الخميس، 27 يونيو 2013

عن حال اللاجئين السوريين فى مصر



تدوينة كدا على السريع عبارة عن نظرة خاطفة فى حال بعض اللاجئين العرب إلي الأراضي العربية
--- --- --- --- --- --- --- --- --- ---

من ايام الشقة اللى فوقنا اجرها ناس سوريين، وبالنظر للعدد والفئات العمرية يبدوا انهم أكتر من اسرة كحال معظم السوريين الموجودين فى أكتوبر اللى بيضطروا يسكنوا أكتر من عيلة فى نفس "الشقة".
دا طبعا نتيجة لخصلة "حميدة" فى المصريين وهي حب استغلال مصايب الغير،، فمع بداية توافد اللاجئين السوريين على مصر تضاعفت الإيجارات،، الشقة ال ٣ غرف اللى كان ايجارها الف ونص بقت بقدرة قادر ب ٣ آلاف وأكتر..
وطبعا اللاجيء اللى سايب بلده وفلوسه وشغله وجاي فى مكان غريب معهوش فلوس ومعندوش شغل لكن معاه عيلة عايزة اعالة يومية دا هيجيب فلوس منين يدفع كل ٣٠ يوم ٣ آلاف جنيه؟؟ دا المواطن مبيقدرش عليها!!

لك ان تتخيل وضع وجود أكثر من عائلة فى شقة واحدة ٣ غرف وصالة وحمامين..
ايه شعورك كزوج وفى راجل مش محرم على مراتك معاكم فى الشقة؟؟
وحياتها عاملة ازاى كامرأة متقدرش تاخد راحتها غير فى حدود غرفتها وبس ولو حبت تخرج تشرب مياة لازم تتكلفت فى الحر دا مع كل فتحة باب..
دا غير المشاكل التانية الكتير اللى يمكن ادراكها بدون ما نتكلم فيها..
وفوق كل دا لما فلوس الناس دي تخلص هيعيشوا ازاى فى ظل الايجارات دي؟
احيانا بتجد اسر بنساءها وأطفالها فى الشارع معهاش ثمن مأوى ومنتظرة ان حد من أهل الإحسان يكفلهم...
الشعب السوري دلوقت اما انه بيموت فى سوريا بايد جنود بشار الأسد وايران وحزب اللات،، واما انه بيموت فى سوريا بايد ارهابيي القاعدة،، واما انه عايش لاجىء فى دول من لغته ودينه حياته فيها الموت منها اهون...
--- --- --- --- --- --- --- --- --- ---

جدير بالذكر ان الشقة اللى تحتنا تسكنها أسرة عراقية من النازحين منذ أيام حرب العراق،،
والعمارات المجاورة مليئة بالفلسطينيين منهم من أتى للدراسة ومنهم من اتى للإقامة،،
وعلى بعد عدة شوارع من مسكني يوجد مقر للأم المتحدة يهتم بشؤن اللاجئين تجد فيه من الأفارقة والفلسطينية والسوريين اعداد مهولة...
--- --- --- --- --- --- --- --- --- ---

آه صح،، نسيت أقولكم ان مجلس الشورى "الإسلامي" اللى تكلفة دعايا انتخاباته كانت ملايين(فى تقارير ان حزب الحرية والعدالة لوحده تخطى انفاقه فى الانتخابات النيابية والرئاسية المليار ونصف) قد أصدر قرار منذ ايام بمنع "الباليه" اللى يمكن تلات أرباع  الشعب لو سمع اسمه هيفتكرها أكله غريبة أو اسم مسلسل تركي

والله الموفق

جهاد فيرمونت



من ألمع التعليقات الساخرة اللى قريتها على خطبة العريفي فى القاهرة امبارح كانت تويتة لشاب عربي كاتب: "خطبة الشيخ العريفي حمستني للجهاد وإنى لأتسائل أى لواء سيقوده الشيخ حتى أقاتل تحت امرته"
بصراحة جاب من الآخر

الأفندية اللى منحوا نفسهم لقب علماء المسلمين زورا وظلما وبهتانا بيتعاملوا مع المسلمين فى موضوع الجهاد بمبدأ: "اذهب أنت وربك فقاتلا انا ها هنا قاعدون"

هم يقولون دوما الله غايتنا والرسول قدوتنا والصحابة سلفنا..
حلو أوي
الرسول-صلى الله عليه وسلم- كان يخرج على رأس الجيش فى الغزوات وهو فوق الخمسين،، وأكثر أولئك المدعين فى مثل هذا العمر وأقل،، فأين أنتم من الجهاد؟؟ ما عذركم عن القعود؟؟

- اذا كنتم تعانون من المرض فالرسول قدوتكم كان المرض يأتيه كمرض رجلين منكم كسائر الأنبياء
- اذا كنتم تدعون الفقر فلن تكونوا أفكر من الرسول قدوتكم الذى خشي أن يلقى ربه وفى داره درهم ولا دينار لم ينفق فى سبيل الله
- اذا كنتم تخشون على الإسلام من بعدكم فلن تكونوا انفع للإسلام من الرسول قدوتكم ومع ذلك فقد كان يخرج بنفسه للقتال
اذا فما عذركم؟!

اما ان تتقدمونا فى الصفوف الأولى وتخرجوا بنا قادة ومعلمين،، واما ان تكتفوا بالجهاد فى فيرمونت وفورسيزونز حيث ميدانكم

visitors