حقي وحقك في المظاهرة

في فرق كبير لسه مش قادرين نفهمه بين التظاهر والتخريب..

التظاهر انك تقف بشكل متحضر وسلمي وتعرض مطالبك بأسلوب مهذب ومتتعرضش لمصالح الناس لا بتعطيل طريق ولا بتخريب منشآت ولا حتى بتسميم آذانهم بهتافات وعبارات بذيئة

انا فاكر كنا مرة في مظاهرة في 2010 على سلم نقابة الصحفيين وواحد معانا هتف هتاف فيه شتيمة لمبارك ووقتها الأستاذ محمد عبد القدوس(هو اخواني بالمناسبة) قاله في مكبر الصوت "من غير شتيمة" وكلنا وقتها رفضنا الأسلوب دا

اما انك تقف تعطل طريق أو تحدف طوب او تكسر رصيف أو تشتم بألفاظ مش لائقة في الهتاف أو تعمل أي disturbance من أي نوع فدا كدا انت خرجت عن اطار التظاهر الى ما يعرف باسم "التخريب" و "تكدير السلم العام" ودا طبعا يستوجب التعامل الأمني

انت من حقك تتظاهر وتعرض مطالبك كلها

بس انا من حقي ملاقيش الشارع واقف وانا ماشي فيه

ولا الاقي طوب نازل على دماغي وانا معدي او خرطوشة مفرقعة عيني وانا نازل اجيب جبنة من البقال

وكمان من حقي وانا ماشي مع مراتي او ولادي او اخواتي الصغيرين ميسمعوش ألفاظ تخدش حيائهم

وكمان من حقي اني منزلش ألاقي عربيتي مكسور فيها ازاز ولا فانوس ولا مولعة

كل دا من حقي زي ما انت من حقك تتظاهر

ومن حقي كمان انك لما تهدد حاجة من دول إن الأمن والقانون يتدخلوا لحماية.. حقي

تهنئة خاصة جدا من صديقي عبقرينو :).. كلاكيت تاني مرة

and again i find myself totally speechless in front of my amazing friend's and true brother's honest feelings..

God know how much our friendship means to me..

God bless you.. God bless our friendship and make it last till we both enjoy it in Jannah inshaAllah.

and finally, hope you'll be the first of my friends to take this step :) 
i'm sure i'll be just as happy as i am today.. :)

love you bro

22/11/2013 a day to last forever :)

and today it's finally happened and you and i have become one once and for all... :)
مش لاقى كلام أقوله يعبر عن اللي حاسس بيه غير : "الحمدلله حتى يبلغ الحمد منتهاه, يا رب لك الحمد كله والشكر كله والثناء الحسن كله"

يا رب يتمملنا بخير ويرزق كل شباب وبنات المسلمين زواجا يقر اعينهم :)

الإخوان والحل الأمني

كتير بسمع ناس تقولي كلام من نوعية انت عاجبك اللي السيسي بيعمله؟ او انت عاجبك اللي الحكومة بتعمله؟ او الحل الأمني مش هينفع مع الاخوان.. والفكر يتواجه بالفك... الخ الخ

بداية احب اوضح ان نسبة 900% من اللي بيقولوا الكلام دا بيرددوا جملة د. البرادعي الشهيرة "الفكر لا يواجه الا بفكر" حتى لو ما ادركوش دا.. وكلمة الحل الأمني مينفعش دي اتهرينا منها في الاعلام لما شبعنا.

وأنا كمواطن مصري ضمن ال زيليار مواطن اللي بيفتوا ليل ونهار فأنا بطالب بحقي في اني افتى انا كمان ما جاتش عليا يعني.. وأحب أقول من ساحة الفتى الخاصة بتاعتي انه "الاخوان مينفعش معاهم غير الحل الأمني"

ايوة.. الاخوان مينفعش معاهم غير الحل الأمني وفقط ووحده ولا غيره.

ليه بقى؟؟

- أولا.. الاخوان مش اصحاب فكر علشان نواجههم بفكر.. احنا نخلي المواجهة بالفكر مثلا للأخوة الملحدين أو الشيعة أو غيرهم من اصحاب الفكر الضال.. دول ممكن تناقشهم بالفكر والعقل والمنطق واحتمال تطلع منهم بحاجة لأن خلافهم معاك في جزء من أساسه قائم على الفكر.

اما الاخوان فهما مش اصحاب فكرة لكنهم اصحاب مشروع سياسي طامع "أمني" بحت.. ودا باين في تنظيمهم الهرمي كجماعة وفي وجود مليشيات مدربة عندهم من شبابهم وفي مبدأ السمع والطاعة اللى مبتسمعش عنه غير في الأوساط الأمنية فقط ويستحيل انك تراه في الحياة المدنية.

- ثانيا.. الاخوان من بداية تاريخهم في البلد دي وهما شايلين سلاح.. في الأول شالوه ضد اليهود في فلسطين وبعد ما رجعوا فضل السلاح دا شغال ضد المواطن المصري وبس وبقى كل الدم اللي بيسيل بناره دم مصري صافي لا تشوبه نجاسة دم العدو.. من اول اغتيالات حكومة النقراشي باشي ولحد الاغتيالات اللي بتحصل اليومين دول سواء بايد التنظيم بنفسه او بايد مشتقاته ونواتج مصنعه العطن من الجماعات الدينية المتطرفة التى لم تعرفها مصر قبل ظهور الاخوان.

- ثالثا.. الاخوان ايام عبد الناصر كانت نتيجة الحل الأمني معاهم فاشلة لأن الشعب احتضنهم عشان كانت لسه الناس بتحبهم وفاكراهم بتوع ربنا.. وايام السادات ومبارك نفس الكلام بل انه زاد عليهم ايام مبارك الصفقات المستمرة اللي عقدوها مع نظام مبارك واللي كانت قايمة على مبدأ "سيبلنا الشعب وخد السلطة" ودا في سبيل مزيد من التمكين في المجتمع والتغلغل فيه في انتظار اللحظة المناسبة اللي كانت بالنسبالهم هي 25 يناير.

أما دلوقت فخلاص مبقاش في الكلام دا والناس عرفت هما مين الاخوان وفي آلاف البيوت سال منها دم بنارهم وآلاف تانية جاعت بسببهم والناس دلوقت بقت هي الضامن لنجاح الحل الأمني.

- رابعا.. الاخوان في اثناء حكمهم ومصر وما بعده تعاملوا مع الدولة بمنطق "العصابة" وليس بمنطق "النظام" او "السلطة" وكان الجهة اللى تعارضهم يبلطجوا عليها ثواء كانت قضاء او ازهر او شرطة.. دا حتى الجيش مسلمش منهم لكن مقدروش يعملوا معاه غير الكلام والتشويه اللفظى ودا من ستر ربنا وحفظه للبلد دي.

المهم ان لما حضرتك بيكون عندك عصابة في مكان مش بتجيبلها مثقفين وادباء يتحاوروا معاها ويغيروا فكرها في الاجرام.. انت بتتعامل معاها تعامل امني بحت.

من كل الأسباب دي وغيرها كتير مما لا يتسع الوقت لذكره أقدر أقولك وبكل ضمير مرتاح ان الحل الأمني مع الاخوان والجماعات اللي تسير على نهجها سواء كانت اسلامية او غيره.. هو الحل الوحيد الصالح والفعال وعلى المتضرر خبط راسه في الحيطة

والله الموفق