,,أمل عمرى,,

كل البشر الطبيعيين بتحلم وبيكون عندها هدف وحلم وطموح والحاجات اللى مش بتتحقق دى..

افتكر انى أريت مرة خبر عن المبدع البرازيلى (كاكا) بيقول فيه انه يتوقع انه يوصل قمة مستواه بحلول 2010.. الراجل عنده طموح

مرة تانية بدردش مع واحد صاحبى وبسأله ايه اللى جابه الموكوسة مع انه جاله صيدلة.. قاللى انه عايز يكون طبيب.. يعنى الراجل عنده حلم يارب يحققه

واحد صاحبى تانى قاللى انه لما دخل الموكوسة اول يوم كان هدفه يكون رئيس اليونيسيف.. طموح برده

حسيت من ده كله ان الإنسان يفترض انه يكون صاحب حلم وطموح.. قعدت اهرش ف راسى(تفكير مش قمل) وادور على حاجة اكون حلمت بيها ف يوم من ايام العمر السعيدة قليلا والمملة كثيرا والكئيبة معظم الوقت.. وصحيت على الحقيقة المرة يا انشراح.. انا مش انسان طبيعى!!!
وحياة الفار اللى بيتمشى بره الأوضة وحابسنى جوه.. وحياة كل كلمة غلط فى كتاب الفسيولوجى بتاع همت ما لقيت عندى احلام..
قبل ما تتعالى اصوات الموسيقى الصادرة من افواهكم على اختلاف التوزيع(مع مراعاة ثبوت اللحن).. أنا فعلا مش عارف السبب بس عارف انى عمرى ما اتمنيت ابقى حاجة كبيرة.. ما حلمتش ابدا اكون وزير ولا حتى مدير.. ما اتمنيتش حساب فى سويسرا ولا حتى بنك السويس.. ما فكرتش يوم اخد جايزة نوبل ولا حتى نوفل..
مش عارف الخلل فين بس وش انا مش طبيعى..

رغم انى مش كان عندى طموحات متعلقة بالكاريير او كده بس كان نفسى ف شوية حاجات بسيطة..
-بيت بسيط على اى شاطئ فيكى يا محروسة عشان انا بعشق البحر
-اشتغل مهندس(ما قلتش عميد هندسة بس الواحد لازم ياكل عيش برده)
-الاقى واحدة تحبنى واحبها.. تكون صديقة وحبيبة وزوجة.. تكون بيت ومأوى.. تكون دفا وحنان.. تكون راحة وامان.. نعيش سوا حياة عنوانها البساطة.. من غير تكلف ومن غير أضواء.. من غير ناس ومن غير اى حاجة غير حب صافى برئ..

بس ده اللى نفسى فيه مش اكتر..
بس دلوقت بقى عندى حلم و هدف بدعى ربنا يقدرنى اعمل كل المطلوب عشانه..
امل عمرى اللى اقتحم حياتى وفرض نفسه عليا هو حبيبتى اللى بجد أنا مستعد ادفع نص عمرى واعيش النص التانى معاها.. ده اللى بجد اقدر اسميه حلمى الأول وربما الأخير.. بس الاكيد انه الحلم اللى تحقيقه ضرورى للحياة.. حياتى