عرفته من عدة أشهر بالاسم دا على تويتر..
"جبروتس"
دا الاسم اللى هو اختاره لنفسه ودا الاسم اللى هو بيحبه
ودا الاسم اللى عرفته بيه وعشان كدا دا هيكون اسمه هنا.. مش فاكر بداية تعارفنا
كان ايه بس يمكن كان تويتة ليه عجبتنى أو نقاش دار بينا حسيت انى بعدها عايز
اتابعه كما هو الحال مع غالبية التويبس اللى عاملهم فولو.. بس جبروتس كان مختلف
كل ما بتكلم معاه اكتر وكل ما بعرف عنه اكتر بيزيد
احترامى وانبهارى(ودا حقيقى) بيه وبشخصيته.. انا حاليا يمكن مش اعرف عنه حاجات
كتير لكن اعرف عنه ما يكفى لاحترامه جدا والاعجاب بيه وللأسف مش كل اللى اعرفه عنه
ممكن أكتبه لكن مش دا على كل حال سبب كتابتى عنه على مدونتي.
بداية هو مدرس neurology
فى واحدة من مدارس الطب المرموقة فى مصر وهو طبيب شاب فى بداية العقد الرابع من
عمره و من بداية معرفتى بيه شعرت انه شخص بارع فى مجاله من خلال طريقة تفكيره
وكلامه لغاية ما مؤخرا تأكدت من دا بالدليل القاطع اللى معتقدش ان من حقى أكشفه J لكن اللى عرفته عنه بيؤكد انه
فعلا شخص بارع جدا فى مجاله وتفوق فيه من سن مبكرة كمان :).
اللى لفتنى ليه وخلانى اعجب بيه جدا كدا هو أكتر من حاجة
هتكلم عنها بايجاز هنا..
- أول حاجة انه ما شاءالله شخص عنده علم وأنا بقدر العلم
جدا(يمكن لأنى معنديش منه :)) والحقيقة الطبيب اللى
بيكون متمكن فى مجاله بيكون شخص جدير بالاحترام والاعجاب لانه ربنا بيجرى على ايده
تخفيف معاناة ناس كتير ودى حاجة جميلة أوى.
- تانى حاجة لفتتنى فيه التواضع الغير معتاد من اساتذة
الجامعة فى مصر اللى عادة بيكونوا عندنا فاكرين نفسهم آلهة الإغريق وماشيين
مناخيرهم فى السما الرابعة وكأن محدش اتعلم طب غيرهم.. جبروتس بقى مختلف, اندهشت
جدا من تواضعه مع اشخاص اقل منه شئنا, زيى على سبيل المثال وانا لا أعدوا أكثر من
كونى طالب فى السنة النهائية فى الكلية.. وطالب خايب جدا كمان J, لكنى اندهشت من تعامله معايا ومع
غيرى ببساطة على إننا أصدقاء وبدون تكبر وبود يشف عن inner peace بيتمتع بيه د. جبروتس..
- تالت حاجة لفتتنى فيه انه شخص متعدد المواهب.. موهوب
فى الطب.. بيكتب شعر جميل جدا.. عنده عقلية تحليليه جميلة ومتزنة الى حد كبير جدا
وآراءه فى الحياة وفى السياسة رائعة الى حد كبير للغاية دا غير انه واسع الاطلاع
وعنده race بيطلع يعمل دوشة بيه
على المحور :).
- رابع حاجة انه على الرغم من اختلافى معاه فى بعض
الأمور الا انى محسيتش بنفور منه او انى مش حابب ميكونش ليا علاقة بيه بالعكس
الخلاف كان بيتم النقاش فيه بشكل هادى ومتحضر وموضوعى جدا, وبخاصة انه شخصية هادئة
ومتزنة وخفيفة الظل :).
افتكر فى مرة من قريب بقوله مش لو كنت بتدرس جراحة كنت
امتحنت عندك وظبطتنى ورد عليا رد عجبنى جدا(مع انه جابلى احباط :D).. قاللى: انا هنا
حاجة وفى الكلية حاجة تانية, فى الامتحان مش هتبقى صاحبي وهتبقى طالب بمتحنه
وهياخد الدرجات اللى يستحقها(قفلنى الصراحة :D ).. ودا عجبنى جدا لان
اللى يعرفه من على النت ميظنش انه من النوع الحازم دا فى الشغل.
الحقيقة د. جبروتس شخصية جديرة بالاحترام مهما اختلفت
معاها وعلمه جدير بالتقدير وصراحة بتمنى انى اتشرف بمقابلته قريب باذن الله وانه
هيكون وقت ممتع جدا ومفيد جدا ومحبط جدا جدا جدا :D
مع خالص احترامي عزيزى جبروتس :)
ليست هناك تعليقات:
إرسال تعليق