- يلا يا أبونا هنتأخر.. الليلة عيد والدنيا هتبقى زحمة.
= صبرا يا بولس يا ابني.. الرفق.. الرفق ما كان في شيء إلا زانه
- !!! آآآآآ ماشي يابونا.. اخيرا هنروح الكاتدرائية الجديدة ونفتتحها.. ياه يابونا دي هتبقى لحظة جميلة اوي و....
= بس يا بولس يا ابني احنا مش رايحين الكاتدرائية
- نعاااام؟! اومال هنروح فين؟
= احنا بإذن الرب هنطلع على مسجد الفتاح العليم
-
=مالك يا بولس؟
- ممممم مفيش يابونا.. وماله.. نروح المسجد.. هنقابل الريس اكيد هناك ونطلع الكاتدرائية نفتتحها ونصلي في ليلة العيـ.....
= لا يا ابني.. احنا هنروح نفتتح مسجد الفتاح العليم
- #&&#(_&# %
= أيوة زي مبقولك كدا.. هنفتتح المسجد ونحضر صلاة العشاء بإذن الرب
- هاه!! وماله يابونا.. واهو بالمرة نصلي ركعتين تفاريح
= اسمها تراويح يا ابني.. دي بتاعت رمضان.. ليس الآن
- ليس الآن ايه يابونا.. في ايه انا مش فاهم حاجة.. اومال مين هيفتتح الكاتدرائية
= عمك الشيخ الطيب يا ولا
- عمي الشيخ الطيب مين يابونا
= عمك الشيخ أحمد الطيب شيخ الأزهر.. هيفتتح الكاتدرائية ويلقي خطبة "رب الأمجاد تقدس في السماء"
- آه.. وماله.. وماله.. واهو بالمرة يباركله كام جابنيوت
= يلا يا بولس يابني.. القساوسة والشمامسة كلهم مستنيينا في المسجد
- طيب مش هناخد معانا هيئة كبار العلماء بتوع دار الإفتا؟
= لا يا ابني دول سبقونا على الكنيسة واحنا هنخلص ونروحلهم عشان نلحق نسمع أسماء الله الحسنى في الافتتاح
- نسمع ايه يابونا؟؟
= أسماء الله الحسنى يا بولس يابني
بولس يابني.. بولس.. انت مالك يابني.. بولس
- أنا.. أنا.. أنا.. أنا أنا أنا أنا أنا أنا
أنا مش عارفني أنا تهت مني أنا مش أنا
===========================
الصورة الرائعة اللي اترسمت في مصر امبارح مش ممكن تشوفها في اي مكان في الدنيا غير عندنا وحصريا فقط
رغم كل محاولات زرع الفتنة و شق الصف في مصر من قبل ٢٠١١ كمان إلا ان ربنا الحمدلله حافظ البلد دي بحفظه وبأمانه
ويرجع الفضل في دا للعقلاء من قادة الوطن وعلى رأسهم القائد العظيم الرئيس السيسي اللي اشتغل كتير جدا على ملف الفتنة الطائفية من أول تصدره للمشهد بعد ٣٠ يونيو
وطبعا فضيلة الإمام الأكبر الشيخ أحمد الطيب بكل سماحته و استنارة عقله وتفهمه لدينه و ظروف زمنه ووطنه
و طبعا البابا تواضروس صاحب المقولة الخالدة اللي تتحط في رصيده الشخصي قبب رصيده كزعيم ديني لما قال وقت تفجير الكنائس: "وطن بلا كنائس خير من كنائس بلا وطن" وكانت كلمة مهمة تقفل الباب على اي محاولة لشق صف الوطن
الناس امبارح كانت فرحانة.. انا للأسف متفرجتش بس كنت فرحان بفرحة الناس.. امبارح كان يوم عيد في مصر كلها وربنا يجعل أيام مصر كلها عيد
وتحيا مصر ٣ مرات 💪 💪 💪
ليست هناك تعليقات:
إرسال تعليق