الثلاثاء، 29 أكتوبر 2013

باسم يوسف وبرنامجه




واخيرا بعد كل الدوشة اللي على الحلقة شوفت حلقة باسم الاخيرة دي وجه دوري اني افتى طبقا لعادة الشعب المصري في الفتي في كل حدث وأمر..

بداية انا مش من محبي باسم على الاطلاق لكن بشوف برنامجه عشان الضحك وعشان الفيديوهات اللي صعب اشوفها لوحدي(بكسل اتفرج على فيديوهات).

تاني حاجة.. انا مش شفت في الحلقة ان باسم بيحاول يقلل من 30/6 زي ما بعض اصدقائي بيقولوا ومش شفت برده انه بيروج لعودة الاخوان او بيدافع عنهم والكلام دا. 

تالت حاجة رأي في الحلقة بقى.. 
باسم اهم حاجة عنده انه يكون نجم شباك والناس بتتابع برنامجه وبتتكلم عنه وبس.. مش بيراعي مصلحة الوطن ومش عنده اعتراض انه يعمل اي شيء في سبيل ارضاء غروره ونجوميته. 
عشان كدا باسم دائما وابدا بينتقد اي حد في موضع المسؤلية عشان يبان انه مش بيخاف وخلاص بغض النظر عن هل "انتقاده" ده في محله ولا لأ وموضوعي ولا لأ.
مع مراعاة ان باسم مش بينقد لكن بينتقد والفرق بينهم كبير طبعا.
باسم عشانه خرج من رحم ثورة يناير فهو كان لازم يسلك المسلك الثوري الشكل ويسلك الطريق اللي يرضي الثوار عشان كدا طبيعي انك تسمع ف برنامجه نغمة الثورة والميدان ويسقط يقط حكم العسكر ومدنية.... الى آخره من الكلمات الفارغة بتاعتهم دي اللي بتنم عن طفولية وسذاجة وعدم وعي بشكل يبعث على الغثيان.
باسم مش خاين ومش عميل لكنه ببساطة بيسعى لارضاء فئة معينة من الناس ثبت بالأدلة الفعلية في عدة مناسبات انهم مجموعة يسهل استغلالها واقتيادها لتحقيق اهداف الجهات الخارجية اللى بتسعى لتخريب مصر زي ما تم اقتيادهم قبل كدا لايصال الاخوان للرئاسة للهدف دا.. وبالتالي فباسم نفسه يسهل التأثير عليه وتوجيهه لخدمة اغراض بعينها بشكل غير مباشر.

اما عن نقطة الإباحية المبالغ فيها في البرنامج فدي بتدل على افلاس حقيقي عند باسم وانه مش بقى قدامه طريق للاستمرار غير انتهاج الطريق دا.. واضح جدا ان الحلقة دي تخطت كل مستويات السفالة في المواسم السابقة واعتقد ان القناة لازم تتخذ موقف من دا نظرا لأنه برنامج منتشر بين كافة الفئات العمرية. 

واخيرا عن اعتذار القناة للفريق السيسي والقوات المسلحة..
فأنا شايف انه كان اعذار واجب ومش بيعبر عن ديكتاتورية ولا ان الجيش بيتحكم في الاعلام او كدة..
ببساطة لأن الاسلوب اللي باسم تناول بيه شخص الفريق السيسي لا يليق اطلاقا.. هو خرج بيه عن نطاق الانتقاد الساخر الى منطقة الإباحية الفعلية وقرن شخص السيسي بما يمثله كوزير للدفاع وقائد عام للقوات المسلحة بتعبيرات اباحية صرفة بشكل لا يليق وجب معه الاعتذار طبعا ولازم باسم نفسه يعتذر عن دا..

باسم اكيد خسر كتير من جمهوره في الحلقة اللي فاتت دي.. ولو استمر على كده يمكن دا يكون آخر مواسمه 
آه.. كانت حلوة الأغنية

السبت، 19 أكتوبر 2013

انه الـ nonsense


عندي مشكلة مع تقبل الناس اللي عندها ايمان بأمور دنيوية بشكل مجرد وكامل وغير قابل للتعديل او التغيير تبع تغير الظروف..
زي مثلا الناس اللي مؤمنة تماما ان A.C.A.B والناس المؤمنة ان العسكر كلهم كاذبون وخونة ومحتالين لمجرد انهم عسكر, وزي الناس المؤمنة ان اى حد يرفع ايده باشارة رابعة في وش عسكري جيش يبقى بطل(بالمناسبة دي مفيهاش اي بطولة لأن النوع دا من الأعمال معليهوش عقوبة اصلا.. يرفع اربع صوابع او خمسة او مية مش هترفق يعني طالما مش شايل سلاح).
 وكمان زي الناس اللى بتعتبر ان اي واحد منتمي لجماعة اسلامية هو بالضرورة شخص متدين بيسعى فعلا لخدمة دين الله وانه اكيد منزه عن الأخطاء البشرية اللي بيقع فيها المفرطين من امثالنا..
وكمان زي اللي مقتنع تماما ان مينفعش الحل الأمني مع اعتصام بيشكل خطر على وطن وانه الحل السلمي والحوار فقط هما الطريق الوحيد(د. البرادعي اقصد)..
وزي اللي مقتنع ان اي حد بيقول ثورة يبقى بالضرورة مثال يتبع وانسان رائع وشخص شجاع.

كلها تابوهات من صنع تفكيرنا احنا وبالتالي هي مش امور مسلمة ولا قرآن منزل وانما هي امور خاضعة لقانون التغيير والتبديل طبقا لمقتضيات الظروف والأوضاع لأنها في الأصل انتاج بشرى وليس وحي الهى..
عشان كدا الناس اللى بتفكر بالطريقة دي وعلى القدر الرهيب دا من الجمود انا مبقدرش القى بالا لرأيها مهما كانت مشهود ليها ومبعرفش اعير ليها اي اهتمام ولا حتى افكر ادور على رأي ليهم في المواقف المختلفة..
هما بالنسبالي مش اكتر من شخصيات ضلت في غابات العقل بعناد طفولي سخيف خلاهم يقفوا عند نقطة مش بيتحركوا عنها ومش هيتحركوا عنها..

عندي صديق دايما يقولي مش عشان حد مختلف معاك في الرأي يبقى "كفتجي" أو "حلاق" زي ما انت بتقول على الناس دي.. وانا متفق معاه ان مش اي حد يختلف معايا في الرأي يستحق الوصف دا لأنه قد يكون على حق, لكن بدون شك أي حد بيفكر بالأسلوب الجامد دا يستحق الوصف دا تماما مهما كان على قدر عالي من التعليم او الامكانيات..
د. البرادعي نفسه رأي فيه اتغير كتير بعد ما اصر على اتباع اسلوب الجمود الفكري في مواجهة ازمة رابعة واندهشت جدا انه ازاي شخص بالعقل دا كان يظن انه ممكن يكون في حل غير امني لمشكلة رابعة..

الخلاصة ان اي حد بيفكر بالأسلوب دا هيظل دايما بالنسبالي "حلاق" أو "كفتجي" لأنه عقله وقف عند نقطة معينة مبقاش يعرف يتحرك منها.. بالزبط زي الحلاق اللي طول عمره بيحلق نفس الحلقة ومش عارف يغيرها او الكفتجي اللي بيقضى حياته كلها يحط نفس التوابل على اللحمة ويشويها بنفس الطريقة بدون اي تجديد.

وأخيرا لو انا مش مقتنع تماما ان رأيك المخالف ليا غلط يبقى انا مش مقتنع تماما ان رأيي المخالف ليك صح.. ودي أزمة

visitors