رغم كل القرف اللى الواحد فيه دلوقت بس بصراحة انبارح انا كنت فعلا مبسوط.. كان يوم حلو جدا ويوم مميز اوى.. جيس واى؟؟
انبارح كان عيد ميلاد الريس..
آه والله عيد ميلاد الريس بنفسه.. وبما انى اعرف الريس كويس جدا.. وعلاقتنا ببعض الحمدلله جامدة جدا.. وانا شخصيا بحبه اوى وبتعلم منه كتير جدا.. بتعلم من ذكائه وفطنته العالية.. بتعلم من صبره وحكمته.. ونفسى اتعلم من كرمه واخلاقه(بس دى صعبة شوية)..
انا لما شفت خبر عيد ميلاد الريس على النت.. بصراحة ما كنتش مصدق نفسى.. انا عارف انه كان فى الشهر ده بس ما كنت فاكر اليوم بالزبط.. لكن لما لقيت على النت انه كان انبارح.. عرفت ان انبارح هيكون يوم مش عادى..
كان احلى حاجة لما اتصلت بالريس اباركله..(آه والله اتصلت بالريس اباركله.. مش مصدقين ليه؟؟)..
-الريس: اهلايا ايرانت ازيك
-انا: اهلا مستر بريزيدنت.. واحشنى جدا
-الريس: وانت كمان والله اخبارك ايه؟
-انا: الحمدلله تمام... كل سنة وانت طيب يا سيادة الريس
-الريس: وانت طيب يا ايرانت.. خير؟
-انا.. انهاردة عيد ميلاد سيادتك.. ايه هما ما قالولكش؟
-الريس: (يضحك) لا والله انا كنت ناسى خالص.. انت يا ايرانت مفيش منك.. فاكر عيد ميلادآ(بصراحة انا اتكسفت اقوله انى عرفت الخبر من على النت.. كان هيبقى شكل اهلى زبالة اوى)
-انا: الله يخليك يا سيادة الريس ده بس من ذوقك...
--------------------------
ده نص الحوار اللى دار ينى وبين سيادة الريس فى التليفون.. شوفوا قد ايه الراجل متفانى فى خدمة البلد دى.. الراجل قدم البلد عليه لدرجة انه نسى عيد ميلاده الشخصى.. انا فعلا مبسوط بجد انى فى دولة ده رئيسها...
ادامه الله ذخرا للوطن....
--------------------------
بالليل بقى نزلت من الشقة انا وmr. X(مدير المخابرات.. وده شخص غامض انا شخصيا مش اعرفه بس كنت معاه) وكمان كان معانا وزير الصحة ورحنا للريس فى البيت بتاعه(على فكرة الريس ساكن فى شقة فى الدور التانى مش فى قصر زى ما الناس فاكرة.. آه والله).. ولقينا هناك هيئات دبلوماسية من الاردن وفلسطين واحتفلنا مع الريس فى حفلة على الضيق كده.. بس والله كانت جامدة...
--------------------------
وبعد الحفلة الجميلة تباحثنا فى بعض امور الدين والدينا وكانت الحرب هتقوم بس ربنا ستر وسفير الأردن قدر مع تدخل الريس انهم ينهوا الموضوع بسلام وحقنوا دماء المسلمين(بجميع طوائفهم) وهو نصر آخر يضاف لقايمة انجازات الريس..
ورجعت انا و مستر اكس البيت وكان وزير الصحة روح قبلنا.....
--------------------------
14/10/2009
المقال ده ان شاءالله هنشره فى الجريدة الرسمية(الدستور) سنة 2029
--------------------------
-الريس.. صديق عمرى بكل ما تحمله الكلمة من معنى.. د. محمد حسن... واما عن سبب تلقيبه بالريس فده لاننا بنجهز للحكم فى العسرين سنة الجاية واحنا بايعناه على خلافة مبارك(اذا كان مات وقتها يعنى)
-mr. x... ده يبقى ــ....بلاش احسن
-وزير الصحة.. احمد هانى
-الجالية الفلسطينية.. انصارى وعصام
-الجالية الاردنية.. عمر
-انا.. انا بقى بمثل المعارضه.. ورغم انى بايعت الريس ووعدته بتاييده لغاية ما يوصل للحكم.. فأنا متفق معاه انه بعد ما يستلم الحكم هكون انا المعارض الرئيسى فى دولته وفى الغالب هعمل ثورة عليه واقلب عليه الشعب
انا بس عايز اقول لمحمد كل سنة وانت طيب وربنا يوفقك فى الدنيا و يجعلك من رفقة الرسول (عليه الصلاة اولسلام) فى الجنة فى الآخرة باذن الله..
هناك تعليق واحد:
هههههههههههههههههههه تحفه بجد .. بس انا فقست الموضوع من الاول :)))
إرسال تعليق