الديرما يا بشر و مشروع دكتور فاشل

الكلام اللى هكتبه فى التدوينة دى غالبا هيكون صادم حبتين لطلبة الطب أو أى دكتور بيشتغل يعنى فى المجال بتاعنا دا, لكن عموما هو دا اللى عندى..

بقى احنا ككائنات طفيلية فى كلية طب بيكون مننا ندرس بتاع ألف مادة على ما نتخرج وانا مازلت حتى الآن بتسائل عن الجدوى من دراسة بعض المواد بالشكل اللى بندرسها بيه دا.. و فى رأيى إن كلية طب محتاجة إعادة هيكلة جذرية عشان تبدأ تخرج دكاترة بدل ما هى بتخرج كائن undifferentiated كل المهارات اللى "قد" تكون عنده انه احتمال يكون بيعرف يقيس ضغط.. وبالطبع فى استثناءات اللى هى لا يقال عنها غير انها استثناءات.. لكن انا هنا هتكلم عن القاعدة العريضة.. ويمكن انزل عن مستواها شوية كمان عشان أوصل لمستوايا أنا :D

انا مش هتعمق فى تفاصيل لأن دى مقدمة فقط ويمكن بعد كدا ابقى اكتب تدوينة او اكتر عن كلية الطب من نظر طالب فاشل.. التدوينة دى أساسا عشان أحكى على المسخرة اللى حصلت فى امتحان الديرما بتاعى انهارده :).. أنا شخصيا انبسطت رغم انى مجاوبتش ولا سؤال ومكنتش عارف أى حاجة بس خرجت بضحك :D  أهو بقى تناحة كدا يعنى :D

الديرما دى(الجلدية يعنى) من البرانشات اللى انا لسه مش فاهم احنا بندرسها ليه.. يعنى هو فى كائن حى كاره نفسه واشتغل ديرما, طيب أنا مالى؟؟ ما هو اللى هيعالج حالات الجلدية.. أكيد مش جراح ولا ددكتور رمد مثلا هيحولوله حالات جلدية!(بالمناسبة انا بينى وبين الرمد خلاف عقائدى بس مش مجاله دلوقت :) )

انا كأحد الكائنات الحية مش بعرف انى احفظ حاجة انا مش فاهمها, ودا عادى فى ناس كتير كدا مش أنا بس وفى ناس برده بتعرف تصم اللى قدامها لو كان حتى كلام صينى هيحفظوه..

لكن كمان أنا مش بعرف أذاكر حاجة انا مش عارفلها مدخل من مخرج ولا فاهمها لمجرد انى محتاج الدرجات.. انا عارف ان دا هبل وانى بنقص درجات كتير جدا بسبب العك دا بس هو أنا كدا.. مش بعرف أذاكر حاجة مش شايفلها لازمة.. عشان كدا فى فروع كتير من الطب وقعت منى ومعرفش عنها حاجة تقريبا.. زى الرمد مثلا و الجلدية وغيرهم كتير يمكن مش فاكر..

ومش محتاج حد لطيف يقولى انى هبقى فاشل أو يعنى دكتور حمار زى ما بيقولوا لأن الآى كيو بتاعى كافى انى أعرف دى لوحدى..

الديرما لما جيت اذاكرها أول مرة حسيت انى بقرا كلام صينى والموضوع كان خراشو ع الآخر بالنسبالى وعبث لا يمكن السكوت عليه.. ولما دخلت الامتحان ولقيت نفسى مش عارف أحل كتير من ال MCQ اللى على الديرما أو يمكن معظمه عرفت انه من العبث انى أحاول حتى أذاكرها تانى..

عشان كدا لما جه وقت امتحان الأورال بتاع الديرما و الأندرو بدأت بمذاكرة الأندرو على اعتبار انه شىء قابل للفهم والتعامل الآدمى والحمدلله عملت فيه كويس بفضل الله تعالى.. ومكنت بصراحة ناوى اذاكر ديرما بس ضميرى بدأ يأنبنى على الساعة 10 بالليل كدا(ودا محصلش من زمان أوى.. ربنا يسامح اللى كان السبب بقى J ).. المهم قمت حاولت أقرى شوية حاجات فى الديرما وعرفت واتأكدت ان قرار عدم المذاكرة كان صائب تماما لأنه totally pointless..

المهم رحت الإمتحان انهارده وانا ناوى انى أقول للدكتورة انى مش مذاكر لأنى من النوع اللى مش بيحب يستعبط فى الامتحان.. عارف بجاوب مش عارف بقول مش عارف كدا واضحة وصريحة.. معنديش انا بقى الشغل بتاع والله لسه قاريها ومش  فاكر وهفتكرها واستنى بس يا دكتور والكلام دا.. فى داهية الدرجتين اللى الواحد هيتذل عشانهم وكفاية أوى سخافة انى أكون مش عارف..

هحكى بقى الإمتحان واللى حصل فيه ويكفى كمقدمة إنى أقول إن لو أنا اللى بمتحن نفسى ممكن لو هكرمنى أوى عشان أنا معرفة يعنى.. هدى لنفسى صفر كبير كدا وممكن يبقى صفر أوس 17..

- الدكتورة: قولى الـ primary lesion of petyriasis rosea..

- قلت: macule

لقيتها بصتلى كدا قلتها أيو الماكيول دا بتاع البيترايازيس فيرزيكالار.. مش عارف بقى بتاعت الروزيا.

- قالتلى طيب فكر كدا..

- قولتلها نوديول؟

بصتلى تانى فقلتلها مانا قلت لحضرتك انى معرفش!

- طيب الباثولوجى بتاع ال vitiligo

- جاوبت

- طيب ال theories بتاعته ايه؟

- قعدت أفتكر لأنى كنت قاريه بس مفتكرتش فقلتلها immune؟

 - قالتلى ايه طيب غير ال immune؟

- قلتلها معرش

- قالتلى طيب ليه العلماء قالوا immune؟

- قلتلها أكيد لقيوا autoantibodies :D

- قالتلى.. طيب أنتى باديز أجينست ايه؟

- قلتلها.. اكيد أجينست الميلانوسايت.

- قالتلى طيب أى أسباب تانية تعرفها؟

- قلتلها قلت لحضرتك معرفش!

- قالتلى طيب قول ال cells of epidermis

- قلتلها نعم؟؟!

- قالتلى السؤال تانى

- قلتها لأ معنديش أى فكرة الحقيقة

- قالتلى معندكش أى فكرة؟ طيب قوللى مش فاكر.

- قلتلها هكدب على حضرتك يعنى؟

- قالتلى طيب التريتمنت بتاع الهيربس زوستر؟

- قولتلها acyclovir  و systemic antibiotic عشان ال 2ry infection  و systemic antiallergic.(وبالمناسبة انا معرفش ايه التريتمنت انا كنت بقول كدا من عندى ومش ضامن ان الكلام دا ممكن يكون فيه اى حاجة صح)

- قالتلى.. acyclovir كدا؟ طيب ايه الدوز بتاعته؟

- قلتلها لأ معرفش.

- سألتنى سؤال تانى مش فاكره.. تقريبا قالتلى أوصف معرفش ايه كدا

- طبعا مكنتش عارف وقولتلها يا دكتورة انا ما ذاكرتش أصلا الـ آآآآآآآ.. ونسيت اسم المادة :D .. وبعدين افتكرت وقولتها الديرما

- قالتلى طيب انت كدا ريحتنى قوم بقى

بس وقمت ومشيت وانا مش متدايق على الإطلاق مع انى فى المعتاد بتدايق لما مش أجاوب كويس فى الشفوى(وانا نادرا ما بجاوب كويس يعنى) بس المرة دى مش متضايق وخرجت بضحك.

انا عارف ان الكلام دا ممكن يخلينى أنزل فى نظر ناس كتير من زمايلى بس اشطة مش دا اللى يهمنى ومش دا اللى بدور عليه ولا يفرق معايا أصلا J

وإلى لقاء قادم فى امتحانات أخرى إن شاءالله J