العبد لله واحد من التيران اللى بتجرى فى ساقية التعليم فى مصر.. بس زى ما تقول كده عقبال أملتك يعنى طور مهكع شوية.. بصراحة شويتين(مهكع.. مصطلح خورنبيقى متقوقع بمعنى مسلطع وفعله هكع واسم المفعول منه مهكوع)..
أنا
وبكل فخر واحد من أفشل الطلاب اللى عرفتهم الموكوسة(ده اسم اللى بحب اسمى بيه كليتى
العزيزة).. ويا ريت يعنى محدش يستغرب, لأن فى جامعة زى جامعتنا كل الشرف انك تفشل فى
نظام التعليم العبقرى بتاعهم.. لأن ده معناه انك فى الغالب بتفهم.
انا لما دخلت الموكوسة مكانش فى بالى تخصص معين.. عادى يعنى.. كله زى بعضه, وبعدين لما حضرت مع خالى فى العيادة بتاعته حبيت شغل النسا جدااااا.. بصراحة هو متعب بس حلو أوى وعايز "فاين تاتش"-ومحدش يفهم غلط- ولما رحت العيادة عند والدى(جراحة عامة وجراحة تجميل) لقيت ان الطب متلخص فى كلمة "جراحة".. مع احترامى لكل التخصصات وعلى رأسها الباطنة(اللى هى نص الطب).. الجراحة جراحة.. وصدق الشاب اللى كان قال فى التليفزيون من كام سنة لما سألوه عايز تتخصص ايه, رد وقال للمذيعة:"اتخصص ايه ازاى؟؟ الطب جراحة".. وبناءا على كل اللى عدى فأنا قررت انى مش أتخصص جراحة .. آه والله.. حبيت الجراحة جدا بس مش طالبة معايا تقطيع فى لحم البشر.
الكلام
ده كان فى بداية الدراسة لما كنت فاكر انى هخلص من الكابوس اللى اسمه كلية الطب(أو
التب زى ما واحد زميلى بيقولها), وبعد ما عدت سنتين والتالتة فى طريقها نحو الهاوية,
أدركت الحقيقة المرة(حتى شلق قصب مسوس بحاله مش كفاية عشان يحليها), أدركت انى بلغة
الجيش.. "لبست" ومش هخلع من الموكوسة غير بالشهادة أو على نقاله.. أيهما
أقرب
وعندها
يا محترم بدأت أفكر أنا ممكن أنفع فى ايه.. فى ايه يا عباس.. فى ايه يا عباس.. فى ايه
يا عباس.. لما لقيت انى مش أنفع فعلا غير فى حاجة واحدة الحمدلله ملهاس أساسًا علاقة
بالطب.. لقيت انى من زمان بحب علم النفس والحاجت المتعلقة بتشريح الذات العليا للانسان
اللى بتسمو فوق كل الظواهر المادية البشرية.. النفس
أنا
يمكن اكون فاشل دراسيا-وليا الفخر- بس الحمدلله مش غبى.. وعشان كده طول عمرى بحاول
أفهم.. بحاول أفهم اللى بيجرى حواليا فى الدنيا.. بحاول أفهم الميكانيزم بتاعة الخير
والشر.. بحاول أفهم الأيديولجى بتاعة العدل والظلم.. بحاول وده الأهم انى افهم طبيعة
الناس وايه اللى بيأثر فيها ويوجها ويتحكم فيها واللى بيتجكم فى المود بتاعهم..
طبعا
انا كل اللى وصلتله فى الحاجات دى أبسط من انه يذكر.. لكنه كان كافى انى اتعلق أوى
بالعلوم المتعلقة بالفهم.. العلوم اللى معرفتها توقف عند الانسان الحاجة لانه يسأل
اسأله تبدأ بـــ"ليه".. لأنك لما هتفهم كويس كل سؤال يطلع هتعرف تجيبله اجابة
مقنعة.. وعشان توصل للمرحلة دى من الفهم والــ سوبر إدراك محتاج انك تفهم الدنيا بكل
ما فيها.. وعشان افهم الدنيا كويس لقيت انى لازم ابدأ بفهم "النفس البشرية"..
لقيت انى لازم أفهم ازاى الكيان المهول اللى اسمه النفس ده بيتشكل وبيتأثر وبيشتغل
وبيأثر وبيشكل!!!
وعليه
يا محترم قررت (أو الأفضل أقول نويت لأن الغيب ده بتاع ربنا مش بتاعى) إنى بإذن الله
أحاول أتخصص فى الطب النفسى عشان آخد السلم من أوله وأوصل للمرحلة اللى أرجوها من الفهم
و الإدراك..
يعنى
فى خلال 60 سنة من دلوقت أتوقع انى هكون أخدت البكالريوس وبعدها بحوالى 20 سنة كمان
أكون عملت الدبلونة وبعدها بقيمة 25 سنة أكون أخدت الماجستير وطبعا الدكتوراة حسبة
مش أقل من 80 سنة.. وبعدها أبدأ أعمل اسم وأكون نفسى وأتأهل.. أدى كمان 79 سنة وشهرين(واحد
عسل والتانى انعاش).. يعنى تقدروا تقولوا انى بعد حوالى 400 سنة هكون بعالج احفاد أحفاد
أحفاد أحفادكم فى "مستشفى errantknight للعلاج النفسى"
بى كوووووووول
ايفرى بادى
ليست هناك تعليقات:
إرسال تعليق