دكتور.. اتبرعت بدمك انهارده؟

"مثل المؤمنين في توادهم وتراحمهم وتعاطفهم مثل الجسد الواحد إذا اشتكي منه عضو تداعي له سائر الجسد بالسهر والحمى".. حديث شريف

كلامى فى التدوينة دى يمكن موجه للناس كلها لكن هخص بشكل خاص زملائى فى المجتمع الطبى..

بالتأكيد كلنا سواء كنا دكاترة أو طلبة روحنا مستشفيات وشفنا قد ايه المرضى بتعانى هناك.. معاناة المرض ومعاناة الفقر ومعاناة عدم القدرة على تكاليف العلاج ومعاناة الإهمال حينا ونقص الإمكانيات من المستشفى أحيانا..

يمكن كدكاترة إحنا نقدر نساهم فى تخفيف معاناة المريض بأكتر من شكل وأكتر من صورة سواء بتقديم الرعاية المطلوبة طبيعا ونفسيا أو بأوجه أخرى للأسف مش كلنا بينتبه ليها..

الأوجه دى هى الأوجه الإنسانية اللى للأسف كتير مننا بيغفل عنها رغم انها تكاد تكون واجبة علينا أكتر من غيرنا بحكم اننا شايفين معاناة الناس بعنينا ومقدرين أكتر من غيرنا لحجم الآلام اللى هما فيها.

الأوجه دى كثيرة ومنها مثلا الإنفاق للى يقدر انه يتبرع لمستشفى أو حتى لمريض ومنها مثلا محاولة توفير العلاج للمريض اللى مش قادر بأى صورة ممكنة ومنها طبعا.. التبرع بالدم.

انا هتكلم عن التبرع بالدم لأن دا موضوع حيوى وخطير جدا وفى بسببه ناس كتير بتعانى بسبب نقص الدم من المستشفيات أو بسبب ارتفاع أسعار أكياس الدم.

من المعروف إن أكياس الدم اللى الناس بتتبرع بيها بتتحفظ فى المستشفيات وبنوك الدم وبتخرج مجانا للمريض اللى داخل فى حالة طوارىء(حادث مثلا) و بتخرج بفلوس للمرضى الكرونيك(مرضى أنيميا تكسير كرات الدم الحمراء)..

وفى حالة واحدة فقط المريض الكرونيك ممكن يحصل فيها على دم مجانى.. ان يكون معاه حد من أى فصيلة يتبرعله ويتم استبدال كيس الدم الجديد بالكيس الملائم لفصيلته.

غير كدا بيضطر المريض لشراء أكياس الدم اللى محتاجها وأسعار كيس الدم بتتراوح ما بين 100-300 جنيه فى المستشفيات وبتوصل لـ 700 جنيه فى السوق السودا.. ومكونات الدم طبعا بيكون سعرها أغلى, كيس الصفايح مثلا بيوصل سعره لـ 700 جنيه لوحده!

ومع الظروف الإقتصادية بتاعتنا ومع حالة المرضى اللى كلنا عارفينها بيبقى صعب جدا انهم يوفروا تمن أكياس الدم.. وبالذات المرضى اللى بيحتاجوا نقل دم بشكل مستمر.

والمشكلة الأكبر كمان ان ساعات المستشفى مش بيتوافر فيها أصلا دم!

طيب احنا كأطباء المفروض نكون أول ناس تساهم فى حل المشكلة دى..

أعتقد انه واجب علينا كأشخاص مدركين لحجم المأساة اننا نحاول نساهم فى حلها.. مش كدا ولا ايه؟

الشخص العادى يقدر يتبرع بنصف لتر دم كل 6 إلى 12 أسبوع على حسب حالته الجسمانية والصحية.. هنخسر ايه لو اتبرعنا بشكل منتظم؟ وأخص بالذكر الدكاترة الذكور لأن يمكن الدورة الشهرية تكون عائق للدكاترة الإناث عن التبرع بصفة منتظمة(ومع ذلك اللى تقدر تتبرع حتى لو مرة أو مرتين فى السنة تتبرع)

اتبرع يا دكتور وانت فى المستشفى بتاعتك بشكل منتظم على قد ما تقدر.. اتبرع وانت ماشى فى الشارع لو لقيت عربية تابعة لوزارة الصحة أو جمعية رسالة (وبرجاء الحذر من سيارات الإسعاف مجهولة الهوية لأن الدم اللى بيجمعوه غالبا يباع فى السوق السودا).. اتبرع لو لقيت عيان محتاج كيس دم ومش قادر يوفره.. اكسب فيه ثواب وافتكر انك ممكن فى يوم تقف مكانه.

يا دكاترة احنا أجسامنا مش ملكنا.. دى ربنا خلقها وواجب علينا اننا نستخدمها فيما ينفع الناس ومش من الإنسانية أبدا اننا نشوف مريض محتاج نقل دم ومش قادر على تمن الكيس ومعهش حد يتبرع ونقف نتفرج..

وخليك فاكر ان كل كيس دم بتتبرع بيه ممكن يخفف معاناة 4 أشخاص بعد فصل مكوناته وانك يوم القيامة هتلاقى دا مردود عليك ان شاءالله واحنا فى عرض كل حسنة أعتقد J.

فى ناس بتخاف من موضوع التبرع دا عشان الـ  safety measures فى مصر ما شاءالله عالية J لكن خلينا نقول ان اللى بيتبرع مش أحسن مننا ولو كنا خايفين من عدوى فدا مش معناه اننا مش نتبرع لكن معناه اننا نحاول نجتهد فى شغلنا بالقدر اللازم لمنع المخاطر اللى من النوع دا.. ونخلينا كمان واثقين انه طالما احنا بنعمل شىء فى سبيل الله مش ممكن أبدا يصيبنا سوء.. وكدا كدا اللى مكتوبله حاجة هيشوفها..

أنا مش هقول أكتر من كدا عشان مش أطول والرسالة ان شاءالله وصلت وأنا واثق ان بين زملائى من هو أكثر منى حرصا على حياة الناس ومن أكثر منى رغبة فى تخفيف آلام المرضى وأن الدعوة ستنتشر باذن الله وستأتى بمردودها..

فقط أسألكم ان أقتنعتم برسالة التدوينة أن تساهموا فى نشرها بين زملائكم.

والله الموفق