سيول اسكندرية

للأسف البعض مش قادر يفهم ان في فرق بين تقييم الأوضاع و الإجراءات في الظروف والإمكانيات المتاحة وبين التبرير الأعمى ومحاولة اظهار ان كله تمام وان كله تحت السيطرة.

لأ انا مبقولش ابدا ان كله تمام.. بالعكس والله دا كله زي الزفت.. انا بس بقول ان الدولة ممثلة بشكل رئيسي في الرئيس والقوات المسلحة وبنسبة ضعيفة جدا الحكومة.. الدولة بتحاول تتعامل مع الأزمات التي لا تنتهي في ظل الامكانيات المحدودة المتاحة وفي ظل ضعف البنية التحتية الموجودة بالفعل.

في موضوع الأمطار احنا حاليا بنتعرض لسيول مش امطار طبيعية ودي كارثة بيئية مستحدثة مش حدث طبيعي متعودين عليه.. ودا نتيجة تغير مناخ المنطقة بالكامل والدليل تأثر اكتر من دولة في نفس الوقت بالأمطار الشديدة اللي تصل لحد السيول احيانا.. واللي مش عاجبه الكلام يشوف الكويت والاردن وعمان وتركيا وكندا.. كل دول غرقوا برده.. واكيد فيهم دول ان مكنش كلهم امكانياتهم أعلى وعندها تخطيط افضل مننا.. ومع ذلك برده غرقوا.. لأن دا حدث مناخي غير معتاد

طيب.. احنا جاهزين للسيول دي؟ لأ

طيب احنا جاهزين للأمطا العادية؟ فيما يبدو انه للأسف لأ ودا قصور من الدولة لكوه نااج عن تراكمات سنوات طويلة لا يصح ان يسأل عنها النظام الحالي.. في العام دا على الأقل

طيب هل الدولة بتواجه السيول دي؟ ايوة

الدولة ممثلة في القوات المسلحة والشرطة وبقايا المحليات بتواجه الظروف المناخية دي بالامكانيات المتاحة واللي ينكر دا يبقى جاحد

لما نشوف الجيش بيسحب المياة من الشوارع الغرقانة في اسكندرية في ظرف 24 ساعة

ولما نشوف ظباط شرطة وجيش بيسلكوا المجاري والصرف بايديهم يبقى تسلم ايديهم فعلا وتبقى الدولة بتواجه الظروف المستجدة دي في ظل الامكانيات المتاحة

لما حضرتك تيجي تنكر الجهود المبذولة دي تبقى انسان غير منصف او غير موضوعي او احمق او خاين على الترتيب 

لما تيجي تقارن بينا وبين دولة فائض ميزانيتهاواكتر من ميزانيتنا كلها تبقى حاجة من دول

من الآخر دي دولتك ودي ظروفها.. يا تستحمل وتساعدها انها تجتازها ولو بالدعم والكلمة الطيبة.. يا اما تغور في ستين داهية وصدقني محدش هيفتقدك ولا هتفرق مع حد هنا.. ولا هتفرق برا.. دا اذا عرفت تطلع يعني

اه على فكرة.. الافندية اللي بيقولوا نفسنا نطلع ومش عارفين

انت مش عارف تطلع ببساطة عشانك ولا حاجة وملكش قيمة ولا وزن.. لو كنت شخص ليه قيمة وممكن ينتج كانوا هما اللي اخدوك برا مكانوش استنوك لما تحاول تطلع

وجودك هنا مع رغبتك في الخروج دا شيء بيعني انك مش اكتر من حمار.. لا مؤاخذة يعني

تدوينة عن مدونتي :)

اما عن واحدة من أكبر متع الحياة بالنسبة لأي مدون, فهي انه يدخل بين وقت للتاني يتفرج على المدونة بتاعته ويقلب في ارشيفاتها ويفتكر كلمة كان كاتبها هنا او تدوينة كان حاططها هناك او رأي اتبناه في فترة من حياته في وقت تكوين شخصيته :)

مدونتي يمكن مش عليها اقبال كبير لأني مبهتمش بالنشر ولأني للأسف مبفضاش اكتب من بعد الكلية(الواحد كان عنده كمية فراغ ايام الكلية يكفي لكتابة تاريخ مصر من اول ما كانت ازازة الكولا باتنين صاغ)

كل زوار مدونتي على بعض مكملوش لسه 29.000 زائر من وقت اطلاق اول تدوينة ليا في 31 أغسطس 2008 في سنة أولى كلية أو قبل ما تبدأ بأيام مش فاكر بصراحة ودا طبعا عدد بسيط جدا.

المهم اني سعيد جدا بالمدونة بتاعتي وفخور بكل حرف وكل رأي وكل موقف سجلته فيها وبعتبرها حتى الآن الإنجاز الشخصي الأقيم في حياتي.

-------------------------------------------------------------------

على الهامش:

زمان من 2011 وقت مشروع التغيير كنت حاطط في الـ side bar صورة للبرادعي وعامل كورنر تاني ليه مجمع فيه لينكات للتدوينات اللي كتبتها عنه (واللي بالمناسبة واحدة منهم طبعتها حركة 6 أبريل قبل الثورة ووزعت منها آلاف النسخ بموافقتي وهي حاجة انا مش ندمان عليها اكيد لأن وقتها كانت رؤيتي مختلفة شوية عن دلوقت).

من كام شهر شيلت صورة البرادعي واستبدلتها بصورة لجندي مصري بيدوس على كلمة اسرائيل.

وانهارده شيلت الكورنر بتاعه برده من السايدبار لأنه بمواقفه في آخر سنتين أثبت انه غير جدير بالمكانة دي.

أما المقالات اللي كتبتها عنه هحتفظ بيها في مكانها لأنها بتسجل فترة من حياتي أنا ومراحي تطور شخصيتي ورؤيتي لشؤون الدولة.

#عن رواية "الفيل الأزرق"

انتهيت اليوم من قراءة رواية "الفيل الازرق" للكاتب المصري أحمد مراد بعد ما منحتني ظروف طارئة بعض الوقت في المنزل فضلت استغلاله في إعادة شحن بطارية القراءة في مخي والتي نضبت منذ زمن طويل..

في البداية تجدر الإشارة لأني لست من معجبين أحمد مراد و في رأيي هو أحد مرتزقة عالم ما بعد الثورة في مصر والذي استطاع استغلال الخط الشبابي المتفجر في الشارع المصري لصالحه و قدم منتجات بها مقومات النجاح "في مثل هذا السوق" 

اما عن سبب قرائتي للفيل الازرق بعد فترة ليست قصيرة من صدورها فهو اعجابي بالفيلم المصور عن أحداث الرواية و اقتناعي بأن جودة الفيلم تعود للمخرج و ليست للكاتب صاحب الفكرة، ففضلت قراءة الرواية حتى أتبين، أما عن سبب مشاهدتي للفيلم في الأساس فيرجع لمزيج سخيف من الفراغ والفضول.. 

لعن الله الفراغ و الفضول!! 

--------------------------------------

أحمد مراد يدرك جيدا انه لا يمتلك مقومات مقومات الكاتب التي تعينه على النجاح في سوق الأدب، ولا مقومات الأديب التي تعينه على إبداع عمل أدبي ذي قيمة عالية يكون مآله أرفف المكتبات في زمن شبابه لا يقرأ أكثر من بوستات "أساحبي"  على الفيس بوك.. 

لذلك عمد مراد لتقديم ما لا يستحق القراءة لمن لا يجيد القراءة طمعا في نشر سلعة فاسدة في وسط لا يقل فسادا سعيا لأرباح مادية بحتة و مكانة زائفة في وسط تائه يبحث عن قدوة تناسب أفكاره و اسلوب حياته...

في الرواية اول ما يفاجأك هو عدم قدرة مراد على المحافظة على لغة عربية سليمة في نصوصه.. 

فهو تارة يكتب بفصحى ركيكة و تارة يكتب بالعامية في عجز واضح عن الإحكام على زمام اللغة، و هي نقطة يدرك جيدا انها لن تشكل أزمة في تلوسط الذي يستهدفه.

أما عن ثاني ما يستوقفك في اسلوبه فهو ما يبدو أنه فهم خاطيء لديه لقيمة التصوير في التعبير، فهو لم يترك كلمة واحدة كتبها دون أن يضع لها صورة حتى صارت صوره تكفي لعمل كتاب بمفردها (متيبس كتمثال أثري)، (طنين كألف مدفع)، (رائحة فمي كمؤخرة خنزير ميت)...  إلى آخرها من الصور التي فاقت الحد المطلوب و المسموح وانتقلت إلى حد السخافة.

أما عن ثالث ما يستوقفك فهو اللعنات المتواصلة على فم يحيى الشخصية الرئيسية في الرواية فهو يلعن كل شيء و اي شيء دون أن تفهم سبب حقيقي لذلك.. 

على نفس النسق كتبت بالأعلى (لعن الله الفراغ و الكسل)

اما عن رابع ما يلفت نظرك في الرواية فهو استخدام الإباحية بشكل مرتبك، ففي بداية الرواية كان أقرب إلى التحفظ في الألفاظ و التعبيرات، في حين صار أكثر ميلا للتصريح في ربعها الأخير، و بين هذا و ذاك تراه مذبذب بين التحفظ و التصريح بشكل يشف عن استخدامه للاباحية كعامل جذب للقارئ ولاضفاء لمسة شبابية متمدنة(او هكذا ظن)  على كتابه كما نرى في الافلام العربية الرديئة التي يصفها اثحابها خطأ بالجريئة،، مع التأكيد أن كل هذا القدر كان في غنى عنه و بدونه ستصل فكرة الرواية كما وصلت به.

أما عن خامس نقاط النقض فهو ما يظهره الكاتب من عدم تمكنه من مقومات المشهد الذي يصوره.. 

فمثلا، عندما يصور مشهدا من التاريخ القديم (فترة المأمون)  تراه يستحضر كل ما يتخيله عن الفترة من مظاهر ويضعه في المشهد، فتراه يصف لك البيت بغرفته و اثاثه و خدمه و السوق خارجه برواده و احواله و... و... و... 

الكثير و الكثير من التفاصيل اذا اضفت اليها التصوير المبالغ فيه تشتت القاريء عن الفكرة الرئيسية للفقرة..

الرواية في مجملها لا تستحق الضجة المثارة حولها كعمل ادبي، و لكن تم التسويق لها بشكل جيد.. 

الرواية مكتوبة بطريقة تجعلها تصلح أكثر ك"سكريبت" لفيلم أكثر منها رواية.. 

في ظروف مغايرة لم أكن سأتحمس لاكمال الرواية و كنت على الأغلب سأعزف عن قرائتها بعد أول مائة صفحة و لكني كنت مدفوعا بشغفي للمقارنة بين الفيلم الجيد و الرواية التي كنت على يقين من تردي مستواها بالنظر لكاتبها و أحمد الله أن لم يخب ظني.. 

و أخيرا تحية مستحقة للمخرج مروان حامد على الإخراج الأكثر من رائع و الذي اجاد فيه كأفضل مخرجي هوليود بالنظر لامكانيات التنفيذ و الانتاج المتواضعة.. 

شباب الجامعات عزيزي القاريء

نظرا لاستشعارهم الحرج.

ونظرا لاستشعارنا القرف.

ونظرا لطعم الدم.

ونظرا لإحساس الألم.

قررت أكتب تدوينة عن شباب الجامعات من واقع خبرتي كأحد شباب الجامعات المتخرج حديثا.

طبعا كلنا متابعين الأحداث اللي بتحصل في الجامعات المصرية منذ نهاية العام الماضي واللي استمرت مع بداية العام الحالى وحتى وقت كتابة هذه الكلمات.

وكلنا شوفنا التخريب اللي بيحصل في الجامعات المختلفة من تكسير بوابات وزرع قنابل وتعدي على أفراد الأمن وتعطيل لحركة الدراسة وفي العام الماضي شفنا طلبة الإخوان في جامعة الأظهر وهما بيرموا أجهزة الكومبيوتر من الشبابيك.

حاجات كتير حصلت في الجامعات لا تتفق ابدا مع روح العملية التعليمية..

ولا يمكن انها تصدر بأي حال عن طالب رايح تعلم وكل شغله الشاغل هو الدراسة..

ورغم كل دا بيطالعنا الإعلام والشباب على النت بكلام يعبر عن الاستياء من رفض المجتمع لمثل هذه الأحداث وللتعامل الأمني من قبل الدولة معاها, رغم انها مسؤلية الدولة انها تأمن الطالب اللي رايح يتعلم من أي مخرب حتى لو كان المخرب دا زميله في المدرج.

الإعلام والشباب على النت بيستهجنوا تواجد قوات أمن للسيطرة على الشغب والتخريب في الجامعات ويقولولك رايحين يموتوا الطلبة..

طيب ما تيجي نلقى نظرة على الطلبة دول عن قرب ومن داخل الحرم الجامعي نفسه..

- الشباب الجامعي عزيز القاريء مبقاش بيصحى من النوم بدري عشان يلحق محضراته, بقى بينزل الجامعة وقت ما يصحى وخلاص.. ما هو كدا كدا مش رايح يحضر.

- الشباب الجامعي عزيزي القاريء مبقاش بينزل بلبس لائق بوضعه العلمي والأدبي, بقى بينزل ببنطلون ساقط مبين نص الأندروير اللي غالبا بيكون فوشيا او احمر.

- الشباب الجامعي عزيزي القاريء مبقاش بيدخل من باب الجامعة يروح مدرجه, بقى بيدخل من باب الجامعة على الكافيتريا يقعد مع صحابه الشباب الجامعيين برده او يقابل صاحبته.

- الشباب الجامعي عزيزي القارىء مبقاش بيقعد مع زمايله يتكلموا في الدراسة او يناقشوا كتاب لنجيب محفوظ او طه حسين او د. مصطفى محمود, بقى بيقعد يتكلم مع صحابه في البت رانيا اللي كانت جاية انهارده ونص هدومها الجوانية باينة او البت دعاء اللي بتنزل تشيش مع الواد محمود في كافتيريا نو سموكينج برا الجامعة او الواد كريم اللي كل يوم والتاني آخد معاه بنت شكل على البيت وهو مروح..

المحترمين منهم بيتكلموا في ماتش برشلونة وريال مدريد اللي فات.

- الشباب الجامعي عزيزي القاريء لما بيقابل بعضه مبقاش بيقول بونجور او صباح الخير او حتى ازيك, بقى بيقول مبتردش على أمي ليه يابن الـ****.

- الشباب الجامعي عزيزي القاريء مبقاش مشروبه المفضل فنجال من الشاي او القهوة بينما يتدارس في كتبه, بقى بيشرب سيجارة حشيش مع حبايتين ترامادول.

والمحترمين منهم بيشربوا سجاير سادة او حتى شيشة.

- الشباب الجامعي عزيزي القاريء مبقاش بيقعد يذاكر في دروسه عشان يتعلم وينجح, بقى بيجتهد في تصغير الملخصات بتاعت الكورس وعمل "براشيم" يدخل بيها لجنة الامتحان عشان شايف ان كدا اسهل.

- الشباب الجامعي عزيزي القاريء مبقاش بيخرج من الجامعة يروح على بيته يشوف دروسه, بقى بيخرج يمشي مع صحابه الشباب الجامعيين يرخموا على بنات الجامعة او قدام مدارس البنات او يخرجوا في طلعة تحرش جماعي أو يظيطوا في مظاهرة معدية.

المحترمين منهم بيروحوا يلعبوا بلاي ستيشن او سايبر او يقعدوا على قهوة.

- الشباب الجامعي عزيزي القاريء مبقاش هدفه بعد الكلية انه يخلص ويطلع يرد جميل بلده اللي علمته وعملت منه بني آدم, بقى كل أحلامه يخلص ويمشي من البلد بنت ستين **** دي اللي مش بتديله حاجة على حد تعبيره.

حضرتك الشباب الجامعي اتغير جدا عن الصورة اللي كانت ايام اساتذتك واساتذتي..

بس هي دي الصورة اللي الاعلام وقف عندها وبيتعامل معاها على انهم عليها..

ودي الصورة اللي الشباب بيطالب يتعامل على انه عليها رغم انه نقيضضها تماما بل واسوأ..

طيب انا مرة حصللي موقف مع احد الشباب الجامعيين برده

كنا في امتحان وبعد ما خلصنا سألني احد الزملاء:

- ها عملت ايه يا سولوم؟

- والله الحمدلله يابو علي.

- لا يا راجل ملكش حق اللجنة كانت حلوة, اوعى تقوللي محليتش.

- ما انت عارف انا مش بغش يابو علي.

- طيب وبتعمل كدا ليه؟؟!!

طبعا الصورة دي لا تنطبق على جميع الشباب الجامعيين, لكنها تنطبق على فئة كبيرة منهم مختلفة في خلفياتها الثقافية والاجتماعية و "العقائدية"..

---------------------------------------------------------------

في شوية نقط أساسية لازم نقف عليها بخصوص الموضوع دا.

1. الجامعة والمدرسة منشآت وجدت وبيتصرف عليها من اموال الشعب, وانشأت عشان تعلم النشأ وتخرج أجيال تقدر انها تضطلع بأمور الوطن وتنتشله من كبواته وتنهض بيه.

2. اي عمل يتضمن شغب او تخريب للمنشآت والممتلكات او تعدي على أفراد او تعطيل لسير العملية التعليمية بغض النظر عن السبب فهو أمر مرفوض تماما لأن في ناس برده بتبقى رايحة عايزة تتعلم وتأمينها حق ليها, فضلا عن ان الحاجات اللي بتتخرب دي معمولة بأموال الشعب و بتتصلح من اموال الشعب ومن حق الشعب ان يتم الحفاظ على حقوقه وممتلكاته.

3. أي فرد يقوم بأي من الأعمال السابق ذكرها فهو يدخل تحت نطاق "الإرهابي" أو "البلطجي" بغض النظر عن تعليمه وشهادته ومستواه الاجتماعي..

الألقاب بتكتسب بالأفعال مش بالأنساب..

يعني على سبيل المثال الطبيب اللي بيهمل في حق مريضه بيبقى مجرم برده ومش بيحميه من اللقب دا انه خريج هارفارد.

4. واجب الدولة.. مش بس من حقها.. لأ دا واجبها انها تأمن منشآت الوطن مهما تكلف دا من جهد, وواجبها منع الشغب.. مهما تكلف دا من دم.

5. مصر لن تسقط ابدا ان شاءالله مهما تكالب عليها الكلاب المسعورة.

رحم الله شهداءنا

والله الموفق

bad day at work

1st day of Adha Eid. 2014.

الدكاترة البنات والجلدية

مبدأيا البوست دي مش هتعجب اخواتنا البنات (:3

البنت من دول تنزل دح طول الثانوية العامة ولا دودة البرتقان في شجر الجوافة لحد ما آخر السنة تجيب المجموع الفضائي وتدخل كلية طب.. (1)

نفس البنت من دول تفضل طول الست سنين تحرت في الكتب وتدح برده زي الجراد في محصول الغلة لحد ما على آخر الست سنين تكون جايبة عدد امتيازات اكتر من عدد المواد نفسه.. (2)

نفس ذات البنت بعد مواسم الدح الطويلة اللي فاتت دي تطلع تقولك انها عايزة تشتغل جلدية.. (3)

نفس ذات البنت كانت السبب في ان تنسيق كلية طب يبقى ب 99% بعد ما كان 70% ايام ما كانوا البنات بيتجوزوا ويقعدوا في البيت

ونفس ذات البنت كانت السبب في ان ولد مجتهد جايب في الثانوية 73.8% ميدخلش طب بسبب ارتفاع التنسيق.. (4)

يبقى اذا من (1) و (2) و (3) و (4) نلاقي ان البنات كانوا سبب مباشر في تدمير حياة الولاد المستقبلية وكل دا عشان يشتغلوا في الآخر لا مؤاخذة.. جلدية (:3 (:3 (5)

طيب ليه البنات بيجروا على الجلدية؟

لأنها بداية ملهاش علاقة بالطب من ناحية ومن ناحية تانية شغلها مفيهوش نبطشيات ولا تعب وميتطلبش حتى انها تكون عارفة حاجة اكتر من اسامي الكريمات اللي بتستخدمها بالتبادل يمكن واحد فيهم ينفع عملا بقاعدة: عك وليس كله كويس.

اما عن السبب التاني والأهم اللي بيخليهم عايزين يشتغلوا جلدية ان كل واحدة فيهم عايزة تطلع أمينة شلباية اللي جواها..

الجلدية دلوقت انتقلت من علاج الامراض الجلدية الى ما يسمى بالبادي كير

دكتورة الجلدية دلوقت شغلها بقى عبارة عن ازالة شعر زائد على تفتيح لون بشرة على ازالة هالات سودة حول العين والفم وصوباع الرجل اليمين..

ودي حاجات للمتأمل مش محتاجة على الإطلاق أدني قدر من الدراسة الطبية وممكن لو أخدت قورص مكثف في مجلة "سيدتي" او اتفرجت كل يوم 37 ساعة على قناة "هي" تبقى كفاءة في مدة شهر (6)

يبقى اذا من (5) و (6) نكتشف انه لازم يصدر قرار بمنع البنات من دخول كلية طب من الأساس.. سيبونا ناكل عيش بقى

عيادات الجلدية قريبا اعلاناتها هتكون كدا:

"دكتورة/ ناني هيثم تامر

د. شهادة معتمدة من كوافير سوسو بالمعادي

تفتيح البشرة وازالة الشعر الزائد وتقشير البشرة بالليزر

يوجد لدينا قسم خاص للعرائس مجهز بمجموعة من افضل طرح الزفاف

يوجد لدينا قسم خاص بالمحجبات

العيادة مستعدة لجميع انواع المناسبات واعياد الميلاد

الباكدج تشمل سبع صور مجانية هدية مع المصور الفنانtatta7 PHOTOGRAPHY عند الشجرة اللي جنب ترعة المحمودية

هدايا ولعب للأطفال"

عن شباب الإخوان.. اعرفنا صح

ورغم انه عهد انقضى الى زوال بلا رجعة ان شاءالله ابدا بس في كلمتين في الحارة المزنوقة لازم يتفكوا بقى:

كانت الناس دايما تقولك شباب الاخوان محترمين ومهذبين واول صف في المساجد والهري الكتير دا..

طيب تعالوا نستعرض عمل شباب الاخوان في الفترة اللي اختبرناهم فيها:

بعد الثورة مباشرة انشق شباب الاخوان عن رفقائهم في الميدان وأئتمروا بأوامر الجماعة كالمعتاد واللي كان من ضمنها "تخوين" رفاق الميدان في أكتر من موضع..

ودي كانت أول صفة.. #الغدر

بعدها بفترة قصيرة وقت وثيقة السلمي كان الاخوان محتاجين الزخم الثوري لمعارضة الوثيقة فأطلقوا شبابهم وسط الشباب الثوري مرة تانية لدفعهم لرفض الوثيقة وهو ما استجاب ليه الشباب الثوري بالغباء المعهود بتاعهم واللي انعكس عليهم هما نفسهم بعد كدا بخساير جمة كان ممكن يتفادوها لو ايدوا الوثيقة.

ودي كانت تاني صفة.. #النفاق

 بعد وصول مرسي للسلطة انطلق شباب الاخوان على المعارضين بالهجوم اللفظي والمعنوي والبدني وحصل اول اشتباك بدني عند مجلس الشعب لما قالوا: "احنا نازلين نحمي المجلس" وضربوا الشباب اللي كان هناك

ومن بعدها توالت الاشتباكات عند المحكمة الدستورية والاتحادية واحد واتنين

طبعا دا غير العمليات الارهابية المنظمة اللي نفذتها الجماعة قبل واثناء وبعد فترة رئاسة مرسي واللي تمت بايد كوادرهم الأعلى المدربين..

ودي كانت تالت صفة.. #الإرهاب

وقت اعتصام رابعة شفنا من شباب الاخوان اسوأ انواع الأخلاق والسباب والقذف والكـــــــــــــــــــــــــــــــذب المتوالي والمتكرر على مؤيديهم قبل معارضيهم..

والكذب كان ممنهج ومعلوم ومقصود وبالأوامر

ودي كانت رابع صفة.. #الكذب

بعد ما مرسي غار في داهية انطلق شباب الاخوان في حالة frenzy حقيقية وانطلقوا على كل مقاومات الدولة بالكذب والبهتان والسباب اللي تطور ووصل لحد السباب البذيء والكلام القبيح الذي لا يتفق لا مع دين ولا مع أخلاق..

وشفناهم بيعملوا حملة "#انتخبوا_*****" عن المشير السيسي مصحوبة بفتاوى بضرورة الاشتراك في الحملة القبيحة دي وان دا قربان الى الله عز وجل..

وشفناهم كمان في فضيحة المحلة لما قعدوا ينشروا فيديوهات اباحية مصحوبة برده بفتاوى بان نشرها نصرة للدين وقربة الى الله.. ودا مش عجيب من شيوخهم اللي بيتدينوا بدين الشيطان وليس دين الإسلام

ودي كانت خامس صفة.. #السفالة

ولو جينا نتكلم عن بنات الجماعة المسلمات المؤمنات العفيفات المحجبات المخمرات..

هنلاقي انهم مختلفوش كتير عن ذكور الجماعة

فيديوهاتهم وهما بيرقصوا في الشوارع احتفالا بمرسي موجودة

وفيديوهاتهم وهما بيسبوا السيسي بعد الانكيلاب موجودة

وفيديوهاتهم وهما بيمارسوا البلطجة في جامعة القاهرة والازهر موجودة

واللي عايز يعرف حقيقتهم يدخل تويتر ويشوف ال.. لا مؤاخذة "الاختلاط" بينهم وبين الشباب المنتمى للجماعة والهزار والانتمة.. وكله طبعا بما لا يخالف شرع الشيطان

ومساهماتهم في هاشتاج "انتخبوا_*****" منورة شاهدة على حسن تربيتهم وطيبة نشأتهم وسمو اخلاقهم وعفتهم.

=========================================

من كل ما سبق نستنتج ونفهم ان شباب الاخوان مش مؤدبين ولا مهذبين ولا متدينين ولا حاجة

انما التدين والتهذيب دا كانت اوامر تبعا لمتطلبات المرحلة

تبعتها مراحل من البلطجة والنفاق والسفالة والكذب برده بالأوامر..

يعني اذا هما سلوكهم واخلاقهم بيتحكم فيهم الأوامر مش الوازع الديني ولا الأخلاقي

يعني اذا معيارهم التربوي كان الطاعة وليس مكارم الأخلاق زي ما البعض متصور

يعني اذا هما مش متدينين ولا مهذبين ولا اول صف في المسجد ولا حاجة وكل دي كانت مجرد "ستارة" الجماعة بتستخبى وراها وبتخفي وراها وجهها القبيح.

دول هما شباب الجماعة.. اللي شايف انهم شباب مهذب ومتربي وصف اول في المساجد يا ريت يربي ولاده انهم يطلعوا زيهم والا ميصدعناش بقى بأدبهم.

واختم التدوينة بمقولات مختارة من كلام سيدنا الفاروق عمر بن الخطاب-رضي الله عنه وأرضاه-:

قال عمر رضي الله عنه : أخوف ما أخاف على هذه الأمة ، من عالم باللسان ، جاهل بالقلب .

كان عمر رضي الله عنه إذا رأى أحداً يطأطئ عنقه في الصلاة يضربه بالدرة ، ويقول له : ويحك ، إن الخشوع في القلب .

قال عمر رضي الله عنه : لا تنظروا إلى صيام أحد ولا صلاته ، ولكن انظروا إلى صدق حديثه إذا حدث ، وأمانته إذا ائتمن ، وورعه إذا أشفى .

كتب عمر رضي الله عنه إلى سعد بن أبي وقاص رضي الله عنه : 

يا سعد ، إن الله إذا أحب عبداً حببه إلى خلقه ، فاعتبر منزلتك من الله بمنزلتك من الناس ، واعلم أن ما لك عند الله مثل ما لله عندك .