الجمعة، 4 ديسمبر 2015

عصام حجي.. العالم و السياسي




 هو ايه التعارض بين ان انسان ما يكون متعلم وناجح ويكون ابن دوج برده؟  ايه المشكلة؟؟ مش فاهم؟ 
يعني واحد زي عصام حجي راجل اثبت انه عالم فذ في مجاله واثبت نجاحه لكل البقر اللي قالوا عليه فاشل هنا..  دا على المستوى العلمي
لكنه على المستوى الوطني فهو شخص بيناصر اعداء بلده بشكل مباشر ودا مفيش تعارض بينه وبين الفقرة اللي فاتت

مش لازم لأنه عالم ناجح برا او انه لاعيب نجم في نادي كبير في اوروبا او انه متقلد منصب رسمي كبير في دولة غربية انه يكون كلامه قرآن يعني ونقول آمين

ما ابو الفتوح طبيب و الشاطر مهندس وبن لادن نفسه طبيب وياسر برهامي طبيب ومرسي بيقولوا برده كان شغال في ناسا..  آه والله بيقولوا كدا معرفش ازاي يعني بس اهم قالوا..
وبعدين ما انتوا جربتوا وارد ناسا الاستبن والمفروض انكم عرفتوا اللي فيها يعني

عصام حجي كعالم ليه تقديره وان مكانش ناوي يفيد بلده بعلمه دا يبقى حتى ملوش التقدير(بالمناسبة لما ييجي يبهر الناس بمحاضرة ويسيبهم يريلوا ويمشي ميبقاش بيفيد البلد دا يبقى بيتنطط.. عايز يفيد يبقى يأسس مركز بحثي ويجيبله تمويل و دي حاجات واحد في وضعه يقدر يعملها)
اما عصام حجي كشخص ليه آراء سياسية فدا زيه زي غيره يتم تقييم آراءه عادي ويتشاف هو في صف بلده ولا ضدها

خليكوا بس فاكرين انباهركم بزويل وهو عمره ما عمل لمصر حاجة
في حين ان الرائع د. مجدي يعقوب عمل واحد من اهم مراكز جراحات القلب في العالم في بلده لعلاج اطفال بلده بالمجان وتعليم اطباء بلده..  وكل دا تم في صمت.. احنا فوجئنا ان في مركز اتعمل وانه شغال فيه بنفسه
دا الفرق بين امثال حجي و زويل وبين د. مجدي يعقوب
دا الفرق بين اللي عايز يخدم بلده وبين اللي عايز ينظر عليها ويهينها

الأربعاء، 2 ديسمبر 2015

my first workplace ☺







10 شهور و اسبوعين قضيتهم في وحدتي الحالية "وحدة مياح" في البصيلي.. 

بفضل الله كانوا فترة جميلة جدا كنت مرتاح فعلا فيها من حيث كل حاجة الحمدلله
الناس هناك قمة في الاحترام و حسن المعاملة معايا
التفاهم مع زمايلي الأطباء في الشغل و العلاقة الطيبة
الجو هناك في الوحدة عندنا كان جو أسرى جميل مكماش زمايل شغل ابدا كنا فعلا اسرة و دا من فضل ربنا
في حاجة كمان مش هقولها عشان الحسد ☺☺ (التفتيشات) ☺☺☺

بصراحة كانت فترة على قد ما التكليف ملهوش لازمة على قد ما كنت مرتاح فيها
دلوقتي جه وقت ان الواحد يمشي للأسف ويسيبهم (يا رب اعرف اخلي ☺) واتمنى بس اني اكون مضايقتش حد فترة ما كنت ضيف عندهم لأنهم فعلا سايبين ذكرى طيبة عندي

انهارده لقيتهم جايبينلي الهدية الجميلة دي بمناسبة نهاية الخدمة ☺ تقريبا ما صدقوا امشي ☺☺☺
بصراحة لفتة جميلة منهم تدل على كرم أخلاقهم وحسن معاملتهم و انا فعلا شاكر ليهم.

كان معايا فعلا فريق جميل في الوحدة احب اذكرهم و دا شرف ليا..

- دكتورتين قمة في التعاون و الاحترام.. مكانش في لا سنيرة ولا منتلة مع اني احدث حد جاي الوحدة و كان لما يكون عندي ظروف بيقدروا ووجبوا معايا جامد والله وقت الفرح.. حاجة كدا ذوق عالي فعلا


- فريق الصيادلة اللي كانوا مستحملين خطي سنة تقريبا ومستحملين اني كل شوية اكتبلهم أصناف خلصت وهما قالولي ☺☺ وكنت بسألهم دايما لو في حاجة عايز اعرفها عن الأدوية كتر خيرهم.


- فريق التمريض كانوا كلهم اخواتي فعلا وناس طيبين بجد كلهم وذوق جدا جدا معايا.. كفاية اننا لما بنشوف بعض بنضحك في وش بعض
و طبعا طالما بتكلم عن التمريض لازم اشكر ممرضة العيادة بتاعتي اللي فعلا كانت من افضل الممرضات اللي اشتغلت معاهم سواء في المستشفيات أو الوحدات.

- المعمل.. استاذ محمد اخ كبير فعلا وراجل مشوفتش منه غير كل أخلاق طيبة وباقي الفنيات في المعمل برده ناس ذوق عالي واخوات ليا فعلا.


- الوقائي.. استاذ احمد حبالة و دا بقى لوحده حاجة تانية.. هو الكبير بتاعنا في الوحدة فعلا.. اخ كبير للكل
و طبعا استاذ كارم و استاذ عاطف استاذة التطعيمات فعلا و اخواتي الكبار.. يكفي ذوقهم وتبسمهم الدايم في وجههنا
و طبعا الاستاذ شعبان.. المشاغب الكبير بتاع الوحدة ☺☺ بس طيب.


- الكتبة: استاذ محمد الراجل المحترم فعلا اللي بيخدم بقلب و ام يوسف إلى دايما بتضحك في وشي والله ☺

و نيجي بقى لأهم شخصية في الوحدة: عم اسماعيل.. مدير الوحدة ☺
طبعا كل اللي في مياح يعرف مين اسماعيل عطية رجب مدير وحدة مياح و مراته مديرة معانا برده ☺

بصراحة الناس كلهم هناك اخواتي و حبايبي و يا رب نفضل دايما فاكرين بعض بالخير

ربنا يستر بقى و ميطلعش عيني في النيابة ☺☺























تقرير ال daily mail الهزلى عن مطار شرم الشيخ




تقرير الدايلي ميل... lax security at sharm el-sheikh airport

البوست دا انا كتبته امبارح والبراوزر الله يحرقه منشرهوش كله فمسحته وكسلت اكتبه تاني
امبارح جريدة الدايلي ميل البريطانية اتحفتنا بمقال غاية في الخطورة عن الاستهتار الامني في مطار شرم الشيخ وكان للمفاجأة مقال مدعم بأدلة وبراهين قوية هنستعرضها هنا ان شاء الله 
وقالوا ان التسيب دا هو سبب مرور القنبلة اللي فجرت الطيارة الروسية.. 
الصراحة يعني هي شوية بتبقى قنبلة وشوية بتبقى صاروخ حسب الحبكة الدرامية للخبر وكدا

التقرير مكتوب بحرفية عالية جدا ما شاء الله تحس من مهنيته الشديدة انه مكتوب في قطاع الاخبار في التليفزيون المصري مثلا.. شوف ادلتهم بقى يا سيدي

* بيقولك سايح انجليزي بلغ انه شاف ظابط بياخد رشوة من سايح اردني قيمتها 150دينار اردني عشان يعديه من التفتيش.. 
وهنا انا احب احيي قوة ملاحظة السايح الانجليزي وسعة اطلاعه اللي قدر يتعرف على عملة الاردن ويعد الفلوس اللي في ايد الراجل
على اخر اليوم اتضح ان دي كانت رسوم خدمة اسمها vip موجودة في مطارات كتير والصحفي اللي فبرك الكدبة دي(هو مصري بالمناسبة شغال في pee pee c) اتجرس تجريسة المتطاهر امبارح واتعمل معاه جميع انواع الجلاش

* قالك يا مؤمن سايح انجليزي ومراته شافوا ظابط الأمن اللي قدام السكانر بيلعب كاندي كراش على تليفونه.. وعشان همت ناس محترفين مصورين الراجل فعلا
بس الراجل متصور وهو ماسك التليفون والشاشة مش واضح فيها هو بيعمل ايه
هنا الاحتمالات كلها موجودة.. من اول انه كان بيتفرج على مقاطع بلوتوث ساخنة لحد انه كان بيتصل بحد في الشغل.. لكن الدايلي ميل قررت انه كان بيلعب كاندي كراش.. ومن هنا اوجه الدعوة لكل اللي بيلعبوا كاندي كراش انهم يبعتوله life كدعم لوزارة الداخلية

* قالك كمان ان الظابط اللي عند جهاز ال body scan كان مركز مع السوجارة بتاعته اكتر ما كان مركز مع الشاشة(بحسب نص الكلام) .. 
دي عندهم في المحكمة محامي الظابط هيقول objection والقاضي هيقول scratch that line from the script وهيمرمط محامي الشخص اللي بيدعي الادعاء دا حيث انه شيء لا يمكن اثباته

وفي النهاية حاطين صور خريطة سينا ومكتوب عليها sinai danger zone بخط كبير عشان يبينلك خطورة سينا عليك كسايح

بيتضح من الكلام كدا انه كله حاجة اسمها hersey وكلام كله في الفاضي بدون اي دليل "سليم" والجريدة معتمدة فقط على ان فئة كبيرة عندهم وعندنا هتنخدع في كلامها اعتمادا على اسمها

مش غريب على انجلترا انها تحاول تفهم رب السياحة عندنا لأن يمكن دا الامل اللي فاضلهم.. انهم يحاصرونا اقتصاديا بشكل مقنع بعد ما فشلوا في اسقاط مصر عن طريق عملائهم من الثورجية والإخوان 
اللي بيظن ان الصحافة الانجليزية نزيهة يبقى راجل طيب.. او اهبل 
واللي مش مقتنع بوجود مؤامرات على مصر يبقى برده راجل طيب.. او اهبل
المؤامرة على مصر جزء من التآمر على الإسلام على مر التاريخ لأن بدون مصر قوية لن يكون للإسلام شائكة وهما عارفين كدا كويس بس احنا للأسف هبل ومش عارفين

انجلترا يا حضرات هي موطن الماسونية في العالم.. مش امريكا.. مش اسرائيل.. دي مجرد واجهات لكن الأصل في انجلترا والقيادة في انجلترا والمركز اللي بيتحكم في كل حاجة بتحصل حوالينا هناك.. عند يهود انجلترا

سيول اسكندرية




للأسف البعض مش قادر يفهم ان في فرق بين تقييم الأوضاع و الإجراءات في الظروف والإمكانيات المتاحة وبين التبرير الأعمى ومحاولة اظهار ان كله تمام وان كله تحت السيطرة.
لأ انا مبقولش ابدا ان كله تمام.. بالعكس والله دا كله زي الزفت.. انا بس بقول ان الدولة ممثلة بشكل رئيسي في الرئيس والقوات المسلحة وبنسبة ضعيفة جدا الحكومة.. الدولة بتحاول تتعامل مع الأزمات التي لا تنتهي في ظل الامكانيات المحدودة المتاحة وفي ظل ضعف البنية التحتية الموجودة بالفعل.

في موضوع الأمطار احنا حاليا بنتعرض لسيول مش امطار طبيعية ودي كارثة بيئية مستحدثة مش حدث طبيعي متعودين عليه.. ودا نتيجة تغير مناخ المنطقة بالكامل والدليل تأثر اكتر من دولة في نفس الوقت بالأمطار الشديدة اللي تصل لحد السيول احيانا.. واللي مش عاجبه الكلام يشوف الكويت والاردن وعمان وتركيا وكندا.. كل دول غرقوا برده.. واكيد فيهم دول ان مكنش كلهم امكانياتهم أعلى وعندها تخطيط افضل مننا.. ومع ذلك برده غرقوا.. لأن دا حدث مناخي غير معتاد


طيب.. احنا جاهزين للسيول دي؟ لأ
طيب احنا جاهزين للأمطا العادية؟ فيما يبدو انه للأسف لأ ودا قصور من الدولة لكوه نااج عن تراكمات سنوات طويلة لا يصح ان يسأل عنها النظام الحالي.. في العام دا على الأقل

طيب هل الدولة بتواجه السيول دي؟ ايوة
الدولة ممثلة في القوات المسلحة والشرطة وبقايا المحليات بتواجه الظروف المناخية دي بالامكانيات المتاحة واللي ينكر دا يبقى جاحد
لما نشوف الجيش بيسحب المياة من الشوارع الغرقانة في اسكندرية في ظرف 24 ساعة
ولما نشوف ظباط شرطة وجيش بيسلكوا المجاري والصرف بايديهم يبقى تسلم ايديهم فعلا وتبقى الدولة بتواجه الظروف المستجدة دي في ظل الامكانيات المتاحة

لما حضرتك تيجي تنكر الجهود المبذولة دي تبقى انسان غير منصف او غير موضوعي او احمق او خاين على الترتيب 
لما تيجي تقارن بينا وبين دولة فائض ميزانيتهاواكتر من ميزانيتنا كلها تبقى حاجة من دول

من الآخر دي دولتك ودي ظروفها.. يا تستحمل وتساعدها انها تجتازها ولو بالدعم والكلمة الطيبة.. يا اما تغور في ستين داهية وصدقني محدش هيفتقدك ولا هتفرق مع حد هنا.. ولا هتفرق برا.. دا اذا عرفت تطلع يعني

اه على فكرة.. الافندية اللي بيقولوا نفسنا نطلع ومش عارفين
انت مش عارف تطلع ببساطة عشانك ولا حاجة وملكش قيمة ولا وزن.. لو كنت شخص ليه قيمة وممكن ينتج كانوا هما اللي اخدوك برا مكانوش استنوك لما تحاول تطلع
وجودك هنا مع رغبتك في الخروج دا شيء بيعني انك مش اكتر من حمار.. لا مؤاخذة يعني

الأربعاء، 28 يناير 2015

تدوينة عن مدونتي :)



اما عن واحدة من أكبر متع الحياة بالنسبة لأي مدون, فهي انه يدخل بين وقت للتاني يتفرج على المدونة بتاعته ويقلب في ارشيفاتها ويفتكر كلمة كان كاتبها هنا او تدوينة كان حاططها هناك او رأي اتبناه في فترة من حياته في وقت تكوين شخصيته :)

مدونتي يمكن مش عليها اقبال كبير لأني مبهتمش بالنشر ولأني للأسف مبفضاش اكتب من بعد الكلية(الواحد كان عنده كمية فراغ ايام الكلية يكفي لكتابة تاريخ مصر من اول ما كانت ازازة الكولا باتنين صاغ)
كل زوار مدونتي على بعض مكملوش لسه 29.000 زائر من وقت اطلاق اول تدوينة ليا في 31 أغسطس 2008 في سنة أولى كلية أو قبل ما تبدأ بأيام مش فاكر بصراحة ودا طبعا عدد بسيط جدا.
المهم اني سعيد جدا بالمدونة بتاعتي وفخور بكل حرف وكل رأي وكل موقف سجلته فيها وبعتبرها حتى الآن الإنجاز الشخصي الأقيم في حياتي.
-------------------------------------------------------------------


على الهامش:
زمان من 2011 وقت مشروع التغيير كنت حاطط في الـ side bar صورة للبرادعي وعامل كورنر تاني ليه مجمع فيه لينكات للتدوينات اللي كتبتها عنه (واللي بالمناسبة واحدة منهم طبعتها حركة 6 أبريل قبل الثورة ووزعت منها آلاف النسخ بموافقتي وهي حاجة انا مش ندمان عليها اكيد لأن وقتها كانت رؤيتي مختلفة شوية عن دلوقت).
من كام شهر شيلت صورة البرادعي واستبدلتها بصورة لجندي مصري بيدوس على كلمة اسرائيل.
وانهارده شيلت الكورنر بتاعه برده من السايدبار لأنه بمواقفه في آخر سنتين أثبت انه غير جدير بالمكانة دي.
أما المقالات اللي كتبتها عنه هحتفظ بيها في مكانها لأنها بتسجل فترة من حياتي أنا ومراحي تطور شخصيتي ورؤيتي لشؤون الدولة.

الخميس، 22 يناير 2015

#عن رواية "الفيل الأزرق"



انتهيت اليوم من قراءة رواية "الفيل الازرق" للكاتب المصري أحمد مراد بعد ما منحتني ظروف طارئة بعض الوقت في المنزل فضلت استغلاله في إعادة شحن بطارية القراءة في مخي والتي نضبت منذ زمن طويل..
في البداية تجدر الإشارة لأني لست من معجبين أحمد مراد و في رأيي هو أحد مرتزقة عالم ما بعد الثورة في مصر والذي استطاع استغلال الخط الشبابي المتفجر في الشارع المصري لصالحه و قدم منتجات بها مقومات النجاح "في مثل هذا السوق" 
اما عن سبب قرائتي للفيل الازرق بعد فترة ليست قصيرة من صدورها فهو اعجابي بالفيلم المصور عن أحداث الرواية و اقتناعي بأن جودة الفيلم تعود للمخرج و ليست للكاتب صاحب الفكرة، ففضلت قراءة الرواية حتى أتبين، أما عن سبب مشاهدتي للفيلم في الأساس فيرجع لمزيج سخيف من الفراغ والفضول.. 
لعن الله الفراغ و الفضول!! 
--------------------------------------
أحمد مراد يدرك جيدا انه لا يمتلك مقومات مقومات الكاتب التي تعينه على النجاح في سوق الأدب، ولا مقومات الأديب التي تعينه على إبداع عمل أدبي ذي قيمة عالية يكون مآله أرفف المكتبات في زمن شبابه لا يقرأ أكثر من بوستات "أساحبي"  على الفيس بوك.. 
لذلك عمد مراد لتقديم ما لا يستحق القراءة لمن لا يجيد القراءة طمعا في نشر سلعة فاسدة في وسط لا يقل فسادا سعيا لأرباح مادية بحتة و مكانة زائفة في وسط تائه يبحث عن قدوة تناسب أفكاره و اسلوب حياته...
في الرواية اول ما يفاجأك هو عدم قدرة مراد على المحافظة على لغة عربية سليمة في نصوصه.. 
فهو تارة يكتب بفصحى ركيكة و تارة يكتب بالعامية في عجز واضح عن الإحكام على زمام اللغة، و هي نقطة يدرك جيدا انها لن تشكل أزمة في تلوسط الذي يستهدفه.
أما عن ثاني ما يستوقفك في اسلوبه فهو ما يبدو أنه فهم خاطيء لديه لقيمة التصوير في التعبير، فهو لم يترك كلمة واحدة كتبها دون أن يضع لها صورة حتى صارت صوره تكفي لعمل كتاب بمفردها (متيبس كتمثال أثري)، (طنين كألف مدفع)، (رائحة فمي كمؤخرة خنزير ميت)...  إلى آخرها من الصور التي فاقت الحد المطلوب و المسموح وانتقلت إلى حد السخافة.
أما عن ثالث ما يستوقفك فهو اللعنات المتواصلة على فم يحيى الشخصية الرئيسية في الرواية فهو يلعن كل شيء و اي شيء دون أن تفهم سبب حقيقي لذلك.. 
على نفس النسق كتبت بالأعلى (لعن الله الفراغ و الكسل)
اما عن رابع ما يلفت نظرك في الرواية فهو استخدام الإباحية بشكل مرتبك، ففي بداية الرواية كان أقرب إلى التحفظ في الألفاظ و التعبيرات، في حين صار أكثر ميلا للتصريح في ربعها الأخير، و بين هذا و ذاك تراه مذبذب بين التحفظ و التصريح بشكل يشف عن استخدامه للاباحية كعامل جذب للقارئ ولاضفاء لمسة شبابية متمدنة(او هكذا ظن)  على كتابه كما نرى في الافلام العربية الرديئة التي يصفها اثحابها خطأ بالجريئة،، مع التأكيد أن كل هذا القدر كان في غنى عنه و بدونه ستصل فكرة الرواية كما وصلت به.
أما عن خامس نقاط النقض فهو ما يظهره الكاتب من عدم تمكنه من مقومات المشهد الذي يصوره.. 
فمثلا، عندما يصور مشهدا من التاريخ القديم (فترة المأمون)  تراه يستحضر كل ما يتخيله عن الفترة من مظاهر ويضعه في المشهد، فتراه يصف لك البيت بغرفته و اثاثه و خدمه و السوق خارجه برواده و احواله و... و... و... 
الكثير و الكثير من التفاصيل اذا اضفت اليها التصوير المبالغ فيه تشتت القاريء عن الفكرة الرئيسية للفقرة..
الرواية في مجملها لا تستحق الضجة المثارة حولها كعمل ادبي، و لكن تم التسويق لها بشكل جيد.. 
الرواية مكتوبة بطريقة تجعلها تصلح أكثر ك"سكريبت" لفيلم أكثر منها رواية.. 
في ظروف مغايرة لم أكن سأتحمس لاكمال الرواية و كنت على الأغلب سأعزف عن قرائتها بعد أول مائة صفحة و لكني كنت مدفوعا بشغفي للمقارنة بين الفيلم الجيد و الرواية التي كنت على يقين من تردي مستواها بالنظر لكاتبها و أحمد الله أن لم يخب ظني.. 
و أخيرا تحية مستحقة للمخرج مروان حامد على الإخراج الأكثر من رائع و الذي اجاد فيه كأفضل مخرجي هوليود بالنظر لامكانيات التنفيذ و الانتاج المتواضعة.. 

visitors