ناس كتير
تكلموا-وبعضهم أصحاب رأي وعقليه بحترمهم بصراحة- عن ان السيسي وحمدين لو نزروا في مناظرة
واحدة فحمدين هيمسح السيسي ودا السبب اللي خلى السيسي يرفض المناظرة.
انا ليا تعليق
على النقطة دي..
الناس اللي
قالت كدا اعتمدت في رؤيتها على حاجتين:
- أول حاجة
ان حمدين بق كبير..
big mouth يعني زي ما الأجانب بيقولوا, وفي دي انا متفق معاهم ان فعلا حمدين بق,,
لكن هو بق بس.. كثير الكلام قليل الفعل ضعيف العقل محدود الرؤية مفتكر للواقعية.
حمدين عامل
زي التوكتوك.. مفيهوش غير كشاف وسماعات بس.. برضه حمدين مفيهوش غير شعر ولسان بس.
تاني حاجة
ان حمدين اسلوبه هجومي قائم على التجريح والتشويه في حين ان السيسي بطبيعته دبلوماسي
دمث الخلق بعيد عن التعرض للآخرين حتى لو أساءوا ليه ودا يمكن باين في كلامه عن حمدين
وحتى الإخوان, من حيث انه دايما بيختار الفاظ توضح موقفه منهم بطريقة تليق بشخص
"مصري مسلم" زي ما قال عن نفسه وتليق برأس القوات المسلحة المصرية, في حين
ان حمدين عايش طول عمره في الشارع فبيتكلم بلسان الشوارع.
------------------------------------
حمدين والسيسي
لو التقوا في مناظرة هيكون الوضع كالآتي:
- حمدين هيتكلم
معظم الوقت وهيكون نبرة صوته دايما عالية ومحتدة ومليئة بالعصبية اللي بيحاول يخفيها
بالثقة الزائفة والغرور الزائد.. لأن دي طبيعة شخصيته
- السيسي هيكون
كلامه قليل ونقاط محددة حتى لو اتكلم فيها بطريقته المعتادة في وضع مقدمة طويلة احيانا
قبل الاجابة على السؤال.
- حمدين هينصب
معظم كلامه على التجريح في السيسي والصاقه بالنظام القديم والأسبق وتقليل دوره في
30/6 وتصويره بديكتاتور يسعى لانتزاع حلم الشعب في دولة قوية عادلة.
- السيسي هينصب
معظم كلامه عن برنامجه ورؤيته لأنه ببساطة عارف انه جاي لمناظرة مش لوصلة ردح بلدي
و شرشحة سيدات المجتمع الراقص.
- كلام حمدين
هيلاقي استحسان الشباب الثائر (وليس كل الشباب) اللي هما بيثبتوا يوم بعد يوم انهم
الفئة الأقل عقلا ووعيا في الدولة ودي في الواقع مش مشكلة لأنهم مش كتلة كبيرة عددا
ولا قوة مؤثرة في الشارع ويادوب بيغنوا ويردوا على بعض.
- كلام السيسي
هيلاقي استحسان اصحاب الخلق قبل اصحاب العقل وهيستجيب ليه كل من يدرك ويفهم الفرق بين
ادارة دولة بحجم مصر وبين ادارة مظاهرة من 214 فرد على سلم نقابة الصحفيين, هيستجيب
ليه القوة الأكبر من الشعب اللي ببساطة شافت السيسي في فترة ظهوره البسيطة حققلهم ايه
وحمدين طوال فترة ظهوره الطويلة جدا فشل في تحقيق ايه.
من الآخر
حمدين المفروض يبعت برقية شكر للسيسي انه رفض ينزل معاه في مناظرة واحدة, لو كان دا
حصل كان حمدين نفسه انتخب السيسي بعد اللقاء.
--------------------------------------------
على الهامش:
سألوا حمدين
لو السيسي بقى الرئيس هتعمل ايه؟ وادوله خيارات:
- هتشترك مع
النظام الجديد في النهوض بالبلد.
- هتنتضم لصفوف
المعارضة.
الراجل قال
بوضوح هنضم لصفوف المعارضة.
ليست هناك تعليقات:
إرسال تعليق