلست استمع وكمان فى منتصف الخطبة الأولى وكان تقريبا موضوعها عن الحرية فى الإسلام وكيف ان الإسلام لا يقر أعمال العنف والتخريب فما بالك بالقتل..

قعدت أسمع وكان كلام الشيخ موزون جدا وعلى عكس اللى قبله فكانت خطبة تنفع لجميع المسلمين وليست موجهة لفئة دون أخرى فارتحت للخطبة, وبعدين سرحت للحظات لما الشيخ تكلم على القتل فى قتلى الاتحادية وقلت فى بالى احنا قتلانا ان شاءالله فى الجنة وقتلاهم ان شاءالله فى النار لأن هما اللى اعتدوا..

يا دوب رجعت للخطبة سمعت الشيخ بيقول حديث شريف (إذا التقى المسلمان بسيفيهما فالقاتل والمقتول فى النار, فقال بعض الحاضرين يا رسول الله هذا القاتل فما بال المقتول؟, فيقول الرسول -صلى الله عليه وسلم- لقد كان حريصا على قتل صاحبه)..

الحقيقة هنا انا تنحت شوية وبدأت أعيد تفكير فى رأيى عن قتلانا وقتلاهم لأنى عمرى ما هبدل حكم الله تعالى او الرسول صلى الله عليه وسلم, وبعدين انتهيت الى انى بعد الخطبة أروح استفسر من الشيخ وقد كان..

انتهت الخطبة وذهبت الى الإمام وقلتله يا شيخ حضرتك قلت الحديث بتاع فالقاتل والمقتول فى النار, طيب بالنسبة لموضوع زى اللى حصل عند قصر الاتحادية دا؟ الناس قاعدة مسالمين والتانيين جم اعتدوا عليهم, هل الحديث ينطبق هنا؟

رد على الشيخ ودى كانت كلماته على قدر تذكرى:

"فيما يخص المتظاهرين طالما أنهم لم يخربوا ولم يعتدوا وأنهم خرجوا للتعبير عن رأيهم سواء بتأييد الرئيس أو برفضه دون تخريب وجاء غيرهم وإعتدى عليهم, فمن قتل منهم فهو شهيد مصداقا لقول رسول الله صلى الله عليه وسلم: من مات دون دمه فهو شهيد.. ولا ينطبق عليه الحديث المذكور فى الخطبة.."

قلتله طيب يا شيخ الحديث التانى ينطبق على ايه؟ انا مش فاهم مقصده..

قال: "الحديث التانى ينطبق على اذا اتنين مسلمين اقتتلوا على أمر تافه من أمور الدنيا واشتبكوا وفى ""نية"" كل منهما قتل الآخر فالقاتل والمقتول فى النار"

قلتله يعنى مثلا زى الخناقات اللى بتحصل فى الشوارع؟

قال: "مش بالزبط, لو الاتنين اتخانقوا وفى نية كل واحد منهم انه يؤذى التانى او يعوره ومات واحد منهم فدا قتل خطأ والله له أن يغفر أو يعذب, أما لو الاتنين اقتتلوا وفى نية كل منهما قتل الآخر فدا هو اللى يندرج تحت الحديث اللى ذكرته فى الخطبة"

بعدين قلت للشيخ انا عندى سؤال تانى لو سمحت.. فقاللى أؤمر..

قلتله الأمر لله ولو تسمح كان مؤخرا فى دعوات فى وقت الاستفتاء اننا لو رأينا شيخ بيوجه الناس فى الخطبة فإننا نقاطعه وننزله من على المنبر والحقيقة انا استحرمت الموضوع دا وكنت قبل ما آجى هنا فى مسجد تانى وكان بيخطب شاب سلفي وبيوجه الناس بس مقدرتش اقاطعه احتراما لحرمة بيت الله لكنى مقدرتش برده اصلى وراه وسيبته وجيت هنا.. هل عليا ذنب؟

الشيخ تردد قليلا قبل الإجابة وفكر وقاللى: "مبدأيا انا مع ان الامام والاعلامي يلتزم الحياد ولا يتدخل فى توجيه الناس فهى حريتك أن تختار ما تشاء, اما عن الاعتراض على الامام فهو خطأ لأن الإمام فى منبره له حصانة بحكم المقام الذى هو فيه, فلو أساء استخدامها فعقابه على الله ولكن ليس لك أن تقاطعه أو تنزله من منزله, اما عن موقفك فان شاءالله ليس عليك شىء طالما انك لم تخرج من الصلاة وتنصرف الى الدنيا, انت لم تتقبل الامام فخرجت بحثا عن غيره"

الحقيقة انا شخصيا مش واثق اوى فى الفتوى التانية واتمنى طبعا يكون صحيح لأنى بصراحة مش ناوى اقعد فى اى خطبة بعد كدا اسمع واحد بيكدب باسم الدين.

بس ختاما يعنى.. أنا من زمان كان نفسى اتكلم مع حد بيفهم فى الدين :)

ربنا يكثر من أمثالك يا شيخ طارق وينفعنا بعلمك ويجزيك عنا خير الجزاء.
والله الموفق