يا ريت كنت اعرف اعزف على الربابة عشان اعرف احكى حكاية الحرامى زى ما المفروض تتقال..
--------------------------
كان بيت بسيط في حتة هادية وصاحبه
راجل غلبان على باب الله
عايش وحيد فى بيته
من غير لا أهل ولا خلان
والناس يا ولدى ما ليها أمان
في يوم خرج صاحب البيت
يضرب في أرض الله
بيسعى في طريقه مطمن
مش شاغل باله لا مال ولا جاه
والناس يا ولدي ما ليها أمان
جه حرامي على بيته وبص وقال
الراجل ده اكيد مخبي من الفلوس جبال
ودخل الحرامى البيت ودور
ودور
ودور
لحد ما تعب من التدوير
مالقاش مليم احمر وقال ده مش معقول
ده راجل عايش لوحده
واكيد عنده كنز مدفون
قعد الحرامي ينطنط فوق الأرض
ويحفر تحت الأرض
لقى خزنة مقفولة وقال
لقيت الكنز الكبير
ما يعرف ان اللي فيها
أغلى من الياقوت بكتير
حاول الحرامي يفتحها مقدرش
يكسرها مقدرش
يشيلها مقدرش
تعب من التفكير
قال آخد نفسى وأمشي
قبل ما ييجي صاحب البيت
مشي الحرامى مش عارف
انه سايب وراه أدلة كتير
أصله خايب يا ولداه
والناس يا ولدى ما ليها أمان
رجع صاحب البيت وشاف
بص وعرف ان كان فى البيت حرامي
ما عندوش فلوس يقلق عليها
بس عنده كنز ثمين
طلع يجرى على الخزنة
لأجل ما يطمن ان كنزه بخير
ولقاه بخير
شكر ربه وبص حواليه
لقى الأدلة اللي سابها الحرامى
جمع الادلة وعرف هو مين
عمل معاه قعدة تاني يوم
أصل الحرامى كان صاحبه لا مؤاخذه
وبيحقد عليه
جاب الحرامى وواجهه بالأدلة
الحرامى من خيبته وكسوفه نخ واعترف
قاله الراجل اطلع بره بيتى ما عدتش تدخله تانى
انت حرامى خيبة ومنحوس
لا عارف تسرق ولا عارف تنقى بيت
بقى جاى تسرقني وانت عالم بحالي
قاله الحرامي نقيت.. نقيت وفي بيتك لقيت
كنز أكيد يسوى كتير
قاله يا حرامى انت كنت هتسرق اللي من الياقوت
أغلى
عارف يا حرامي الخيبة الخزنة دى فيها ايه؟
فيها سر سعادتي وغنايا
منديل.. وكام ورقة.. وكلمتين
