Daily Zalafy Quote I

من الملاحظ على كثير من شيوخ السلفية-ان لم يكن جلهم أو كلهم- انهم دايما فى خطابهم بيلجأوا للترغيب أكتر من الترهيب-باستثناء كام واحد قليلين أوى-..

انا كنت من كام يوم بصلى الطراويح وصادف ان اللى الامام كان شيخ زلفى.. عد أول ركعات اتكلم عن ضرورة مراقبة الله فى أعمانا خوفا من النار وخوفا من عقابه.. الى آخره

الغريب هنا ان الشيوخ بتوع الزلفيين ما لاحظوش لسه ان المسلم -وأخص بالذكر المصريين- محبين للدين جدا بطبيعتهم حتى لو ما كانوش يعرفوا عنه كتير..
يعنى تلاقى الفلاح البسيط اللى مش متعلم بيقول يلا نصلى دى الصلاة حلوة.. وتلاقى الانسان العادى ما بيشتكيش من الصيام فى الحر الجامد دا.. وتلاقى الناس بتحب يوم الجمعة وبتستنى رمضان وبتحب تروح تحج.. وبتحب تعمل عمرة وبتحب تقرا فى المصحف وبتحب تسمع كلام ربنا وبتحب تسمع شيوخ بتتكلم فى الدين..

يا ترى فى كام كلمة "بتحب-بيحب-حب" فى الجملة اللى فاتت؟
لو ركزنا شوية هنلاقى ان الناس بتعمل كل الطاعات دى بدافع الحب مش بدافع الخوف.. انا طبعا مش بارفض الخوف من الله عز وجل بالعكس.. "َادْعُوهُ خَوْفًا وَطَمَعًا" صدق الله العظيم
لكن اللى قصدته ان الشيوخ الأفاضل لو ركزوا على دافع الحب أكتر من دافع الخوف.. هيحققوا نتايج أحسن.. لأن الحب عاطفة أكبر من الخوف..
مثلا لو أم شافت ابنها وسط حريقة.. غريزة الأمومة ودافع الحب هيخلوها تنط فى النار تجيبه مع الانسان عنده خوف فطرى من النار..
شيوخ الزلفية بيدفعونا دفعا للخوف من الله وليس خشيته-أقصد هنا الخوف من المكروهات-.. فى حين انهم ممكن بتعديل بسيط جوهرى فى خطابهم يخلوا اتباعهم يحبوا الله ويحبوا الدين ويتعبدوا حبا وليس خوفا.. وعندما يحب الناس الله.. سيخشوه كما يريد جل وعلا وليس كما يريد مشايخ السلفية

...........

قبل محاكمة مبارك:

Twitter: #NoSCAF.. مبارك مش هيتحاكم, والمجلس العسكرى خاين وعميل.

بعد بدأ محاكمة مبارك:

Twitter: #NoSCAF.. دى مسرحية من المجلس العسكرى وهيطلع براءة, والمجلس العسكرى خاين وعميل.

بعد الحكم بادانة مبارك:

Twitter: #NoSCAF.. المجلس العسكرى هيتحايل من اجل عدم تنفيذ الحكم, والمجلس العسكرى خاين وعميل.

بعد تنفيذ الحكم على مبارك:

Twitter: #NoSCAF.. دى مسرحية جديدة واللى اتنفذ فيه الحكم مش مبارك, والمجلس العسكرى خاين وعميل.

بعد تحليل DNA لمبارك أو جثته واثبات انه بالفعل الرئيس السابق:

Twitter: #NoSCAF.. ............. , والمجلس العسكرى خاين وعميل

الشرك بالوطن... والكفر بالثورة

انهارده كان فى هاش تاج على تويتر فاجأنى بصراحة واتبسطت منه الى حد كبير.. كان اسمه #Ghaltetna.. انا للامانة ما استعرضتوش بس اصحابى كانوا بيرتوتوا منه تويتات كتيرة فشوفت كمية مش بطالة من التويتات اللى اتكتبت وللامانة أعجبت جدا بتويتات محمد دياب اللى لو ما كانش محمد دياب كان زمانه خسر الفولورز بتوعه بسببها.

التويتات كانت بتبين منحنى جديد فى تفكير أهل تويتر باعتبارهم رقم فاعل فى المعادلة فى المرحلة الحالية واتضح منه انهم بدأوا فعلا يحسوا بأخطائهم الواضحة واللى تجاهلوها لفترة طويلة فى نشوة الثورة والفرح بالقدرة على التعبير عن الراى السلمى والعنيف.

واتبسطت كمان من حاجة تانية متعلقة بيا انا لا مجال لذكرها هنا.

الهاش تاج دا فكرنى بتدوينة كانت فى دماغى من فترة طويلة وكنت عايز أكتب عنها بس مكانش فى وقت للأسف.

كنت عايز أتكلم عن نقطتين مرتبطين ببعض على طريقة المقدمات والتوالى..

فاما المقدمة فهى الشرك بالوطن وأما التوالى فكانت الكفر بالثورة.

اللى مراقب أداء الشباب فى فترة ما بعد الثورة على مدار الشهور السبعة الماضية هيلاحظ الحماس الكبير والرغبة المشتعلة فى الانطلاق بأقصى سرعة وعدم التوقف أو التأخر للحظة.. ولكن المتامل فى المشهد هيلاقى ان الشباب كانوا بيتحركوا وهما مش دايما عارفين هما بيتحركوا لفين ورايحين على فين.. فى ظل زخم الثورة ونشوة الانجاز الكبير اللى اتحقق فى 25 يناير بقى الشباب عايز ينزل الشارع كل يوم وكل لحظة.. مش مهم ينزل ليه لكن المهم انه ينزل.. ودا سلوك متوقع بعد فترة الكبت الطويلة دى.

المراقب المتأمل فى تحركات الشباب هيلاقى ان بد فترة وجيزة من الثورة بدأ يظهر عليها تغير كبير وجذرى. وهو ان اخلاص الشباب وانتمائهم تحول من الاخلاص للوطن الى الاخلاص للثورة.

هيجى حد يقولى-واتقالى فعلا كدة- طيب ما هو الاخلاص للثورة فى صالح الوطن واستكمال مصالح الثورة هو اللى فيه تحقيق الخير لمصر.

وهنا الرد الوطن والثورة مش شىء واحد ولا يمكن ان يمون شىء واحد ابدا..

الثورة شىء حدث مؤقت والطن حقيقة دائمة ما شاءالله لها ان تدوم.

الثورة "مطالبة" بحقوق مسلوبة و الوطن هو مكان يجب ان تحترم فيه الحقوق وتؤدى لأصاحبها.

الثورة يحتاج اشعالها الى "غضب" و الوطن يحتاج بناءه الى "عقل".

الفروق بين الثورة والوطن لا تعد ولا تحصى.. عشان كدا ما يصلح للثورة قد لايصلح بالضرورة للوطن..

عشان كدا تحول ولاءنا من الوطن للثورة لازم ياتى بنتايج سلبية على "الوطن والثورة" ودا اللى هنشوفه فى الشق التانى من التدوينة.

ويمكن المشهد الخاص بتقبل الشباب لرسومات رسام الكاريكاتير البرازيلى كارلوس لاتوف واللى معظمها فيه تعمد واضح لإهانة الجيش اللى هو شئنا أم أبينا رمز مصرى يجب على كل مصرى حقيقى أن يفتخر به ويدعمه ويزود عنه.. وكمان الأمر ما توقفش عند هنا لا دا فى أحد رسوماته وضع كلمة #JAN25 على الجزمة.. ومع ذلك الشباب احتفوا بالصورة ودا بيأكد كلامى ان تحول الإخلاص من الوطن الى الثورة بيعود بنتائج سلبية على كلا من الوطن والثورة.

قبل ما انقل على الشق التانى خلونا نفتكر ان الثورة دى ما قامتش عشان مبارك يتحاكم على التليفزيون ولا عشان الليبراليين يحطوا الدستور ولا عشان المنتسبين للإسلام يوصلوا للحكم.. الثورة دى قامت عشان الراجل اللى د. البرادعى قالنا عليه عنده 70 سنة وبينزل الجبل يجيب المياة اللى بيشربها يلاقى بعد كدا مياة فى بيته ويعيش عيشة تليق بسنه وآدميته.. خلينا فاكرين الكلمتين دول بس.

اللى بيحتك مننا بالناس العادية فى حياته اليومية بمختلف طوائفهم وايديولجياتهم ومستواهم الاجتماعى هيقدر بدون شك يعرف رأى المواطن العادى(ولا أقصد الفقير فقط) فى الثورة..

انا كنت فى مرة راكب ميكروباص من أكتوبر للتحرير بعد امتحانات التيرم التانى وكان وقتها فى اعتصام هناك والميدان مقفول.. الحوار اللى كان جوا الميكروباص كان كالآتى:

السواق: ربنا يحرقها الثورة دى واقفة حالنا وقاطعة عيشنا.

راكب: ما شفناش منها خير.

راكب 2: هيفضلوا وقفين حالنا كتير كدا؟

راكب 3: هما اللى هناك دول عايزين ايه؟؟.. حطوا دى بين قوسين لأننا بنسمع دايما هتاف الشعب يريد فى حين ان الشعب واضح انه ما عندوش فكرة عن ماذا يريد.

راكبب 4: والله أيام مبارك كانت أحسن.

دى مجرد صورة مصغرة لحال قطاع كبير من الشعب المصرى أهل النت بيتعامل معاه باستحقار وبيسموه الأغلبية الصامتة-اللى بالمناسبة ما هياش صامتة بس هما بيبانوا فى الجد.. نزلوا فى الثورة.. وشاركوا فى الاستفتاء وهنشوفهم فى الانتخابات.. يبقوا مش صامتين لكن بينتقوا وقت كلامهم ودا عين العقل-.. الصورة دى تمثل الشق التانى من المقال وهو: "الكفر بالثورة".. الناس فعلا كفرت بالثورة لما شافوا الاخوة اللى بيطلقوا على انفسهم ثوار أشركوا بالوطن.

ممكن جدا يجى حد يقولى بس دول 14 راكب ما يعبروش عن الشعب كله.. هقولك ماشى تعالى نشوف المواقف اللى تعبر عن الشعب كله:

..المليونيات اللى اتعملت كان بيشارك فى معظمها ملايين.. يبقى اذا الشعب مع "التظاهر" لتحقيق مطالب الثورة.

..اعتصام 8 يوليو كان قايم على 3000-5000 شخص وكلهم تقريبا من أهل تويتر.. يبقى اذا الشعب يرفض "الاعتصام" حتى لو من اجل تحقيق مطالب الثورة.

..اهالى العباسية دافعوا عن مقر القوات المسلحة ومنعوا المهاجمين من التعرض للمبنى.. يبقى اذا الشعب "يرفض" المساس بالقوات المسلحة(بما فيها المجلس العسكرى عشان الناس اللى بتحب تفرق بين الجيش والمجلس)

..اهالى التحرير ساعدوا الجيش فى فض الاعتصام الأخير وهو فى رايى أكبر ناقوص خطر يدق للأخوة اللى بيسموا نفسهم ثوار.. فقد ضاق بهم "الشعب" ذرعا وأصبح الواقع بيقول: "الشعب يريد.. اخلاء الميدان"

اللى ما اقتنعش بالصورة الأولى اللى عرضتها لازم يلتفت للصورة التانية والا ما يلومش غير نفسه لما يكتشف ان الشعب فى الانتخابات اختار من استطاع ان يفرض نفسه على الساحة فعلا باساليب شريفة كانت او ملتوية.

والله الموفق

حتى نكون مصريين حقا

"قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَنْ تَشَاءُ وَتَنْزِعُ الْمُلْكَ مِمَّنْ تَشَاءُ وَتُعِزُّ مَنْ تَشَاءُ وَتُذِلُّ مَنْ تَشَاءُ بِيَدِكَ الْخَيْرُ إِنَّكَ عَلَى كُلِّ شَيْءٍ قَدِيرٌ"

مش لاقى غير الآية دى ابدأ بيها كلامى نظرا لأنى هتكلم عن الرئيس السابق المخلوع بارادة شعب عانى طويلا من ظلمه وطغيانه هو وعصابته.

اقل من 48 ساعة هى المدة التى تفصل بين كتابة هذا المقال وأولى جلسات محاكمة السيد/ محمد حسنى السيد مبارك بتهمة قتل المتظاهرين اثناء ثورة يناير المجيدة وهى واحدة من تهم عديدة تنتظر الرئيس السابق.

وانا هنا لست بصدد الحديث عن المحاكمات فهى لا تقلقنى اطلاقا نظرا لثقتى الشديدة فى عظمة ونزاهة القضاء المصرى وارتياحى للمحكمة التى يحاكم امامها الرئيس السابق.

ولكن ما أريد الحديث عنه هنا هو أمر مختلف تماما.. بالطبع جميعنا شاهد الرئيس السابق بالملابس البيضاء فى المحكمة وكانت بكل المقاييس لحظة تاريخية تشفى كتير من نار القلوب اللى اكتوت بظلمه وفساد حاشيته. وكان ايضا حليق اللحية مصبوغ الشعر وكان شكله عامة فى حالة ليست سيئة.. وفى الواقع انا فرحت جدا بهيئته دى لأنى كان نفسى فعلا يطلع للمحاكمة بصورة تليق بينا كمصريين..

عشان ما اطولش على الفاضى. كل اللى عايز اقوله و دا رجاء من ابناء بلدى اننا ما نهينش الراجل وهو فى وقت ضعفه.. دى مش اخلاق الكرام واحنا المصريين اهل الكرم, مفيش داعى نتريق عليه او نشتمه او نشمت فيه.. احنا لينا عنده حق, والحق مكانه المحكمة ويتاخد بالقانون مش بالاهانة والشماتة(اللهم لا تشمتنا فى أحد من خلقك ولا تشمت فينا أحدا من خلقك).. حتى وان كان أذانا وظلمنا كتير فلازم نكون احنا أكرم منه ونعامله باخلاقنا لا باخلاقه.. والا ما يبقاش بينا وبينه فرق.

انا اتمنى ان الرئيس السابق يتحاكم محاكمة عادلة تماما وياخد فيها حقوقه قبل ما ناخد احنا حقوقنا ويتحكم عليه بما يمليه القانون لأن دا حقنا ولازم ناخده.. لكن انا بصراحة نفسى اننا ما ننزلقش لمنحدر اهانة راجل كبير فى السن واتذل بعد ما كان عزيز فى قومه.

انا بخاطب فيك الانسان.. زى ما انت ما تحبش تتهان مفيش انسان بيحب يتهان

انا بخاطب فيك المسلم/المسيحى.. دينك بيحضك على انك تواجه الاساءة بالاحسان.

انا بخاطب فيك المصرى.. العالم كله شهدلنا بالعظمة والتميز.. بلاش نقلل من قدرنا بأفعال هتسىء لينا قبلما تسىء لراجل بيودع ايامه الاخيرة.

وبقى انى أختم بجملة واحدة: "خصال الانسان الحقيقية بتبان لما يكون فى مركز قوة"

والله الموفق

الفلوس و 6 أبريل و موقف العبدلله

زمان ما كانش فى حاجة اسمها فلوس.. واقصد زمان اوى قبل ما يتم التعامل بالقطع المعدنية على نطاق واسع.. كان الواحد زمان يروح للحلاق يحلق ويديله موزة تمن الحلاقة.. او يروح للدكتور يكشف عنده ويدفعله جوزة هند تمن الكشف.. ولما يروح يخطب كان ياخد معاه جمل ولا معزة مهر للبقرة.. عفوا العروسة.

مع الوقت وتطور الحياة بقى نظام الـ barter system  دا ما ينفعش وكان لا بد من استحداث صورة جديدة للتعامل المادى بين البشر فكان صك العملة.

ونخلص من دا الى ان الفلوس هى فى حد ذاتها مجرد "وسيلة لتحقيق شىء".. يعنى انا لما بروح السوبر ماركت بدفع فلوس عشان آخد الحاجات اللى اشتريتها.. لكن مفيش حد بيروح يسيب فى الكاونتر فلوس ويمشى.

خلينا بقى فاكرين الكلمتين دول..

------------------------------

بالمناسبة نسيت أقول انى هنا هتعرض لمشكلة 6 ابريل الأخيرة ويمكن كلامى ما يعكبش بين قوسين الثوار فلو انت مش هتستحمل ما تضايقش نفسك وتكمل.

نرجع لموضوعنا..

من ايام طالعنا المجلس العسكرى بالبيان رقم 69 اللى جاء فيه تحذير من الانقياد وراء بعض المنظمات اللى بتتلقى تمويل خارجى وليها اهداف خفية وخص بالذكر حركة 6 أبريل.

"يا نهار مش معدى.. انت بتقول ايه يابو بندقية؟؟ 6 أبريل بتاخد فلوس؟؟ هزلت.. دا لا يمكن ولا يكون أبدا.. طب يا مشير يا مشير كلنا 6 أبريل."

البقين اللى عدوا دول كانوا رد فعل الشباب على البيان اللى صدر من المجلس الأعلى للقوات المسلحة وبدون حتى ما حد ياخد وقت للتفكير او البحث كان فيس بوك اتملى بصور حركة اوتبور.. عفوا حركة 6 أبريل وتحتها يا اما شتيمة فى المجلس العسكرى يا اما كلنا 6 أبريل الى آخره من الصور المعتادة اللى بقت تيمبليتس جاهزة عندنا ننفع نركبها على اى حاجة ان شالله حتى طهور.

انا بالنسبالى لما قريت البيان اتبسطت بيه جدا.. ليس كرها فى حركة انا شخصيا كنت بعتبرها الأفضل بين الحركات الموجودة فى مصر وأعرف منهم ناس كتير وليا فيهم اصدقاء وشاركت معاهم فى فعاليات رغم انى مش عضو فى الحركة.. لكن فرحت بيه لأن فى شوية مشاهدات بدأت ملامحها تظهر بعد الثورة كنت بقف عندها بخصوص الحركة:

. اعتراف اعضاء المكتب التنفيذى للحركة اللى كتير منهم ساب الحركة انهم سافروا بالفعل وتلقوا تدريبات على التغيير السلمى فى صربيا.. وهنا فى اكتر من مشكلة حسب الايديولوجى بتاع كل واحد فينا.. فى اللى هيشوف السفر مشكلة وفى اللى هيقول صربيا دولة كافرة وفى اللى هيقول ما اخدتونيش معاكم ليه دا فى هناك بنات حلوة.. لكن فى اللى هيقول.. ومين كان بيصرف عليكم؟

انا من بتوع مين كان بيصرف عليكم لأنى زى ما قلت فى المقدمة مؤمن ان الفلوس وسيلة لتحقيق هدف.. والهدف بيتحدد على حسب المصدر اللى بيطلع الفلوس.. الحركة مشكورة تفضلت وقالت ان سفرهم كان بناءا على دعوة من مركز canvas للحضور و ان اللى كان بيمولهم هو "منظمات المجتمع المدنى"..

طيب المنظمات دى بتجيب فلوسها منين.. الاجابة على السؤال دا ان تمويلها الرسمى بيكون جزء من المعونة الأمريكية اللى فى بندونها فى مخصصات لمنظمات المجتمع المدنى.. اما عن اللى تحت الترابيزة.. فمش هيختلف كتير عن اللى فوق الترابيزة.

يبقى الموضوع كالآتى.. أمريكا بتدفع فلوس لمنظمات المجتمع المدنى.. منظمات المجتمع المدنى بتمول سفر الشباب لمراكز هلامية شعارها الديموقراطية للتدريب هناك.. اللى بقى عنده ذرة يقين ان امريكا يهمها مصلحة مصر يبقى يصدق ان الداعى ورا دا خير.. دى اول حاجة.

.. تانى حاجة علاقة الحركة بمنظمة freedom house الأمريكية واللى اتضح بعد بحث ان اللى انشأوا المنظمة هما حبايبنا ولاد عمنا سام.. واللى برده معتقد ان ولاد عمنا عايزين مصلحتنا يبقى يصدق ان تدريبات فريدوم هاوس للحركة هدفها خير برده.

.. تالت حاجة.. الانشقاق اللى حصل فى صفوف الحركة بعد الثورة وتكون جبهة جديدة منشقة عن حركة 6 أبريل.. انا فاكر فى بداية الأزمة انى كنت بتكلم مع صديقة ليا على علاقة بعدد من شباب الحركة قالتلى ان سبب المشاكل اللى فى الحركة الحقيقى هو ان فى فلوس كتيرة دخلتلهم بعد الثورة والمشاكل بسببها.. لكن علشان الأمانة صديقتى ما حددتش مصدر الفلوس ولا طبيعة المشاكل.

اللى فات دا يمكن مش كفاية انه يقنع حد غيرى ان فى جهات بتشكل طريق الحركة لكنه كافى لإقناعى انا وخصوصا بعد آداء الحركة فى اعتصام 8 يوليو الأخير اللى كان واضح منه انهم نازلين لتنفيذ هدف محدد مرسوم بدقة عالية مهما كانت الظروف..

-----------------------------

فى النهاية أحب أقول كلمتين صغيريين..

حركة 6 أبريل كانت دايما بالنسبالى مصدر فخر ولما كنت بشارك فى فعالية معاهم كنت ببقى سعيد جدا وفخور أوى بدا واللى قرأ ليا قبل الثورة أكيد شاف مدحى ليهم فى أكتر من تدوينة.. لكن انا عمرى ما هحب الحركة أكتر من مصر.

تانى حاجة اللى عايز أأكد عليه هو انى مش بشكك أبدا فى وطنية اعضاء الحركة على الإطلاق.. انا واثق تماما ان شباب الحركة هما أفضل شباب فى مصر بجد وأكتر حد مستعد يموت علشانها.. بعد الجيش, وعلى مستوى قيادات الحركة فانا اعتقد ان فى منهم ناس فعلا وطنية اوى لكن ما اقدرش اثق فيهم كلهم لانى مش اعرفهم كلهم.

لكن الكلام اللى انا مقتنع بيه تماما هو ان الحركة mislead.. هما مش عملاء ومش خونة.. بس مضحوك عليهم.

وعشان تعرف الطريقة اللى بيتضحك بيها على الإنسان الوطنى عشان يؤذى وطنه وهو بيظن انه بيخدمها.. اتفرج على المقطع دا

ازاى تخلى الوطنى يخرب وطنه بايده