مساء الخير يا شباب، أنا زميلكم في الامتياز بس أنا مش من الدفعة بتاعتكم، أنا واحد من مجموعة القاهرة،بعضكم سمع عنا،وإحنا بدأنا امتيازنا قبلكم ب 6شهور.
في كلمتين بخصوص الامتياز عايز اقولهملكم، احنا أما استلمناامتياز كنا زيكم كده متحمسين و فرحانين وحسينا اننا أخيرا هنخلص من قرف الدراسة و الامتحانات و هنتنقل لمرحلة الشغل العملي والأفلام دي، لكن طبعا شفنا الحال عامل ازاي و عرفنا أول الامتياز و آخره و خصوصا إننا بدأنا باطنة.
أول ما أستلمنا كانت الدفعة اللي قبلنا في نص امتيازها و كنا شايفينهم منفضين في الحضور و الشغل و كده. و كنا زيكم مش فاهمين ومش عارفين ليه كده.
مع الوقت في الامتياز لاحظنا اننا فعليا مش بنعمل ولا بنتعلم حاجة غير اللي النواب محتاجين يمشوا بيه الشغل بتاعهم و بس ، يعني تلاقي النايب أول حاجة بيعلمهالك إنك تعمل ECG و تسحب Arterial blood sample لأن دا اللي هو محتاجه منك بس، و حتى مش هيعلمك ال interpretation بتاعهم إلا لو كان حظك كويس و النائب بتاعك حد بيفهم و مستعد يعلم.
مع الوقت هتلاقي ان يومكم في العنبر عبارة عن ديرتي بس، مشاوير للأشعة و المعامل و فيتلة حالات و بس، و دا بالذات في الباطنة. يمكن في حاجات تانية أحسن شوية زي الأطفال و بعض أقسام الجراحة زي التجميل مثلا.
دا مع الوقت هيخليك تزهأ و يكون الامتياز بالنسبالك أيام بتحاول تعديها و خلاص.
إحنا قضينا شهرين الباطنة نشتغل كل الشغل بتابع العمال و التمريض، كنا بنروح المعامل نودي عينات و أحيانا urine و كنا بنقف بالساعات عشان نحجز أشعة و نروح مع المريض يعملها و نستحمل سخافة النواب معانا و بس دا كل اللي طلعنا بيه من الشهرين.
حتى لما طلبنا من النواب يشرحولنا approach to hypertension and diabetes مشرحوش رغم اننا كنا بنشتغل زي العبيد و كنا اكتر قسم بيشتغل حوالي 56 ساعة غي الأسبوع. بس هو القسم كان سيء، كان GIT بالمناسبة.
شهرين النسا كانوا مفيش فيهم حضور ولا تعليم، النواب مش عايزين حد غير اللي عندهم بنك دم بس.
الأطفال كانت يمكن أفضل حاجة لغاية دلوقت و النواب عندنا في عيادة أمراض الدم كانوا محترمين جدا و لما بنسألهم في حاجة بيقولوا.
الخلاصة، فترة الامتياز غالبا هيضيع منك فيها كتير على الماضي، و النواب معظمهم مش هتطلع منه بحاجة تستحق، فخدها من قصيرها و شوف انت عايز تتخصص في ايه و روح المكان بتاعه اعرف النواب فيه و عرفه انك interested و اصبر شوية لحد ما يعرفوك و اتعلم و سيبك من الميري خالص.
