خيالات الزومبي في عقول الإسلاميين

وفجأة

لقوا نفسهم تحت الأرض

استغربوا وبصوا لبعض

احنا فين مش دا مكانا؟

احنا بتوع فوق وجايين من فوق

لأ احنا اكيد مش تحت

احنا مش ممكن نكون ابدا تحت

الناس اللى حوالينا ماشيين فى الهوا.. ايوة هما ماشيين فى الهوا بس هما اللى مش حاسين

العربيات اهى كلها طايرة مش ماشية على الأسفلت.. السواقين بس هما اللى مش واخدين بالهم

وابواب العمارات حتى بقت فوق مش تحت.. بس الناس مش شايفة وهى بتخرج وتدخل

كل حاجة اتقلبت عن وضعها الطبيعي

منعرفش ازاي

منعرفش ليه

بس احنا عارفيين اننا فوق

احنا مش ممكن نبقى في يوم تحت

دي كلمات بسيطة بتعبر عن عقل الإخواني دلوقت (مع ملاحظة ان الكلام هنا كله يسقط على الإخوان وجميع المنتمين للتيارات الإسلامية أو المؤيدين ليهم أو المتعاطفين معاهم)

-----------------------------------------------------------

هو فجأة لقى نفسه بعد ما كان شايف انه وصل للنجوم نزل تاني على الأرض.. بس مش اي نزلة.. دا نزل على جدور رقبته.. اتاخد غدر وخوانة ومن قمة النجاح لقمة الفشل مرة واحدة..

عشان كدا عقله رفض يتقبل الحقيقة دي..

رفض يتقبل حقيقة انه بقى تحت مش فوق..

وفضل مصر انه فوق وانه لسه فوق وان كل مشاهد الكون حواليه هي اللى اختلت..

عقله دخل فى حالة من الـ denial  وصلته انه ينكر كل ما له صلة بالعقل والمنطق وبقى مش شايف غير ما يصوره له عقله وبس..

عشان كده عقله صورله انه بقى عايش كأنه في فيلم من أفلام الرعب الرخيصة اللى بيكون فيها سكان الأرض كلهم اتحولوا لزومبي وبيهاجموا القلة القليلة الباقية من البشر على الأرض..

هو فعلا بقى شايفها كدا..

شايف ان الدولة بكامل اجهزتها والشعب بكامل فصايله والدول الخارجية كلها ضده

كلهم زومبي

ومفيش بشر غيره

عقله عشان فشل يقبل واقع الخسارة وهي بالفعل كبيرة ومفاجأة

كبيرة لأنه خسر كل حاجة.. ومفاجأة لأن اللي بيمشوه مدولوش فرصة يشوف اشارات السقوط اللى كانت واضحة من زمان اوى..

اشارات السقوط اللى كانت واضحة من قبل صعوده حتى..

عقله معرفش يستوعب دا ومقدرش يتفهم دا.. ومقدرش يتحمل دا..

واختار انه يخلقله عالم بديل يعيش فيه يكون هو العاقل الوحيد

ويكون هو الصح الوحيد

ويكون اللى حواليه كله محطم ومشوه

ويكون هو وهو بس اللى بيدور على خلاص الكوكب من ظلام الزومبيز اللي بينتشر للناس كلها حواليه

للأسف هما وصلوا لحالة من الـ denial مرضية ومحتاجة فعلا علاج وتأهيل نفسي حقيقي..

بس دا مش هيكون ابدا ممكن غير بعد حاجتين

أول حاجة التعامل مع القيادات اللى وصلتهم ووصلت المجتمع للحالة دي

تاني حاجة انهم هما نفسهم يكونوا عايزين يشوفوا وضعهم دا وحاجتهم للعلاج

لازم هما نفسهم يوصلوا لنهاية فيلم the others  بتاع نيكول كيدمان لما كانت مصرة ان البيت فيه اشباح وطول الفيلم بتحاول تحمي ولادها منهم وفي الآخر اكتشفت ان هي وولادها الأشباح ومش كدا بس.. لأ كمان انها هي اللى قتلتهم وانتحرت.