من اكتر من شهر والصحف كانت بتتكلم عن الزيارة المرتقبة للرئيس الامريكى النشيط "أوباما" للقاهرة وتوجيه خطاب للعالم الاسلامى منها باعتبار ان التاريخ بيبدأ من عند مصر وهى الدولة الاهم والاقوى فى المنطقة العربية على مر التاريخ (وحتى اثناء فترة الاضمحلال اللى مصر بتعيشها فى عهد الاسرة الفرعونية الـ 31 واالى بقالها حوالى 28 سنة ولسه) تظل مصر هى الدولة الابرز فى العالمين العربى والاسلامى ومن هنا اختارها اوباما لتوجيه خطابه اللى كان متوقع انه هيكون فتح جديد بين العالمين الاسلامى والغربى او خلونا نقول وغير الاسلامى لان الاسلام بفضل الله تعالى بينتشر فى الغرب بصورة كويسة جدا والحمدلله..
الخطاب القاه اوباما من جامعة القاهرة يوم 4 يونيو حوالى الساعة 12:35 بعد الظهر فى غياب من الرئيس المصرى(بدعى ازدحام جدول الاعمال) وبحضور كل من الشيخ سيد طنطاوى(امام الازهر الشريف) و د. حسام كامل(رئيس جامعة القاهرة) وبعض رموز القوى شبه السياسية فى الدولة من جميع الاحزاب وبعض الفنانيين ونحو 150 طالب..
قبل واثناء الخطاب حصلت بعض الممارسات والتعليقات سواء على المستوى الحكومى او على المستوى الشعبى ودى التعليق عليها محتاج اكتر من مجرد مقال وحيد.. عشان كده انا بس هعبر عن رؤيتى الشخصية للخطاب اللى القاه اوباما..
اوباما تناول 7 موضوعات فى خطابه انا للاسف ملحقتهمش من الاول بس لحقت اللى يكفينى انى افهم الصورة هتكون عاملة ازاى فى الفترة الجاية اثناء ولاية اوباما ويمكن فى الفترة اللى بعده..
بصراحة فى 3 نقط وقفت عندهم فى الجزء اللى انا سمعته وعنهم هيكون النوت دى باذن الله والنقط دى هى..
-موقف امريكا من الاسلام وعلاقته بالارهاب
-موقف امريكا من حرب العراق
-موقف امريكا من القضية الاهم على الاطلاق وهى قضية فلسطين الحرة
خلونى قبل ما ابدأ اقول حاجة عن اوباما.. طبعا وضح جدا ان اوباما انسان ذكى جدا وشخص عنده كاريزما عالية اوى وخطيب بارع.. يمكن لو كان بيتكلم عربى كان قال شعر.. كمان اوباما كان بيلقى خطابه من غير اوراق او حاجه وده شىء احنا مش متعودين عليه من رؤسائنا الافاضل اللى بيفضلوا طول مدة حكمهم(ابد الآبدين يعنى) يخطبوا من ورق مع انهم دايما بيقولوا نفس الكلام..
كمان اوباما قدر يستفيد من نشأته داخل مجتمع اسلامى رغم ان امه يهودية.. وعرف كتير عن المسلمين واستفاد من ده بذكاء واضح فى خطابه واللى ظهر فى استخدامه لآيات من القرآن الكريم والحديث الشريف فى اكتر من موضع من خطابه..
طبعا كلنا لاحظنا فى خطاب اوباما ان الراجل جاى فاتح ايديه ع البحرى وبيقول يلا يا مسلمين حطوا اديكم فى ايدى عشان نحقق هدف السلام فى العالم..
للاسف اوباما قدر بذكائه يخدع ناس كتير جدا.. عرف ازاى يضحك علينا بالكلام الجميل فى الأمور المطاطة اللى مش ممكن نلمسها على ارض الواقع.. يعنى مثلا الراجل قال ان الاسلام دين سلام وان الارهاب مش منه فى شىء وقال انه هيدافع عن حقوق المرأة المسلمة فى الحجاب والتعليم والعمل والمسواة وكل الكلام اللى مفيش منه فايدة ده.. كان كلامه جميل فى الامور اللى مفيهاش تنفيذ فعلى.. لكن فى الكلام الجد بانت نواياه الداخلية وبان انه هو فعلا كان جاى عشان يقرطسنا ويلبسنا العمة وده بان فى النقط اللى هتكلم عنها دلوقت..
-بالنسبة لقضية الارهاب.. اوباما اكد ان الاسلام دين سلام مش دين ارهاب واكد كمان ان امريكا مش بتحارب الاسلام ومش هتدخل فى حرب معاه عشان هو دين سماوى عظيم وكل الاديان السماوية بتحث على السلام وحقن الدماء.. لكنه اكد على ان امريكا هتحارب الارهب بكل صورة وايا كان مكانه واكد على ان امريكا هتحارب الارهابيين المسلميين(وخص الارهابيين المسلمين بالذكر) وده طبعا حفاظا على الامن القومى الامريكى اللى الامريكان انتخبوه عشانه.. يعنى من الاخر قال ان الحرب على الاسلام هتفضل زى ما هى
-فى قضية العراق.. الراجل دافع عن حرب امريكا على العراق دفاع شرس وقوى بوش نفسه يتكسف يدافع بالصورة دى عن حرب العراق.. واكد ان الحرب كانت ضرورية عشان يحمى امريكا من خطر صدام النووى وفكره الارهابى رغم انه ثبت ان النوى الوحيد الموجود فى العراق هو نوى البلح.. اوباما اكد ان الوضع فى العراق حاليا احسن من قبل كده وان المنطقة صارت اكثر امنا بعد رحيل النظام المستبد.. واكد على ان القوات الامريكية "المقاتلة" هتغادر العراق بحلول عام 2011/2012 يعنى ان شاءالله فى فترة نهاية ولايته.. بالظبط زى ما بوش قال ان امريكا هتخرج فى 2008 عشان يرمى بالمسؤلية علىا لرئيس اللى بعده.. وهنا بيتضح ان موقف اوباما من العراق هو نفسه موقف بوش لانه مش هيحل ازمة ولا هيغير واقع..
-بالنسبة للقضية الاهم وهى قضية فلسطين.. انا شايف انه يكفى ان اوباما بدا كلامه عن فلسطين بجملة
AMERICA'S STRONG BONDS WITH ISRAEL ARE UNBREAKABLE
ودى وحدها كفاية عشان نعرف انه مش هيجى بجديد فى الازمة الفلسطينية وده اللى بان فى تفصيل النقطة دى.. لما اتكلم عن معاناة اليهود واضطهادهم فى السابق وان ارض فلسطين هى موطنهم الحقيقى بحسب نصوص التوراة-المحرفة طبعا- واكد على ان المسلمين عارفين ان اليهود مش خارجين وان مفيش حل غير ان تقوم دولتين متجاورتين يعيش فيهم الفلسطينيين واليهود بسلام.. واكد على ضرورة انهاء عمليات المقاومة الشريفة فى ارض فلسطين وان الفلسطينيين المتوحشين لازم يبطلوا العنف الزايد مع اليهود الطيبين ونوه بسرعه كده-وكأن حد بيجرى ورا-ان اسرائيل لازم تقلل من عمليات الاستيطان-كلام كده لزوم العمة اللى بيلبسهالنا-.. يعنى برده اكد على ان القضية الفلسطينية مش هتتحل وان الفلسطينيين لازم يبطلوا المقاومة ويسلموا سلاحهم ويتضربوا وهما ساكتين لان اساسا حل الدولتين غير عملى او قابل للتنفيذ ودى حقيقة الايام هتثبتها...
التلات نقط دول وضحوا جدا ان اوباما مش هيختلف عن بوش كتير وده انا كنت شخصيا متوقعه لان السياسة الامريكية زى ما هو معروف اللى بيحطها اليهود مش الرئيس والرؤساء اللى بيتغيروا دول ما هما الا الصورة اللى بتنفذ السياسة اللى متحددة من اليهود نفسهم.. وده طبيعى فى دولة رأسمالية زى امريكا.. طالما ان اليهود هما اللى بيملكوا الاقتصاد الامريكى يبقى من الطبيعى ان التحكم بالسياسة يكون فى اديهم هما..
الفرق بين اوباما وبوش ان بوش كان عدو صريح لينا.. من اول ما جه وهو بيقول انه هيحارب المسلمين(عن طريق حروب الارهاب اللى كانت كلها على دول اسلامية) فى حين ان بوش جه فى صورة صديق بيمد ايده عشان يتعاون معانا وهو بيجهز اسلحته عشان يضربنا فى ضهرنا..
اوباما اخطر من بوش بكتير لان العدو الذكى بيكون مرهق فى التغلب عليه واوباما ذكى بجد عشان كده اللدغات بتاعته هيكون سمها اقوى واذاها اكبر..
ويمكن يكون رد فعل اوباما على خطاب نتن ياهو الاخير هو اكبر دليل على كلامى السابق..
-فى الخطاب نتن ياهو قال ان اسرائيل مش هتوافق على خارطة الطريق(اللى اليهود اصلا هما اللى حاطنها) غير بشروط هى..
1)عدم رجوع القدس للفلسطينيين
2)الاعتراف باسرائيل دولة يهودية.. يعنى ترحيل عرب اسرائيل
3)حل مشكلة اللاجئين خارج حدود اسرائيل.. يعنى عدم رجوعهم اصلا
4)دولة فلسطينية منزوعة السلاح.. لا تعليق
-وكان موقف اوباما ان خطاب نتن ياهو خطوة مهمة على طريق حل الازمة فى المنطقة...
فاضل انى استشهد بقول اتنين من اصحابى فى الموضوع ده لما اتناقشنا فى الخطاب..
-شاب فلسطينى قال ان اوباما "ثبتنا" فى الكلام.. يعنى بعد خطابه اللى جه بصورة fake اوى ده بقى اى حاجة تيجى منه بعد كده هنتعامل معاها على انها كويسة مع انها هتكون فى غير صالحنا.. بس عشان خطابه كان خادع يبقى احنا هنعديله اى حاجة.. يعنى يقصد انه كانه نومنا مغناطيسيا وبقينا نشوف كل كلامه صح لانه اقنعنا اننا على نفس الطريق
-تانى واحد هو صديقى العزيز جدا د. محمد حسن واللى قال ان اليهود جربوا معانا سياسة الصدام المباشر فى عهد بوش ولقوا ان دماغنا انشف من دماغهم والدليل انهم خسروا فى كل المعارك اللى حاربوها ضدنا(العراق-افغانستان-لبنان-غزة) وعشان كده رجعوا لسياستهم الثعبانية القديمة وهى انهم يضحكوا علينا ويخلونا نرضى.. يعنى د. محمد بيقول ان العرب دماغهم ناشفة بس عبط واليهود هيستغلوا العبط بتاعنا زى ما كانوا بيعملوا قبل بوش لانه بينجح.. وبصراحة واضح من ردود الافعال العربية والشعبية ان السياسة هتنجح زى ما نجحت قبل كده
انا حبيت اكتب المقال ده رغم انى اتأخرت فيه لانى نفسى الناس تشوف الوضع على حقيقته ومش تنخدع بيه لان من الاخر اوباما مش صلاح الدين الايوبى زى ما الناس فاكرة وعمره ما هيعمل حاجة عشان المسلمين طول ما هو على رأس الولايات المتحدة.. ومفيش حد هيصلح احوالنا غيرنا احنا بدينا وعملنا "ان الله لا يغير ما بقوم حتى يغيروا ما بأنفسهم".. واكبر دليل على ان الحال مش هيتغير غير بايدينا ان اليهود ما طلعوش من مصر وجنوب لبنان وغزة غير بالدم.. مش بالسلام الزائف
خلونا نشيل سحر اوباما من عينينا ونبدأ بقى نشتغل بايدينا مش بايدين الناس عشان محدش هيهمه امرنا غيرنا احنا..
