السبت، 6 ديسمبر 2008

أيها السادة.. اخلعوا الاقنعة

الحقيقة دوما ما تكون مؤلمة وإلا ما كان خلق الزيف وما عرفت الحقيقة..
فصعوبة الحقيقة تكمن فى انها تذكرنا بآثام لم ننسها لكننا نتناساها..
ولأن هذه الآثام تؤنب ضمائرنا-وهذه فطرة-فقد توصلت المعجزة المسماه بالعقل البشرى الى اختلاق زيف فى صورة حقائق.. هذا الزيف يكون مغايرا للحقيقة إلا انه يرضى نفوسنا المريضة التى تهرب من الآلام وتبحث عن الجمال وإن لم يوجد فهى تختلقه..
وهذه امثلة من حياتنا اليومية نرى فيها ذلك بوضوح..

(-)رجل يدخن وهو يعلم تماما بأضرار التدخين إلا انه يقنع نفسه بأن السيجارة هى وسيلته للاستقرار النفسى وانه لا يستطيع الإقلاع عن مثل هذه العادة

(-)شاب يدعى الفضيلة ف العلن وأنه لا يسب ولا يدخن ولا يشاهد القنوات الإباحية وهو فى الواقع غارق فى ذلك لأذنه

(-)فتاة تدعى انها من وسط معين وان معارف والدها هم هذا المسؤل او رجل الأعمال ذاك وتتناسى يوم ان جائت من احدى القرى المجهولة من غيابات الصعيد قبل ثراء والدها

هذه امثلة والآلاف غيرها تؤكد ان الإنسان دائما ما يهرب من واقعه بحثا عن الحياة المثلى كما يتصورها وبذلك يحظى بحياة تشبه حياة الفنانين مليئة بالألوان الصناعية خالية من المشاعر البشرية..

فماذا اذا جرب الإنسان ان يكون نفسه ويعيش ذاته..
ماذا يحدث اذا قال المدخن نعم هذه السيجارة تقتلنى لكنى لن اقلع عنها لأنى أضعف من ان افعل، ماذا يحدث إذا اعترف الشاب بسوآته تلك، وماذا يحدث ان اعترفت الفتاة بحقيقة اصلها قبل الغنى..
ماذا سيحدث ان خلعنا جميعا اقنعتنا؟
فى تقديرى الشخصى لن يغير ذلك شيئا الى فيمن اراد ان يتغير.. لكن هؤلاء الذين لم يصبهم التغيير سوف يعيشون فى سلام حقيقى مع انفسهم بعد ان تخففوا من ذلك القناع المجهد الذى اثقلوا انفسهم به ادهرا..
والإنسان بالفعل فى حاجة لأن يعيش فى سلام مع نفسه


إلى حبيبتى/ حبك انتى

(الحب)
كلمة مبهمة حاول الآلاف عبر الزمن وضع تعريف لها
تاه فى أمرها من العشاق من تاه
وعانى فى سبيلها من عانى
وأنا هنا لست بصدد البحث عن معنى لهذه الكلمة ياحبيبتى
فلا يعنينى منها شئ الا اصطلاحها-خطأ-لعلاقتنا
فقد قلتها من قبل
ليس عدلا ان نسمى علاقتنا حبا
فقد اجتزنا هذه المرحلة مذ ان عرفنا بعضنا فى اول يوم
لا بل قبل ان يعرف احدنا الآخر
فقد قدر لنا ان يجمعنا حب سرمدى يفوق الأهرام عمرا

من أين جئتى يا من تغنى بعشقك قلبى؟
ما الذى فعلتيه بى؟
كيف غيرتى حياتى بهذه البساطة وأحلتيها لنعيم دائم لا يعكر صفوه الا توارى شمسك خلف سحب الظروف احيانا؟
لقد علمتينى كيف ان الحب جميلا عندما يكون متبادلا
ابحرتى بى فى انهار من حنانك الذى لا مثيل له ولا نهايه
اخذتينى الى عوالم داخلى لم اعرفها من قبل ولم احلم يوما بوجودها
ماذا اقول فيكى وقد منحتينى ما ان عرفته لك دهرا ما وفيتك
لقد تسللتى الى قلبى برقتك تلك التى لم اعهد لها مثيلا قبلا
بين ضلوعى اتخذت مسكنا تبثينى منه دفقات من حنانك تنسينى ماضيى ومستقبلى
اى حب هذا الذى تسقينى عذب رحيقه، فأنا لم اسمع بمثله يوما فى كتب العاشقين

عيناك اذا التقت بعيناى شعرت بأنى انظر لأجمل الحور
همس حديثك اذا خرج من بين شفتيك الواعدتين اطرب قلبى بما لم يخطر على باله يوما
لمسة يدك تنسينى من انا وتلقينى فى جزيرة من الخيال ليس بها الا انا وانتى يا وردتى

سألتك بالله الا تمنعى عنى حنانا اضعت عمرا فى البحث عنه
أنا لكى و انتى لى -وان جاء علينا الزمان- بمشيئة رب الزمان
فها انا انتظر وانتظر يوم يضمنا سقف واحد
يوم ان نقرأ العهد الا يفرقنا سوى الموت
يوم ان انام على صورة وجهك الملائكى
ويوقظنى همس قلبك كى نقضى فصلا جديدا من فصول حبنا المتجددة دائما
فقريبا يا غاليتى يتحقق حلمنا، ونصبح معا دون ان نخشى الفراق
حبيبك

,,أمل عمرى,,

كل البشر الطبيعيين بتحلم وبيكون عندها هدف وحلم وطموح والحاجات اللى مش بتتحقق دى..

افتكر انى أريت مرة خبر عن المبدع البرازيلى (كاكا) بيقول فيه انه يتوقع انه يوصل قمة مستواه بحلول 2010.. الراجل عنده طموح

مرة تانية بدردش مع واحد صاحبى وبسأله ايه اللى جابه الموكوسة مع انه جاله صيدلة.. قاللى انه عايز يكون طبيب.. يعنى الراجل عنده حلم يارب يحققه

واحد صاحبى تانى قاللى انه لما دخل الموكوسة اول يوم كان هدفه يكون رئيس اليونيسيف.. طموح برده

حسيت من ده كله ان الإنسان يفترض انه يكون صاحب حلم وطموح.. قعدت اهرش ف راسى(تفكير مش قمل) وادور على حاجة اكون حلمت بيها ف يوم من ايام العمر السعيدة قليلا والمملة كثيرا والكئيبة معظم الوقت.. وصحيت على الحقيقة المرة يا انشراح.. انا مش انسان طبيعى!!!
وحياة الفار اللى بيتمشى بره الأوضة وحابسنى جوه.. وحياة كل كلمة غلط فى كتاب الفسيولوجى بتاع همت ما لقيت عندى احلام..
قبل ما تتعالى اصوات الموسيقى الصادرة من افواهكم على اختلاف التوزيع(مع مراعاة ثبوت اللحن).. أنا فعلا مش عارف السبب بس عارف انى عمرى ما اتمنيت ابقى حاجة كبيرة.. ما حلمتش ابدا اكون وزير ولا حتى مدير.. ما اتمنيتش حساب فى سويسرا ولا حتى بنك السويس.. ما فكرتش يوم اخد جايزة نوبل ولا حتى نوفل..
مش عارف الخلل فين بس وش انا مش طبيعى..

رغم انى مش كان عندى طموحات متعلقة بالكاريير او كده بس كان نفسى ف شوية حاجات بسيطة..
-بيت بسيط على اى شاطئ فيكى يا محروسة عشان انا بعشق البحر
-اشتغل مهندس(ما قلتش عميد هندسة بس الواحد لازم ياكل عيش برده)
-الاقى واحدة تحبنى واحبها.. تكون صديقة وحبيبة وزوجة.. تكون بيت ومأوى.. تكون دفا وحنان.. تكون راحة وامان.. نعيش سوا حياة عنوانها البساطة.. من غير تكلف ومن غير أضواء.. من غير ناس ومن غير اى حاجة غير حب صافى برئ..

بس ده اللى نفسى فيه مش اكتر..
بس دلوقت بقى عندى حلم و هدف بدعى ربنا يقدرنى اعمل كل المطلوب عشانه..
امل عمرى اللى اقتحم حياتى وفرض نفسه عليا هو حبيبتى اللى بجد أنا مستعد ادفع نص عمرى واعيش النص التانى معاها.. ده اللى بجد اقدر اسميه حلمى الأول وربما الأخير.. بس الاكيد انه الحلم اللى تحقيقه ضرورى للحياة.. حياتى


بحبك يا مصر

نفسى اعيش عمرى كله اخدم ترابك.. 
اتنفس هواكى.. 
اشرب من نيلك.. 
اعلى فيكى واعلى بيكى.. 
نفسى اموت على ارضك وادفن فى رملك.. 
نفسى ما يجيش يوم اسيب فيه ارضك.. 
نفسى اشوفك قائد للعالم كله تديله علم ونور وحضارة.. 
ده مش جديد عليكى.. 
العالم ما نورش غير بنورك.. 
والعلم ما اتنشرش غير من سطورك.. 
لو الايام جات عليكى شوية..
هتقومى من تحت التراب تانى..
هتقومى وتقولى انا لسه قوية..
فى حبك يا مصر ما يكفينيش نيلك..
لو بقى مداد اكتب بيه كلامى..
انا مش شاعر بس ده صوت قلبى..
اللى كل نقطة دم فيه من خيرك..
بحبك يا مصر.. 
بحبك من قلبى..

(واحد من ولادك)


الأربعاء، 12 نوفمبر 2008

fuck life

ما بال هذا العالم صار بلا طعم..
كل الاضواء خافتة..
كل الالوان سوداء..
كل السموات مظلمة..
كل ما يبعث على البهجة قد زال..
كل ما يبعث على الحزن قد هل..
كل من نحبهم قد غدروا..
كل من نريدهم قد ذهبوا..
كل ما تمنيناه بات سرابا..
لا يسعنا حتى ان نفكر فيه..
ولا يحق لنا مجرد الحلم به..
ما بالنا نعيش فى حياة فقدت حياتها؟؟
نعيش فى ارض لا تشبع من الكره..
ارض لا تظمأ للحب..
أرض لا تعطى السعادة..
ولا تدرأ الشقاء..
هل يا ترى لنا ان نطلب الموت؟؟
هل يا ترى لنا ان نحلم بتجربة اخرى؟؟
لقد جربنا الحياة فسقمناها..
فلما لا نجرب الموت عله يكون اجمل؟؟
لقد تعبت من عالم لم يجلب على سوى الدموع..
ورغبت فى عالم ارتاح فيه من البكاء..
فهل لى ان ابلغ ذلك العالم؟؟
وان لم يكن لى هذا.. فهل لى.. ان اترك عالم الاحزان؟؟

الاثنين، 3 نوفمبر 2008

handcuffed

جميل ان تعرف الحقيقة.. مهما كانت قاسية..

جميل ان تعرف من انت.. وما انت..

جميل ان تعرف قدرك.. وقيمتك..

جميل ان يكون الناس كما يجب ان يكونوا.. وان يروك كما تحب ان ترى..

جميل الا تندم على احتقارك لهم..

جميل ان تستعذب انتقاد سقطاتهم..

جميل الا تعنى شيئا لهم فلا يعنى احتقارك لهم شىء..

انا بطبعى لا احب الناس واصدقائى من الناس.. ولكنهم قدموا لى ما ان لم يزرع فى قلبى حبهم زرع تقديرهم.. وفى قراءة صغيرة لحال اصدقائى وموقفهم منى وموقفى منهم اجد انى قد اكتشفت فى الفترة الاخيرة انى لا اعنى الكثير لاصدقائى.. فلقد اخبرت منذ فترة من احدى صديقاتى المقربات(ان لم تكن الاقرب من صنف النسوان) انها لا تثق بى.. واخرى اظهرت نفس الشىء بالفعل لا بالقول..
واما عن اصدقائى الذكور(وما اقلهم) فانى فى حيرة من امرى منهم.. فهم فى نصحهم واهتمامهم أصدقاءا كما يجب ان يكون الاصدقاء.. الا اننى فى حيرة من امرى.. فأنا لا أستطيع ان اعاملهم بالمثل.. لأنى اكره بشريتهم وأسباب اخرى.. وأقسم انى انتظر اللحظة التى ارى فى عيونهم لمعة عدم ثقة او احتقار.. كى اتحرر من هذا الشعور السخيف بالدين لولائهم ورعايتهم..
أقسم انى بحاجة لكراهيتهم ونبذهم لى.. كى اكون حرا.. فأنا لا أحب القيود.. ولا حتى قيد الصداقة.. فالأصدقاء بشر...

فيا ترى هل أعيش حتى ارى ذلك اليوم الذى اتحرر فيه من قيد صداقتهم؟؟ ام اعيش ابدا فى ذلك القيد السخيف؟؟؟


الثلاثاء، 21 أكتوبر 2008

when u r in Rome,, act like its people

من فترة نزلت كلمات اغنية لماريا اسمها touch my body فى note علبى ال facebook وفى اتنين من صحابى مش عاجباهم الاغنية.. عادى


لو جينا للاغنية نفسها.. فهى اغنية سافلة بكل المقاييس.. سورى يعنى ناقصها كاميرا فيديو.. او حتى دى ما فاتتش على ماريا لان الاغنية معمولها كليب افظع من الكلمات..
من ناحية تانية الاغنية جميلة جدا وانا بحبها اوىىىىىىى وفى ملايين غيرى من عشاق ماريا بيحبو الاغنية دى لانها ا شاءالله سمعت جامد :D:D:D

طبعا هتقولو انت بتستعبط عشان الكلام متناقض وكده.. بس الواقع لا انا مش بستعبط خالص والله... كل الموضوع ان فى حاجة اسمها.. "when u r in Rome,, act like its people".. يعنى ايه بقى؟؟ اقولكم انا

لو احنا جينا تناولنا الاغنية دى بمنظورنا احنا وثقافتنا وفكرنا وعنينا كشرقيين عموما ومسلميين خصوصا طبيعى اننا نلاقى الاغنية فاجرة وماريا تستحق اقن يقام عليها الحد لما فيها من خلاعة وفجور والكلام اللى متعاص دقون ده..
انما لو جينا بمنظور البيئة اللى اتعملت فيها الاغنية دى وثقافتها وفكرها وعنيها مش هنشوفها كده.. هنشوفها اغنية حلوة بتتكلم عن موضوع زى اى موضوع لاى اغنية وحاجة هما عايشين فيها واصلا مش محل نقاش باعتبارها شىء طبيعى زى مثلا ما شروق الشمس من الشرق شىء طبيعى..

ده اللى انا عايز اقوله.. احنا لما نحكم على شىء مش مننا مش ينفع نحكم عليه بقوانينا وفكرنا.. لا.. احنا نحكم عليه بقوانين البيئة اللى طلع منها.. وساعتها نشوف حلو ولا وحش..
we gotta judge the others according to their values not ours,, that's all wt I mean
طبعا احنا مش مجبرين نتعامل مع ثقافة الغير طالما انها مغايرة لثقافتنا.. لكن طالما اخترنا اننا هنتعامل معاها.. يبقى مش ينفع نطبق عليها قوانينا احنا..

بس.. يعنى فى كام موقف تانى انا هقولكم عليهم زى دول..

-فى واحد بانى فيلا جنبنا.. هو ربنا يكرمه كان تاجر مخدرات كبير وتاب ودلوقتى شغال فى تجارة الاثار وفى غسيل الاموال.. ربنا يزيده يعنى
الراجل ده بنى فيلا على الطراز الانجليزى وبجد مبهره.. انا لما شفتها كنت مبهور بيها جدا(عشان تعرفوا فايدة المال الحرام.. سيبكم من العلم ده سكته وحشة) بس الناس لما شافوها قالوا عليها كنيسة وخد بقى يا عم..
ده برضه لانهم طبقوا عليها قوانين العمارة بتاعتهم اللى هى تتلخص فى بلكونة وشباك.. لكن لو بصوا مثلا على اى فيلا فى الريف الانجليزى.. وش.. ولا كلمة


-حاجة تانية.. فى الجزء الرابع من هارى بوترthe goblet of fire كان فى مشهد تحت المياه وكانت احدى المتسابقات نازلة بالمايوه(قطعة واحدة مش قطعتين.. قطعة كبيرة يعنى).. واحد صاحبى الحكاية دى صدمته وازاى بقى مشهد زى ده يطلع فى فيلم زى هارى بوتر وانا اول مرة اشوف مشاهد زى دى هنا وكأن كليب touch my body اتعرض فى الفيلم.. وده راجع لنفس النقطة اللى انا اتكلمت عليها سابقا...

بس هو ده الموضوع كله

testis & ovary


طبعا احنا عايشين فى مجتمع شرقى..
الجيل بتاعنا يمكن حاليا منفتح شوية بحكم تطور وسائل الاتصال بالغرب والاطلاع على ثقافتهم وحضارتهم..
شفنا عند الاجانب حاجات حبينا نقلدها وحاجات اتمنينا نعيشها.. لكن كانت الاسس والمبادىء اللى اتربينا عليها واقفة فى طريقنا.. بقينا نفسنا اننا نعيش حياة الغرب بس مش عارفين..
الموضوع ده وصلنا لمرحلة اننل بقينا عاملين زى اللى واقف فى نص السلم لا عارف يطلع ولا راضى ينزل.. احنا لا عارفين نعيش حياة الغرب زى ما اهلها عايشينها ولا راضيين بحياتنا اللى طلعنا فيها..
لكن طبعا فى نقطة مهمة جدا ما عملناش حسابها.. احنا لما نيجى نتعامل مع حياة غريبة علينا لازم نتعامل معاها بالقوانيين اللى هيا جات بيها.. يعنى مش ينفع اقول انا هعيش حياة الخزاجات بقوانين بلدى..
كده لا هعرف احترم قوانين بيئتى ولا هعرف اعيش حياة الخزاجات.. وده بالزبط اللى احنا فيه دلوقت..

المقدمة يمكن شوية بعيدة عن الموضوع لكن حسيت انى لازم احطها فى الاول..
المومضوع الاساسى لل note دى هو العلاقة بين الولاد والبنات..
مفيش شك ان انهارده مش زى عشر وعشرين سنة فاتوا.. يعنى دلوقتى العلاقات بين الشباب من الجنسيم بقت شىء طبيغى ومقبول فى مجتمعنا.. لا دى بقت شىء ضرورى ومفيش منه مفر.. احنا كطلاب جامعة غصب عننا بنحتك بزميلاتنا البنات فى الكلية(للاسف) وبتنشأ بالتالى علاقات بينا وبينهم منها اللى بيكون برىء غرضه صداقه شريفة او حب طاهر ومنها اللى بيكون غرضه دنىء زده بيرجع لطبيعة الولد والبنت واخلاقهم وكده...

الاول عايزين نتكلم عن اسباب وجود علاقات بين الشباب من الجنسين.. سيبكم من حكاية الاخنلاط وكده.. انا من وجهة نظرى المتواضعة شايف ان العلاقة دى بتنشأ لوجود نوع من الانجذاب من كل جنس للجنس الاخر.. يعنى مفيش بنت فى الدنيا مش تحب انها تتكلم مع ولد على الاخص فى فترة الشباب دى ومفيش ولد فى الدنيا مش يحب يكون عنده صديقات بنات(نلاحظ وجود فرق بين الحب والصداقة).. ده شىء غريزى فى الانسان بجنسيه.. ده مش شىء فى ايدنا او نقدر نتحكم فيه وانما راجع فى الاساس للهرمونات الجنسية اللى بتتفرز فى جسم الولد او البنت بعد البلوغ.. اتمنى ان الموضوع مش يختلط على حد.. انا هنا مش بعرض افكار سيجموند قرويد اللى كان بيفسر كل حاجة فى الدنيا على اساس الجنس.. انما انا بقول ان الهرمونات الجنسية بتلعب دور رئيسى فى العلاقات دى.. لانها اصلا بتسبب انجذاب من كلا الجنسين للاخر..
 اللى ممكن يأكد كلامى ده ان الرغبة من عند الطرقين فى التعرف على الطرق الاخر بتنفجر غالبا فى فترة الشباب وبصورة ملحة وهى دى الفترة نفسها اللى بيتم فيها البلوغ.. وكقرين تانى بنلاحظ فى الفترة دى اهتمام الشباب من الجنسين بحسن مظهرهم الخارجى وده اكيد مش عشان يعجبوا اصحابهم اللى من نفس الجنس..

الموضوع ده انا حبيت اتكلم فيه لانى لاحظت من خلال وجودى فى الجامعة ان فى زمايل ليا واقفة بجد على السلم.. يعنى الولد منهم يتعرف على بنات ويكون معاهم علاقات محترمة جدا وبعدين يرجع يلوم نفسه على كده وكأنه عمل حاجة غلط..
مع انه بشوية تفكير بسيط ممكن يوصل لحقيقة بسيطة جدا وهى ان ربنا خلق الكون ده كله من ذكر وانثى.. ده حتى فى الكهربا فى موجب وسالب.. والقطب الواحد مش ممكن يولد كهربا..
يبقى اذا احنا بغريزتنا شغوفين بالتعرف على عالم الجنس الاخر(ولاد او بنات) وده معناه ان العلاقة حتمية.. ويبقى بس تحديد شكل العلاقة واعتقد اننا اشرنا للاساس اللى بيحدد شكل العلاقة دى فى بداية الموضوع..

نلاحظ مع ده كله ان فى مجموعة من الشباب اولاد وبنات(قلة فى اماكن واغلبية فى اماكن اخرى) بتتجنب تماما الجنس الاخر.. وده بيكون راجع فى الغالب لظروف نشأتهم واللى بتكون غير منفتحة بما يكفى انها تسمح بتكوين علاقات وده مش يتعارض مغ موضوع الهرمونات لان هنلاحظ ان نفس الفئة المنغلقة دى عنتدها ميول ورغبات للتعامل مع الجنس الاخر ولكن اسلوب النشأة هو اللى بيقف حاجز ولغاية ما يتكسر الحاجز ده(عند الانتقال لبيئة اخرى) الفئة دى بتعانى من صراع نفسى بين اللى اتربت عليه واللى هى عايشة فيه..
يعنى تعالوا نتخيل مثلا ولد مش بيتعامل مع زميلاته البنات.. لو فى موقف جمع انفس الولد بزميله ليه وكلمته ولو حديث عابر او حتى سؤال فى الدراسة لازم بيكون من جواه فى احساس مختلف.. حتى لو انكر ده.. لازم بيكون جواه احساس مختلف ونفس الامر لو حصل العكس...
ده لان الموضوع اصلا متعلق بطبيعة الانسان فى الاساس وبعوامل بتوجه الانسان وهى الهرمونات زى ما اشرت فى السابق...

نوصل فى الاخير لان العلاقة بين الجنسين ده مش حاجة بايد الانسان انه يعوزها او مش يعوزها هو بس ممكن يعمل كنترول عليها لكن اكيد بتفضل رغبة جواه انه يوصل للعالم الاخر ويعيش معاه..


الاثنين، 20 أكتوبر 2008

ليتنا خلقنا بدون لسان

كم هو ثقيلا ان يطلب منك ان تتكلم..

كم هو مملا ان تجلس تستمع للاخرين يثرثرون..

كم هو متعبا ان تجد نفسك راغبا عن الخوض فى حوار مهم..

كم هو ممتعا ان تجلس صامتا وسط مجموعة من الحمقى يظنون انهم فلاسفة..

كم هو مريحا الا ينتظر الاخرون رأيك..

كم هو جميلا ان تستيقظ فى صمت.. تذهب لعملك فى صمت.. وتمضى حياتك دون استخدام لسانك..

كم هو رائع الا نعير من آذانا اهتماما ولا نكترث لمدح الاخرين لنا..

ما اجمل ان نعيش فى عالم خالى من الكلمات..

عالم نكتفى فيه بالنظرات..

بدون حتى الهمسات..

فمالنا كتب علينا ان نستمع لهذا ونتحدث مع ذاك؟؟

لماذا كتب علينا الاستماع لثرثة ورغاء من لا يفقهون من قولهم شيئا؟؟

لماذا قدرنا ان نعيش فى عالم من الكلمات يتحدث فيه الناس اكثر مما يتنفسون؟؟

مالى كتب على اسمع هذا يتوعد وذاك يهدد وكلاهما لا يظهر من كلامه سوى الحماقة المفرطة والسذاجة القاتلة؟؟

لعنك رب السموات عالم... بنيت على اللسان


الاثنين، 13 أكتوبر 2008

back to school,,, first week

دلوقتى لينا حوالى اسبوع فى الجامعة. لا انا مش مجنون.. وعارف ان انهارده الاتنين(ده لو ما كانش الحد يعنى) بس احنا الجامعة الوحيدة فى مر اللى بتبلش بالدراسة يوم التلات.. معلش بقى.. اصل اسمها جامعة المستقبل...
بصراحة الواحد كان مستنى يرجع تانى لايام الجامعة.. مش حبا فى البالطوا اكيد.. بس انا بحب البلد دى وعشت فيها بجد (اجمل ايام عمرى) وعلى قد ما جرالى هنا مش نادم ثانية على اى حاجة مرت عليا او عملتها فى اكتوبر...

ملاحظاتى فى اول اسبوع عل جامعتنا العالية.. اوى...

1)كالعادة.. مدرجات مش نضيفة.. مايك سلكه بايظ.. بس عشان الامانة.. الستاير مش مقطعة السنة دى
2)بالنسبة للدكاترة.. هما هما الدكاترة ما بيتغيروش..
-prof. dawlat بكل رقيها ولمعانها.. بجد انا بحب الدكتورة دى جدا.. انسانة تخلى الواحد يقف فى المراية ويتف على نفسه
-prof. hamdy اللى لسه بيعاكس البنات بس برده مفيش شك (عالم)
-prof.hemmat ودى بقى ولية غلبانة حرام اصلا نتكلم عليها.. ربنا يهديها وتقتنع تاخد كرسات فى الفسيولوجى بدل ماهى اخيب مننا فيه كده
-dr.a. al demeri بشنبه ببدلته برخامته بخفة دمه وتقل دمه وشطارته فى التشريح
-dr. h. walid راجل مشكلة.. بجد موظف درجة اولى.. بس موظف عشرة على عشرة.. ناقصه بس شوية روشنة ويبقى عسل وطبعا هو اصلا من عين شمس يعنى مش انا اللى هتكلم على مستواه العلمى
-dr.a .al desoki والعياذ بالله داهيه تاخده.. بس هو اصلا قسم بايظ من اوله
- بيقولوا ان فى وجوه جديده انهارده لسه جارى التعرف عليها لانى روحت الجامعة الساعة 3 العصر وواضح انهم خلصوا بدرى
3)بالنسبة للولاد فى الجامعة عموما فمشاءالله عليهم.. البنطلونات فى النازل والبوكسرات فى الطالع.. وعلى رأى دكتور كمال(رئيس قسم التشريح:"الله يخرب بيت الفراخ")
اما بالنسبة للبنات.. دى ما بقتش جامعة.. دى بقت بيــــــت.... (شباب) رسمى.. ما شاءالله عليهم فعلا بيطبقوا الاية الكريمة:"واما بنعمة ربك فحدث).. اعتقد مش عايزة تعليق
بس انا بفكر انادى بعمل صندوق فى الجامعة لكسوة البنات.. لان الظروف الاقتصادية وافلاس بنوك امريكا واضح عليهم يا حسرة.. واحنا رجالة بشنبات برده(واحيانا ب make-up) لازم نبين الشهامة واللذى منه.. وهنعمل الصندوق.. او هنسيب الجامعة
4)بالنسبة للنظام الجبار فى جامعتنا المصونة.. فحدث بكل الحرج يا عزيزى...
-احنا بدأنا دراسة يوم التلات 7/10 الساعة 9:00 صباحا تمام.. يعنى متأخرين 3 اسابيع عن كل البشر الطبيعيين.. ومع ذلك ما استلمناش الكتب حتى لحظة كتابة هذه السطور.. والعذر اقبح من الذنب.. "انهم مش عارفين اسامينا فى المنفض عشان الكشف بتاع الاسامى لسه ما راحش".. وفى مثل هذا الموقف لا يسعنى الا ان اتذكر قول احمد مكى فى فيلم H دبور.. "A seven A" مع امكانية استبدال ال A التانية ب O عند الحاجة..
-تانى حاجة وكعادة الجامعة غيرت نطظام الدراسة للمرة الرابعة على التوازى فى خلال تيرمين وخمس ايام.. بصراحة حطموا موسوعة جينيس والويكيبيديا وكل حاجة فى الدنيا.. لا واحلى حاجة انهم كل ما يعملوا نظام يبقوا مش فاهمينه.. فيغيروه..
وهو ده الفرق(عيش الفرق مع جامعة اكتوبر"فودافون سابقا")
5)بالنسبة لزمايلى الاعزاء.. حاجة تقرف والله.. هما زى ما هما.. الولاد بيريلوا على البنات(الا قليل) والبنات بيريلوا على الولاد(الا قليل) مع الاعتذرا لريالة الاطفال.. مش قادرين لسه يفهموا ان اصغر فردة فيهم عنده او عندها 18 سنة.. يعنى المفروض يكون اب او ام اصلا.. حاجة تجيب العته للى مش بياكل فول..
بس يلا ادينى طلعت باربع صحاب ما فيش حاجة بتجمعهم غير انهم "مختلفين" والكلمة ليها معنى تانى غير اللى حضرتك فهمته وان كان فهمك الى حد كبير صح..
يعنى من الاخر حاجة تجيب احباط..
6)بالنسبة للمول.. انا بصراحة لسه ما دخلتهوش السنة دى.. لما اشوف الدنيا ماشية ازاى هبقى ارجع تانى واكتب..

كفاية كده على الجامعة...

ملحوظة.. انا بعرض لاجانب الواطى من جامعتنا العزيزة وده مش يمنع انى ليا فيها ايام unforgotten بجد..

الأحد، 7 سبتمبر 2008

عندما انهار الذوق.. بتاعنا

بصو انا مش عاوز حد يزعل منى.. يمكن الكلام يزعل كتيييييييييير اوى.. بس انا من حقى اقول رأيى, متفقين ؟؟؟
طيب يبقى نبدأ

طبعا كتيييييير من شبابنا العربى بيحب الفنان "الناجح" (عمرو دياب)....

للناس فيما يعشقون..
طيب اكيد كلهم فرحو لما هو اخد جايزة ال music award للمرة التالتة اعتقد.. حقهم, انا شخصيا فرحت لان اللى اخدها مصرى

طيب ممكن سؤال؟؟؟
هو عمرو افضل الموجودين عالساحة الغنائية فى الوطن العربى ؟
يعنى الجمهور الكبير بتاعه ده و الجوايز الرهيبة اللى بياخدها المفروض ان ده معناها انه فعلا الافضل..
هو الكلام يمكن يبان انو هجوم على عمرو بس والله مش كده خالص, انا مش بهاجم عمرو بس انا شايف ان نجاح عمرو الجامد "دلوقت" هو مؤشر لانحدار الزوق العربى!!!!
قبل ما تمشو من الموضوع او تفكرو تضربونى تعالو نتناقش.

عمر نجوميته بدأت تبان جامد فى الفترة الاخيرة.. ممكن اخر خمس سبع سنين.. لكن قبل كده كان عادى(مش عند جمهوره طبعا).. اللى متابع عمرو كويس هيقدر يعرف ان فى الفترة دى مستوى عمرو فى الاغانى بتاعتو اقل من زمان كتير و بصراحة فى كل البوم بيكون اقل من اللى قبلو(ده رأيى الشخصى و انا حر)

طيب.. لو انت من الناس اللى بتسمع كله.. قوللى بس بأمانه..
قيمة الاعمال اللى بيقدمها عمرو تتساوى مع قيمة اعمال ناس زى.. كاظم الساهر-صابر الرباعى-اصالة-مروان خورى-ماجد المهندس-عاصى الحلانى ؟؟
يعنى على مستوى الكلمة و اللحن.. بتحس ان عمرو بيقدم زى الناس دى ؟؟.. انا مش هتكلم عن الاداء لان ده تقدير شخصى انما الحاجات التانية ممكن تتقيم بموازين..
انا بصراحة شايف ان تأثرنا بالغرب الزايد عن الحد هو اللى مخلينا نرفض كل حاجة ليها علاقة بالذوق و الاصالة و كل حاجة بتقربنا من عروبتنا حتى لو كان ده فى الفن...
عمرو بيجيب الحان مسروقة(حد عنده اعتراض) سواء من اغانى اجنبية او عربية و يتكتبله عليها كلمتين انا بصراحة شايفهم من غير احساس عشان كده هو نجح.. عشان بياخد من بره و يجيبلنا بالعربى.. بياخد شكل و ستايل و لحن و موسيقى مش بتوعه و مش بتوعنا و بيجبهملنا.. ده اللى خلاه ينجح.. لكن فى ناس تانية بتبدع كلمة و لحن و توزيع عشان تقدملنا جديد بلغتنا و معانينا من غعير لا سرقة و لا تقليد..
والله انا ما بهاجم عمرو بس انا بجد زعلان على الزوق العربى اللى اتربى على فيروز و عبدالوهاب و احمد عبد المطلب و صباح و ام كلثوم و عبد الحليم و ناظم الغزالى .. ما يفضلش منه غير حرامى يكون هو خليفتهم
بس انا كده خلصت اللى عندى.. ولا عزاء للذوق العربى


الخميس، 4 سبتمبر 2008

the sweetest thing ever,,, love

Hundreds and hundreds woundered about what you really are
Thousands and thousands spent days and nights thinking what you could be
Millions and millions died without having the chance to get to know your reallity
Why are you so mysterious

Are you real or just fiction
Do u really have existance or it's just us who made you
Can we one day pay what you owe us
Can we just give you a moment of the tourture that you give us
Will you just stay forever looking at people die because of you while you're laughing at them

Let me take the turn and ask
What are you
Are you really the sweetest thing ever in life
Are you the tourturator that finds fun to make us suffer
Are you the paradise
Are you the hell
What are you

Why don't you knock our doors
Why just you rush into us without permission
Why do you have this power to do what you want while we can do nothing but full obey

And after all this you are still,,, the sweetest thing ever


الأربعاء، 3 سبتمبر 2008

قناة الناس... ظاهرة تستحق التوقف

ربنا يستر من اللى هيحصل...

اولا انا احب اقولكم ان انا اخر واحد ممكن يتكلم عن الدين.. عشان كده انا مش عامل الموضوع ده كموضوع دينى.. المهم

اكيد كلنا عارفين قناة "الناس"


مفيش شك ان القناة دى انتشرت بسرعة جامدة جدا و خلقت "حالة" بين الناس.. طيب نتناقش بقى
اولا انا كنت لفترة متابع القناة دى (لانى ببقى قاعد مع بابا لما كان بيشوفها بس بطلتها) و شفت عليها شيوخ كتيرة و حاجات غريييييييييييييييييييييييييبة..
مفيش شك ان قناة زى دى ساهمت بشكل كبير فى نشر "الوعى الدينى" عند الناس(زى ما شيوخها شايفين) بس انا عندى شوية تعليقات عليها...

اولا.. شيوخ القناة.. القناة بتضم عدد كبير من الشيوخ و علماء الدين(معظمهم غير موثق بالازهر) فيهم الكويس و فيهم اللى مش ينفع اصلا يخطب فى جامع, يعنى فى علماء زى ابو اسحاق و محمد حسان اعتقد انهم افضل الموجودين.. بس فى ناس تانية زى الشيخ محمد يعقوب و سالم ابو الفتوح.. سورى يعنى مش عارفين حاجة

ثانيا.. اهداف القناة.. طبعا القناة بدأت كقناه اعلانية و بعدين اتحولت لقناة دينية بس واضح ان لسه الربح التجارى هو الهدف الاسمى من ةخلال الاعلانات اللى ماليا القناة و اللى فعلا مستفزة.. اسمع يا سيدى
-الهاتف الاسلامى(تقريبا لو اتصل بيك واحد مش مسلم مبيرنش)
-الشنط الاسلامية(مش عارف بس ممكن تكون مبيتحطش فيها شرايط كاسيت)
-البطانية الاسلامية(لا بجد مش عارف اسلامية ليه)
-السواك الاسلامى(على اساس ان غير المسلمين بيستخدموه)
-ممكن المنتج الجاى يكون الشيطان الاسلامى(مش هستغرب)
الناس دى مستغله حب العرب و المصريين خصوصا للدين الاسلامى و تأثرهم بيه و بيدخلولنا من الباب ده, يعنى هما مش محتاجين غير كام متر دقون على جلابيتين و شوية حركات من بتاعة الدراويش عشان يبيعوا(اصل التجارة شطارة)

ثالثا.. تكالب شيوخ القناة على الفتوى..
عشان مش اكون متعسف دى ظاهرة موجودة عند كل شيوخ القنوات اللى بتقدم برامج دينية بس هى ملحوظة اوى عند شيوخ قناة الناس اللى بيفتو فتاوى بتأدى لتضارب الفتاوى و حيرة الناس.. يعنى مثلا..
-فتوى الشيخ ابو اسحق عن البنوك.. الشيخ حرم تعاملات البنوك تماما.. ماشى انا صاحب مليارات و مش هتعامل مع البنوك(مهى حرام) حلها بقى يا مولانا لما اعوز اعمل trade ازاى هنقل الفلوس دى ؟؟؟ امشى بيها ولا ايه.. طيب وازاى هعينها؟؟؟ تحت البلاطة؟؟؟
-فتوى الشيخ يعقوب عن البنوك برده.. الشيخ قال لا البنوك "الاسلامية" مش حرام(ثوانى لما اضحك) يعنى ايه اصلا بنوك اسلامية.. انا شايف ان ده بدعة من شوية ناس عاوزين مصلحتهم قالو نستفيد من الكلمتين بتوع الشيوخ و نعمل بنك نزود فى اخره كلمة (اسلامى).. طب يا مولانا لو اعتراضك عالفايدة الثابتة انصح الناس بالحساب الجارى مثلا.. على حد علمى ده مالوش فايدة اصلا
-ولا النكتة الجامدة.. واحدة بتسأل الشيخ يعقوب "انا جبت مجموع كبير فى الثنوية.. ادخل هندسة ولا دراسات اسلامية" يقوم "العالم" يرد:" هتدخلى هندسة عشان تطلعى سقاله".. حد يسكتنى من الضحك

المشكلة ان الناس دى اصلا مش مرخص ليها بالفتوى من دار الافتاء و الناس للأسف فكراهم هما الصح وهما اللى يتبعوا مع ان المفروض ان المفتى هو اللى يتبع.. لو فتوته سليمة جزاه الله كل خير.. ولو مش سليمة هو اللى شايل الذنب و ربنا امرنا نتبع "اولى الامر" :"و اطيعوا الله و اطيعوا الرسول و اولى الامر منكم".. صدق الله العظيم
و اكيد شيوخ القناة مش من اولى الامر

رابعا.. اثر القناة على الناس..
-الناس دلوقت بقت منساقة تماما ورا القناة و شيوخها و آرائهم ومش بتسمع غيرهم و ده شىء خطير لان احنا فى عصر كثر فيه الغلط واللغط و تضارب الفتاوى, يعنى الموضوع مش ناقص


للاسف قنوات الفتوى كترت و الشيوخ مجهولين الهوية كتروا بس انا اختصيت قناة الناس بالكلام لانها الاكثر انتشارا..

انا مش ضد الدين.. انا مسلم و بغير على دينى(مع ان شكلى ميديش على كده) بس انا بجد خايف من التيار اللى بيجتاح عقولنا باسم الدين ده..
ارجو المشاركة


"ممكن اخد لفة؟؟"... بعيدا عن السياسة

ملحوظة هامة:

اى تشابه فى الاسماء او الشخصيات او المواقف بين افراد المسرحية و الواقع هو مقصود و عن عمد ليس اكثر





الشخصيات...
محمود حسنين مبروك.. رئيس جمهورية "مصير المحروتة"
جميل.. الابن الاصغر
على.. الابن الاكبر
سوزى.. حرم الرئيس
شاندو.. حفيد الرئيس و نجل الابن الاكبر




المشهد...
فى منزل رئيس دولة "مصير المحروتة" دار هذا الحوار بين الرئيس و افراد اسرته على الافطار





الرئيس:تانى يا جميل تانى.. انت مش بتزهق من الكلام فى الموضوع ده؟؟
جميل:يا بابا يا حبيبى انت ليه بس مش موافق؟؟
الرئيس:مش موافق على ايه, هو اللى انت بتقوله ده كلام ناس عاقلين ؟
جميل:ليه بس يا بابا.. سيبنى اجرب شوية
الرئيس:انت فاكرها لعبة؟؟؟
جميل:لا طبعا دى مسؤلية جامدة.. انا عارف التعب بس مستعد
الرئيس:يبنى انت مش فاهم.. الموضوع مش سهل دلوقت.. العالم كله عينه علينا و انا مش هقدر اسيبلك الحكم بالبساطة دى.. انت عارف ان الجدع بتاع دولة "امويكو" مش هيسيبنا.. ده مستنيلنا على غلطة
جميل:لا لو على الرئيس "بيشو" اطمن ده هو اصلا مش طايقك و شايف انك طولت اوى و بعدين هو و بلده راضيين عنى ما تخافش
الرئيس:يبنى انت مش فاهم.. الشعب بيحبنى لدرجة العبادة ومش هيوافق انى اسيب الحكم طول منا عايش
جميل(يضحك بصوت عالى):هههههههههههههههههههه.. ايه يا راجل يا عجوز.. انت كدبت الكدبة و صدقتها؟؟؟ منتا عارف ان مفيهمش حد طايقك.. دانتا جوعتهم و اهنتهم و رميتهم فى السجون و عاملتهم هناك معاملة الكلاب.. بيحبوك ازاى يا بابايا انت شكلك كبرت و خرفت يا واد يا حسين
سوزى:ولا يا جميلسيب بابا يفطر ده انهارده عنده اجتماع فى مجلس الشعب و الناس مستنينه
جميل:خليكى انتى بس على جنب يا مامى ده كلام رجالة.. اطلعى بس منها
(يلتفت لوالده) بابا انت ربطت مع الهتيفة بتوعك عشان يجهزو انهارده ؟؟
الرئيس:اطمن يا جميل, عمك "حبوب العدل" وزير الداخلية قام باللازم.
سكــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــوت



اثناء تناول الطعام يرن هاتف القصر و يرد جميل




جميل:الو
ــــــ:الو, ايوه يا جميل
جميل:ازيك يا حماده(احمدى عزيز.. تاجر حديد كبير و ناهب اموال الدولة و صاحب ابن الريس)
حمادة:ازيك يا جيمى عامل ايه انت و الجدع العجوز اللى عندك؟؟؟
جميل:مغلبنى والله يا حمادة ومش راضى يقتنع ان 27 سنة كفاية
حمادة:يا سيدى بكرة تجيله داهية تشيله
جميل:يا ريت بس واضح ان عزرائيل ناسيه او يمكن خايف منه
حمادة:والله انت معاك حق لانه طول اوى و بجد احنا ذات نفسنا اتخنقنا
جميل:دا انا ابنه و مبقيتش طايقه
حمادة:اصبر مسيرة يسلم عهده
جميل:ايوه.. المهم انت كنت عايز ايه ؟
حمادة:كنت عايز اقولك انى رفعت تمن الحديد تانى عشان يبقى عندك فكرة
جميل(تفكير عميق):كويس يا حمادة كويس الناس خلاص مش طايقة ابويا و كل ما نخنقهم اكتر كل ما ساعته تقرب اكتر
حمادة.. يعنى موافق؟؟
جميل:ايه يا جدع طبعا.. ويا ريت تفضل تزود زيادة مدروسة و انت استاذ فى الموضوع ده
حمادة:ماشى يا جميل.. سلام
جميل:سلام



يضع سماعة الهاتف و يعود للمائدة



الرئيس:مين يا واد يا جميل؟؟
جميل:ده حمادة يا بابا كان يسأل عليا بس.. ما تشغلش بالك انت.. المهم قلت ايه ؟؟
الرئيس:فى ايه يا ولا ؟
جميل.. فى موضوع الحكم.. كفاية عليك كده يا بابا.. انت فى عهدك "مصير المحروتة" اتبهدلت احلى بهدلة و الناس ماشية بتكلم نفسها من الجوع و الفقر و البطالة و فيروس سى و الحزب الطينى
الرئيس:يا ولا بطل وجع دماغ بقى و بعدين مهو اخوك على موجود و اكبر منك و عنده ولى عهد وانت لا.. يعنى هو ممكن يقول انا عايز الحكم انا كمان اشمعنى انت يعنى؟؟
جميل:يا بابا على مش فاضيلنا هو عنده شغله الخاص بيه و بعدين كده كده شاندو هو اللى هيمسك بعدى لانى مش بخلف زى ما انت عارف عشان الحادثة بتاعة زمان
الرئيس:يوووووووووه انا قرفت من ده بيت هو الواحد مش يعرف يستريح شوية.. هو انا هلاقيها منك ولا من حركة"دفاية" ولا الجدع بتاع جريدة"الدكتور" ولا من الجماعة بتوع الدقون.. انتو عايزين منى ايه:عايزنى اموت؟؟
جميل:يا ريت يا بابا بس انت مش بتموت هعملك ايه؟؟
الرئيس:تقوم تورثنى بالحيا؟؟؟
جميل:يعنى انت هتاخد زمنك و زمن غيرك.. كفاية عليك كده بقى
الرئيس:امشى من قدامى يابن الــــ.......................



يسمع صوت عالى من الخارج يختلط فيه الصراخ بضرب النار باصوات تكسير و جلبة عالية.. تخرج الاسرة مفزوعة للشرفة تشاهد ما يحدث..



الرئيس:ايه ده؟؟
جميل:دول الناس باينهم عملو ثورة و جايين يقتلونا
سوزى:ماااااااااااااااااااااااااااااااميييييييييييي يييييييييييييييييييييييييييى
على:احنا لازم نمشى من هنا
شاندو:وااااااااااااااااااااااااااااااااااااااااااا اااااااااااااااااااااء
الرئيس(ينادى الامن):جهزوا الطيارة واطلعو بينا على دولة "فسرائيل" هنعيش عند اصحابنا هناك...



يركبو الطيارة و يهربو................................... و يسدل الستار

الثلاثاء، 2 سبتمبر 2008

الخصخصة و.. المصمصة !!!

انهارده قبل الفطار بكام ساعة لقيت راجل جاى وبيقول انه هيركب عداد مياه..
فبقوله احنا عندنا عداد دا احنا ساكنين لينا تلات سنيين!!! قاللى انه جاى يركب عداد للدور التانى من البيت فالمهم دخلته من مبدأ انى ماليش دعوة باللى بيحصل فى بيتنا وبعدين بتطقس عن الموضوع فعرفت ان سياسة شركة المياه المجيدة ان كل دور له عداد حتى لو فى نفس البيت(على فكرة ده بيت ملك مش عمارة سكان) المهم عرفت بعد كده بشوبة ان شركة الكهربا عاملة الحوار ده هى كمان..
قمت اعدت افكر بقى..
لو حسبنا تكاليف الخدمات فى بيتنا شهريا..
فاتورة المياه= 20 جنيه شهريا
فاتورة الكهربا= 180 جنيه شهريا
فاتورة التليفون= 350جنيه شهريا
مع مراعاة ان المياه والكهربا حساب فاتورتين والتليفون فاتورة واحدة حتى اشعار اخر
هنلاقى ان المواطن المصرى فى المتوسط مطلوب يدفع خدمات بقيمة 500 جنيه تقريبا (مرتب الموظف العادى حوالى 300 جنيه)
يبقى ودنك فين يا جحا؟؟؟؟
المهم كل ده ناتج من سياسة الخصخصة اللى بتتبعها الدولة.. او خلينا نقول المصمصة.. لان اللى الدولة بتعمله بجهلها.. او خلينا نقول الحكومة عشان مصر ام الدنيا مش جاهلة.. اللى الحكومة بتعمله بجهلها اسمه مصمصة مش خصخصة..
لما تروح الدولة تبيع شركة بتقدم خدمات حيوية للمواطن المصرى يبقى ده اسمه جهل وتخلف.. و طبعا.. مصمصة...
مصمصة لعضم المواطن اللى ما عندوش اصلا لحم (كبلو الللللحمة او اللححمة يوووه الللححمة.. ايوة كده  صح.. كيلو الحاجة اللى انا نسيت اسمها دى ب 45 جنيه.. مين اللى هيشترى ان شاءالله؟؟؟)
هتقولى كل الدول المتقدمة بتخصص.. اشمعنا احنا حرام علينا.. هقولك مش حرام ومش غلط بس لما تبقى خصخصة.. مش مصمصة..
انا مش خبير اقتصادى بس بفكر بسيط واستنادا لتجارب الدول المتقدمة اللى احنا بعد الشر علينا مش منها.. بتطبق الخصخصة بفكر يحقق الفايدة للمواطن والمستثمر..
مش بتبيع شركة خدمية.. لا.. الدولة  المفروض تأجر شركات الخدمات دى للمستثمر لمدة محدودة نقول مثلا 30 او 50 سنة.. ويبقى خاضع لرقابة وقوانين الدولة.. مش يبقى واخدها تكية ابوه ويعمل اللى هو عايزه فى الناس..
اللى كان المفروض يتعمل فى مصر وما اتعملش بسبب ناس الشيطان راكب دماغها وشافط ضميرها ان شركات المياه والكهربا والتليفون وغيره يتأجروا لفترة ويبقو تحت اشراف الدولة.. انما اللى حصل بسبب ناس عايزة تسرق فلوس ده حرام وادينا احنا بندفع تمنه..
وربنا معانا

الأحد، 31 أغسطس 2008

لما تكون مش عايش.. عن سياسة "وانا مالى" اتحدث

"خليك جنب الحيط"
"ملكش دعوة بالسياسة"
"خليك فى حالك وابعد عن الشر و غنيله"
"بلا مظاهرات بلا اعتصامات بلا هبل.. ابعد عن الاذى"
"ابعد عن ابراهيم عيسى والاخوان و كفاية واللى زيهم"
"...................................................

الجمل دى كلنا اكيد بنسمعها فى البيت ومن صحابنا واهاليهم(اللى خايفين على ولادهم مننا).. فينا اللى بيطنش(احترمه) وفينا اللى بيسمع الكلام

انا الحمدلله نشأت فى بيت ربانى على الحرية, يعنى بابا عمره ما قاللى اعمل وما تعملش.. دايما يدينى النصيحة وانا حر..
و عمرى ما اتربيت على انى اكون سلبى وابعد عن الدنيا اللى انا فيها.. و دى نعمة بشكر ربنا عليها
كنت فاكر ان كله كده لكن اتصدمت بواقع ان فى ناس فعلا بتخاف و بتمشى جنب الحيط..

الناس دى تقولك الكلمة اللى هقولها لا هتقدم ولا هتأخر ومش انا اللى هصلح البلد ومش انا اللى هظبط الكون وفى الاخر هيكون نصيبى اتنفخ فى السجن.. مبدأ برده
طيب لو كل واحد فينا بيقول انا مليش دعوة.. امال ان شاء الله مين اللى ليه دعوة ؟؟؟
يعنى لما احنا مش اللى هنصلح البلد..مين يصلحها؟؟.. نجيب بوش؟؟(الراجل ما بيتأخرش)

من ناحية تانية.. الحياة جنب الحيط مش حلوة.. مملة.. مفيهاش متعة ولا اثارة.. مفيهاش حياة اصلا
يعنى اللى بيمشى جنب الحيط واللى بيمشى وسط الشارع عاملين زى اتنين راحو البحر.. واحد خايف من الميه وقعد على الشط والتانى نزل وبلبط زى ما هو عايز فى وسط البحر..
الاول مش معرض للغرق.. بس فقد متعة البحر
التانى ممكن فى اى لحظة يغرق.. بس لو مات هيموت وهو مستمتع بكل لحظة قضاها فى البحر..
مش هيموت فى نفسه حاجة
وأصلا مفيش حد بيموت ناقص عمر..
يعنى كده كده هتموت فى الوقت وبالطريقة المتحددة ليك يبقى عيش حياتك بقى ومش تستخبى ورا الابواب
اعتقد التشبيه واضح ووصل اللى عايز اقوله

احنا بجد محتاجين نبعد عن السلبية و سياسة "وانا مالى".. لازم نشارك فى المجتمع اللى احنا عايشين فيه.. لازم نصلح بلدنا.. لازم نتعلم ازاى ننطأ كلمة "لأ" ونتعلم نفهم كلمة "حقى"..
هو صحيح التمن غالى.. بس اكيد الهدف اغلى و اسمى..

انت بقى.. بتحب تبل رجلك على الشط ولا بتلبط جوه ؟؟؟؟

سواق التاكسى.. وانا(موقف)

طبعا كل سنة وانتم طيبين بمناسبة شهر رمضان المعظم ويا رب يكون بابا خير لينا كلنا وخصوصا ان شوشو مأجز 30 يوم.. يعنى محدش عنده حجة بقى,,,,
انهارده ومن ساعتين بالتحديد كنت راجع من عند عم محمد الجباصى.. راجل طيب معرفة بابا بنشترى منه لوازم رمضان كل سنة.. والسنة دى وقع عليا الاختيار انى اتشرف باحضار التمر وخلافه(زى كل سنة يعنى) الى منزلنا المتواضع..
المهم وانا راجع من هناك.. وقفت تاكسى عشان يوصلنى البيت وطبعا الحاجات اللى معايا(بصراحة هى اهم منى اصلا).. الباشا كان قدى فى السن تقريبا او اصغر سنة.. المهم قلتله على مكان بيتنا واتكرم ووافق(لاحظوا انى بتكلم عن البيه السواق)..
احنا بيتنا بيقع فى مكان خاص فى احد احياء مدينة رشيد.. المكان ده مخصص للفيلات والحاجت دى يعنى..  و هو مكان جميل بس فى شارع متبهدل فى الطريق(من غيره ما تبقاش دى مصر).. الواد السواق.. اقصد البيه السواق طول ما انا راكب قاعد يوجع دماغى بان النقلة دى جايه عليه بخسارة وان الطريق مكسر وانه مش عارف يركب زباين تانية عشان الحاجت بتاعتى مالية التاكسى والحوارات دى.. وانا ساكت ومش برد مع ان طريقته كانت مستفزة مووت...
المهم ركب واحد كمان ورا وكان تقريبا بيزعقله عشان ما قفلش الباب(مع ملاحظة ان الواد كان لسه ما دخلش التاكسى اصلا)..
يعنى من الاخر الواد البيه السواق كان جر شكل.. المهم انا قلتله على طريق انضف للبيت مش مكسر بس ما جاش على هواه عشان هيمشى حوالى 40 متر زيادة(بالتاكسى).. قمت ساعتها بقى فتحت فيه واديتهوملوا فى جنابه وعرفته ان دى مش طريقة معاملة للزباين وظبطته يعنى(اه نسيت اقول ان السواق اصدر نوعا ما من الموسيقى للولد اللى ركب بعدى عشان ما قفلش الباب!!!) الباشا السواق بعد الكلمتين دول بقى.. الكلب السواق(مع الاعتذار للكلاب) وحط لسانه فى بقه لغاية ما وصلنا البيت..
ملحوظة صغيرة.. الطريق للبيت حوالى 7 دقايق مش اكتر وحصل فيهم ده كله من غير ازاى...
طبعا انا مش بحكى الموقف عشان اقول اللى حصل.. بس لأن دى فعلا بقت ظاهرة.. ان سواق التاكسى بقى هو اللى بيأجر الزبون مش الزبون اللى بيأجر عربيته..
بقى ليهم نوع من السيطرة وفرض الارادة على الزبون مع انهم اكتر من النمل.. بس تحس ان يوم ما حد يتجلى منهم ويقف لمواطن حقير زيك انه بيتفضل عليك بوقوفه وتانزله ورضاه بتوصيلك..
الموقف ده كتيييييييييييييييييييييييييييييير مننا اكيد مر بيه واكيد هيمر بيه لان اسبابه مش بتتغير ومحدش بيحاول يصلحها..
ده حتى لما قانون المرور الجديد طلع(انا مش مع كل بنوده لكنه مش سىء اوى يعنى)ما لموش نفسهم وبقى الواحد منهم يمشى يلعن فى الظابط والحكومة والقانون ويعدد فى اسباب الحصول على غرامات وهو نفسه بيعمل كل حاجة تديله غرامات..
لا حزام لابس ولا عداد موجود ولا طريق ملتزم بيه..
اعتقد ان الحاجة الوحيدة اللى اغفلها قانون المرور واللى كانت ممكن تعدل البشوات سواقين التاكسى.. انهم  يغرموا اللى يشغل شرايط مصطفى كامل وسعد الصغير فى التاكسى

اول كلمة



بسم الله الرحمن الرحيم

دى اول خطوة ليا فى عالم التدوين..
اتمنى ان التجربة تكون مثمرة وانى اقدر استفيد منها وافيد كمان..
انا مش كاتب مقال.. ومش بعرف فى تأليف القصص.. ولا حتى كتابة الشعر..
انا مجرد طالب عنده 18 سنة فى كلية طب وكمان فى جامعة خاصة.. يعنى خيبتى قوية..
بس ساعات بحس ان عندى اللى اقوله..
المدونة بالنسبالى هتكون ارشيف لمواقف انا مريت بيها ووقفت عندها..
هتكون مكان اكتب فيه مذكراتى يوم ما احتاج انى اكتب..
هتكون مكانى اللى باحتفل فيه بفرحى وببكى فيه على حزنى.. يعنى هتكون بيت ليا..
انا مش متوقع انى اضم مشتركين كتير للمدونة لانها هتكون شخصية الى حد ما.. وانا فى كتير من الاحيان بتكون ليا افكار شوية متطرفة ومش بتاعة المكان ده زى ما بيتقال واتوقع ان قليل جدا هما اللى ممكن يكونوا مستعدين يشاركونى الافكار دى..
انا بقول ليكم كلكم اهلا..
وبقول للى مش متفقين مع افكارى اهلا بيكم برضو نتناقش كلنا..
لهجة الحوار فى المدونة انا فضلت انها تبقى مصرية مش فصحى نظرا لانى مصرى اوى وبعشق تراب البلد دى و بحب انى اتكلم بلسانها..
و ان شاءالله المقالات هتتنوع ما بين اللغتين العربية والانجليزية حسب القدرة والفكرة
اخر حاجة احب اقولها.. انا مش بحب القيود وبعشق هوا الحرية عشان كده سميت المدونة "انا حر" والحرية هنا تنطبق على جميع الزوار اللى بيشرفوا متصفحى.. حريتنا مالهاش سقف.. ابدا
بس طبعا المحظور الوحيد هنا هو المساس بالاديان او المساس بعقائد الاخرين....

اسلام شحاتة
---------------------------------------------------------

In The Name Of Allah

It's my first step into the world of blogging
I wish that this will be good experience and i wish to let the others benefit and benefit from it myself
I'm not a reporter,, nor storries writter,, i can't even write poems
I'm just 18-years-old student studying medicine in a private university,, this mean i'm FAIL :D
It's just sometimes I feel like having what to say
I take this blog as a record to the situations i've experienced and thought about alot
It will be the place where I celebrate my happiness and cry when I feel sad,, it will be like my home,, or say,, it will be my home
I don't expect to get many people to join for the blog will be kinda private in addition to that I sometimes have extremest ideas or "ideas that don't fit to where i belong" as they say, so I don't expect many people to agree to my thoughts
So, I welcome you all,, and welcome those who will have other opinions and disagreeing comments on what i post
I'll post topics in both languages Arabic(Egyptian Arabic) and English according to the idea and the ability to translate it into English
My last word,, I hate restrictions and love to breath the air of freedom,, that's why i gave my blog the name   I'M FREE
freedom here is a right to everyone without limits,, but the only prohibited thing is to insult others religions or make fun of their believes

Eslam N. Shehatah



visitors